Dua Samueli 9:1-13
-
Fa’omasi si lö faröi niforoma’ö Dawido khö Mefibose (1-13)
9 Imane Dawido, ”Hadia so nasa zi toröi ba nösi nomo Zaulo enaʼö tola uforomaʼö waʼomasi si lö faröi börö mbuʼusa ligu khö Yonata?”+
2 Ba nösi nomo Zaulo so samösa zawuyu sotöi Siba,+ lafatenge ia ba wangondrasi Razo Dawido. Manofu khönia Razo, ”Hadia Ziba ndraʼugö?” Imane, ”Yaʼia Pa.”
3 Imane Razo, ”Hadia so nasa zi toröi ba nösi nomo Zaulo enaʼö tola uforomaʼö khönia waʼomasi si lö faröi moroi khö Lowalangi?” Imane Siba, ”So samösa tö nono matua khö Yonata. No akela-kela gahenia dua rozi manö.”+
4 Manofu khönia Razo, ”Hezo so ia?” Imane Siba, ”Ba nomo Makhiri+ ono Gamieli ba Lo-debara.”
5 Iʼanemaiʼö ifatenge niha Razo Dawido ba wamaondragö yaʼia moroi ba nomo Makhiri ono Gamieli ba Lo-debara.
6 Me ofeta Mefibose ono Yonata ono Zaulo khö Dawido, mangalulu khönia Mefibose. Aefa daʼö imane Dawido, ”He Mefibose!” Itema li, ”Hana Pa.”
7 Imane Dawido, ”Böi ataʼufi. Uforomaʼö khöu waʼomasi si lö faröi+ börö mbuʼusa ligu khö namau Yonata. Ufuli khöu fefu nowi duamö Saulo, ba lö tebulö manga ndraʼugö* ba mezagu.”+
8 Me irongo daʼö, mangalulu Mefibose ba imane, ”Haniha zawuyumö andre? Hana wa öʼameʼegö tödö nasu si mate+ simane yaʼodo andre?”
9 Mohede Razo khö genoni Zaulo sotöi Siba imane, ”Fefu gokhöta Zaulo sokhö yaʼugö mböröta awö nösi nomonia, ubeʼe khö maʼuwu zokhö yaʼugö.+
10 Yaʼugö, iraonou, ba sohalöwö khöu zangohalöwögöigö nowi daʼö khönia. Öʼowuloi mbua nowi daʼö si tobali balazo ba nösi nomo Mefibose, maʼuwu zokhö yaʼugö. Hizaʼi, lö tebulö manga Mefibose ba mezagu.”+
So 15 nono matua khö Ziba ba 20 zohalöwö.+
11 Imane Siba khö Razo, ”Fefu hadia niwaʼömö Razo, hasambalö ifalua sawuyumö andre.” Manga Mefibose ba meza Dawido* simane ono razo.
12 So göi nono matua si bohou ebua khö Mefibose, töinia Mikha.+ Fefu niha si toröi ba nomo Ziba tobali sawuyu Mefibose.
13 Toröi Mefibose ba Yeruzalema ba lö tebulö fao ia khö Razo wemanga.+ No akela-kela gahenia dua rozi manö.+
