Dua Timoteo 2:1-26
2 He onogu,+ böi böhöli wangandrö faʼabölö ba waʼasökhi dödö sebua* andrö niforomaʼö Keriso Yesu.
2 Fefu nirongomö moroi khögu si no lafaduhusi tödö ira samaduhuʼö,+ faduhusi tödö göi ba niha si lö faröi, si tola mamahaʼö niha böʼö dania.
3 Yafao ndraʼugö ba wamakao+ si tobali saradadu si sökhi+ khö Keriso Yesu.
4 Lö hadöi saradadu sarörö ba wangalui kefe,* börö me omasi ia iʼomusoiʼö dödö niha samasuraʼö töinia me tobali ia saradadu.
5 Simanö göi niha si fao ba watandrisa, lö tebeʼe khönia dakula na lö iʼoʼö zi no mufakhoi.+
6 Baero daʼö, niha sohalöwö ba danö si no erege tödö, sinangea na yaʼia zi oföna manga bua zinanönia.
7 Böi böhöli fatou-tou tödöu wehedegu andre, ba ibeʼe khöu waʼaboto ba dödö Lowalangi ba ngawalö hadia ia.
8 Böi olifu ndraʼugö wa no tesusugi Yesu Keriso moroi ba gotalua zi mate,+ ba maʼuwu Dawido ia,+ simane turia somuso dödö niʼombakhaʼögu,+
9 me daʼö mbörö wa tefakao ndraʼo ba labeʼedo ba gurunga hulö niha si lö sökhi.+ Hewaʼae simanö, lö nirate daromali Lowalangi.+
10 Daʼö mbörö wa utaögö ngawalö wamakao börö niha nituyu andrö,+ enaʼö tola göi teʼorifi ira ba khö Keriso Yesu ba tefolakhömi sagötö faʼara.
11 Tola tafaduhusi tödö wehede daʼa: Tatu manö, na fao ita ba waʼamate khönia, fao göi ita khönia ba waʼauri.+
12 Na anau gölöda, fao ita ba wamatörönia tobali razo.+ Na tatimbagö ia, itimbagö göi ita.+
13 Hewaʼae faröi ita, lö faröi Lowalangi börö me tebai isawö zi no iwaʼö.
14 Böi böhöli fasugi ba dödöra daʼa. Amenesi ira* föna Lowalangi enaʼö lö fadaʼawa ira ba wehede andrö. Lö eluaha daʼö börö me tola ifuyuʼö* dödö niha samondrongo.
15 Forege enaʼö tobali ndraʼugö niha niʼomasiʼö Lowalangi, sohalöwö si lö aila ba wamalua halöwö, sangogunaʼö taromali sindruhu ba zi tefaudu.+
16 Böi fondrondrongo wehede si lö eluaha si lö faudu ba niʼamoniʼö,+ börö me daʼö zangaʼaröuʼö niha moroi khö Lowalangi,
17 ba tehöngö wehede andrö hulö zokho sangobousi nagole. Fao Himenaiʼo ba Fileto ba wamahöngö fehede daʼö.+
18 No elungu ira moroi ba zindruhu. Lawaʼö wa no alua wanusugi,+ ba lafaelungu wamati niha sato.
19 Hewaʼae simanö, lö tebulö dane-dane si no ihonogöi Lowalangi ba no tesura ba daʼö, ”Iʼila Yehowa* haniha dana khönia,”+ ba, ”Dozi siʼao ba döi Yehowa,*+ enaʼö laʼerogö zi lö atulö.”
20 Ba nomo sebua, so gama-gama nifazökhi moroi ba ganaʼa ba firö, so nifazökhi moroi ba geu hegöi tambu laʼuri. So zabölö moguna,* ba so zambö moguna.*
21 Na so zondröi gama-gama sambö moguna, tobali ia gama-gama soguna, teʼamoniʼö, moguna khö zokhö yaʼia, ba laʼogunaʼö ba ngawalö halöwö si sökhi.
22 Tobali, erogö wangisö zi bohou ebua, gohi zindruhu, famati, faʼomasi, faʼatulö, si fao ba niha sohau-hau tödö soʼangaröfili Lowalangi.
23 Simanö göi, erogö wabuʼa-buʼasa si lö guna ba si lö eluaha,+ börö me öʼila wa tobali börö waʼudusa daʼö.
24 Lö moguna faʼudu genoni Lowalangi, hizaʼi ihaogö-haogö ba niha fefu,+ atua-tua ia ba wamahaʼö, lö isulöni zi lö sökhi,+
25 ba no ihaogö-haogö ba niha sabeʼe tandro,+ maʼatö itehegö Lowalangi lafalalini gera-erara enaʼö laʼokhögö waʼaboto ba dödö si tefaudu sanandrösa ba zindruhu,+
26 ba mangesa dödöra mangawuli, laheta ira moroi ba dandrawa Gafökha andrö, si no mamaʼala yaʼira ba wamalua ohitö dödönia.+
Nisura ba gahe zura
^ Faigi Geluaha Ngawua Wehede.
^ Mazui te ”ba halöwö sero maʼökhö”.
^ Sin.: ”Haogö wamaduhuʼö khöra”.
^ Mazui ”ifakiko; ifaelungu”.
^ Sin.: ”tefolakhömi”.
^ Sin.: ”So zambö tefolakhömi”.
