Sura Yohane si Mendrua 1:1-13
1 Moroi khö zatua si no alawa döfi,* khö dalifusö ira alawe si no mutuyu hegöi khö ndraononia, niʼomasiʼögu. Ba tenga ha yaʼo, fefu niha saboto ba dödö sindruhu laʼomasiʼö göi ami,
2 börö me ba dödöda so zindruhu ba lö tebulö daʼö sagötö faʼara.
3 Tatema dania waʼasökhi dödö sebua,* faʼahakhö dödö, ba faʼatulö moroi khö Namada Lowalangi, ba moroi khö Nononia Yesu Keriso, ba tasöndra zindruhu hegöi faʼomasi.
4 Omuso sibai dödögu me uʼila so ösa ndraonomö sanörö lala sindruhu+ moloʼö oroisa nitemada khö Nama.
5 Iadaʼa, uʼandrö khöu talifusöma alawe enaʼö faoma taʼomasiʼö nawöda. Nisuragu andre tenga oroisa si bohou, hizaʼi oroisa si no irai tatema me mböröta.+
6 Fangomasiʼö eluahania lö taböhöli woloʼö oroisania.+ Simane nirongomö iʼotarai wamobörö, oroisania yaʼia daʼö böi böhöli wamalua faʼomasi.
7 Ato zi falimo ba gulidanö+ si lö mamaduhuʼö wa no möi Yesu Keriso ba gulidanö tobali ia niha.+ Si falimo ira ba si faʼudu khö Keriso.+
8 Miʼangelama, böi tobali zaya-zaya gölö waʼerege dödöma ba khömi enaʼö moʼahonoa luo nitemami.+
9 Niha sanawö famahaʼö Keriso ba si lö moloʼö famahaʼönia andrö, lö omasi Lowalangi.+ Niha si lö tebulö ba woloʼö famahaʼönia, daʼö zomasi Nama hegöi Ono.+
10 Na so zi tohare ba solohe famahaʼö si faböʼö, böi mitema ia ba nomomi+ ba böi miʼowai ia.
11 Niha sangowai yaʼia eluahania no fao ia ba waʼalösökhi niha andrö.
12 Oya zomasido usura khömi, hizaʼi lö omasido usura ba garate faoma tawa. Omasido falukha khömi ba fahuhuo ita enaʼö sindruhu-ndruhu omuso dödömi.
13 Laʼowai ndraʼugö ono dalifusöu alawe si no mutuyu andrö.
