Dua Samueli 8:1-18
8 Samuza inötö, fasuwö Dawido ba niha Wilisiti+ ba ikalaisi ira,+ irabu göi Metegi-amana moroi ba danga niha Wilisiti.
2 Ikalaisi niha Moabi+ ba iwaʼö khöra enaʼö lafaʼoli ira tou ba danö. Isuʼa ira faoma sinali me no teʼoli. Ibunu zi dombua niʼotölu, ba itehegö auri zi sambua niʼotölu tö.+ Aefa daʼö, tobali sawuyu Dawido niha Moabi ba laʼohe khönia mbeʼelö.+
3 Ikalaisi göi razo Zoba,+ yaʼia daʼö Hadadezeri ono Rehobo, sofanö ba wamadöni Ungo Nidanö Oiferati enaʼö ifuli mamatörö ia ba daʼö.+
4 Moroi ba daʼö, faʼato niraʼu Dawido 1.700 zaradadu si fakudo ba 20.000 zaradadu sanörö tanö. Aefa daʼö, itaba fefu gölu-ölu kudora, hatö 100 ngaʼeu iröi.+
5 Me tohare niha Ziria moroi ba Ndramaseko+ ba wanolo Hadadezeri razo Zoba, 22.000 niha Ziria nibunu Dawido.+
6 Ifataro zaradadunia Dawido ba Ziria ba Ndramaseko, ba tobali sawuyu Dawido niha Ziria andrö ba laʼohe khönia mbeʼelö. Gofu hezo möi ia, lö tebulö ifemöna* ia Yehowa.+
7 Baero daʼö, ihalö mbaluse zaradadu Hadadezeri andrö Dawido, baluse sowulo-wulo nifazökhi moroi ba ganaʼa, ba iʼohe ba Yeruzalema.+
8 Oya sibai tembaga nihalö Razo Dawido moroi ba Deba hegöi Berota, banua nifatörö Hadadezeri.
9 No irongo Toʼi razo Hamata+ wa no ikalaisi fefu zaradadu Hadadezeri andrö Dawido.+
10 Börö daʼö, ifatenge nononia Toʼi sotöi Yoramo khö Razo Dawido ba wanofu hewisa duriania, ba wamaʼema fangowai me no ikalaisi Hadadezeri, börö me asese sibai fasuwö Hadadezeri wolawa Toʼi. Iʼohe Yoramo gama-gama moroi ba wirö, anaʼa ba tembaga.
11 Iʼamoniʼö gama-gama daʼö Razo Dawido khö Yehowa, simane fangamoniʼönia firö ba anaʼa nirabunia ba soi si no ikalaisi,+
12 yaʼia daʼö moroi ba Ziria ba Moabi,+ moroi ba niha Gamoni, niha Wilisiti,+ niha Gamaleki,+ ba moroi khö razo Zoba, yaʼia daʼö Hadadezeri+ ono Rehobo.
13 Itugu tehöngö Dawido me no ikalaisi zi 18.000 niha Gedomo ba Ndraso Nasio.+
14 Ifataro zaradadunia Dawido ba zi sagörö tanö Gedomo, ba fefu niha Gedomo tobali sohalöwö khönia.+ Gofu hezo möi ia, lö tebulö ifemöna* ia Yehowa.+
15 Lö tebulö mamatörö Dawido ba zi sagörö tanö Gizaraʼeli,+ ba ifatörö huku satulö ba sindruhu+ ba nono mbanuania.+
16 Yoabi+ ono Zeruya zi tobali kumandru ba Yozafati+ ono Gahiludi tuka zanura.
17 Sadoki+ ono Gahitobi ba Ahimelekhi ono Gabiataro daʼö zi tobali ere, ba Seraya zi tobali sekretaris.
18 Benaya+ ono Yehoyada zi tobali kafalo ba niha Gereti hegöi Feleti,+ ba ono Dawido zi tobali salahi zamatörö.*
