3 Moze 1:1-17
-
Sumange nitunu (1-17)
1 Moroi bakha ba nose waʼowulo,+ mohede Yehowa khö Moze imane,
2 ”Fatunö ba ndraono Gizaraʼeli, ’Na omasi ami miʼohe gurifö si tobali sumange khö Yehowa, miʼohe zawi, biri-biri mazui nambi.+
3 ”’Na mibeʼe zawi tobali sumange nitunu, mibeʼe zawi si matua si lö fökhö.+ Böi abua gölömi wolohe yaʼia+ föna Yehowa ba mbawandruhö nose waʼowulo.
4 Mitufa tangami högö gurifö nibaliʼö sumange nitunu andrö enaʼö tola mutema ia tobali sumange fangatulö khömi.
5 ”’Ba mitaba zawi sawuyu-wuyu andrö föna Yehowa. Iraono Gaʼaroni si no tobali ere+ zameʼe do zawi andrö tobali sumange ba latefeʼö ba zi fasui naha wanunu sumange,+ si so ba mbawandruhö nose waʼowulo.
6 Miboʼa guli gurifö si tobali sumange andrö ba mitatawi.+
7 Ba lafewuaʼö galitö iraono Gaʼaroni ba naha wanunu sumange+ ba labeʼe geu ba detenia.
8 Yaʼira zamaʼoli nagole zumange si no mutatawi andrö,+ lafaogö högö hegöi tawö* ba dete hola-hola galitö ba naha wanunu sumange.
9 Musasai ba nidanö mbetuʼania awö gahe. Latunu daʼö fefu ira ere ba dete naha wanunu sumange enaʼö numalö miyawa zimbo. Daʼö zumange nitunu, nitunu ba galitö. Hua zumange andrö möi fangomuso dödö Yehowa.+
10 ”’Na mibeʼe mbiri-biri sawuyu-wuyu mazui nambi tobali sumange nitunu,+ mibeʼe zi matua si lö fökhö.+
11 Mitaba daʼö tanö yöu naha wanunu sumange, föna Yehowa. Aefa daʼö, latefeʼö ndronia ba zi fasui naha wanunu sumange iraono Gaʼaroni si no tobali ere.+
12 Enaʼö no mutatawi gurifö daʼö, ba ere dania zamaʼoli nagolenia ba galitö lafaogö högö hegöi tawö* ba dete hola-hola galitö ba naha wanunu sumange.
13 Musasai ba nidanö mbetuʼania awö gahe. Ba labeʼe fefu daʼö ira ere tobali sumange, aefa daʼö latunu ba dete naha wanunu sumange enaʼö numalö miyawa zimbo. Daʼö zumange nitunu, nitunu ba galitö. Hua zumange andrö möi fangomuso dödö Yehowa.
14 ”’Hizaʼi, na mibeʼe wofo tobali sumange nitunu khö Yehowa, mibeʼe marafadi mazui fune.+
15 Ibeʼe dania daʼö ere tobali sumange ba naha wanunu sumange. Itaba mbagi, aefa daʼö itunu ba naha wanunu sumange, hizaʼi iduwagö ndro wofo daʼö ba zinga naha wanunu sumange.
16 Iheta mbu awö horokina, ba mutiboʼö tanö ba gatumbukha naha wanunu sumange, yaʼia daʼö naha waniboʼö awu.*+
17 Mubagi dua wanila fofo daʼö ba gotalua gafinia hizaʼi tebai mufaefa. Itunu daʼö ere ba hola-hola galitö ba naha wanunu sumange enaʼö numalö miyawa zimbo. Daʼö zumange nitunu, nitunu ba galitö. Hua zumange andrö möi fangomuso dödö Yehowa.
Nisura ba gahe zura
^ Mazui ”tawö si so ba zi fasui bua”.
^ Mazui ”tawö si so ba zi fasui bua”.
^ Mazui ”awu sotawö”, yaʼia daʼö awu si no mufaruka ba dawö gurifö nibeʼe sumange.
