3 Moze 10:1-20
10 Aefa daʼö, darua nono Gaʼaroni yaʼia daʼö Nadabi ba Abihu,+ lahalö naha mbo galitö, labeʼe mbo galitö, ba latunu zumange somuhua.+ Labeʼe khö Yehowa zumange si lö tefaudu moloʼö oroisa+ hewaʼae lö niwaʼö khöra.
2 Börö daʼö, iʼasogö galitö Yehowa si manga yaʼira maʼadarua,+ irege mate ira föna Yehowa.+
3 Imane Moze khö Gaʼaroni, ”No iwaʼö Yehowa, ’Niha sahatö ba zingagu tebai olifu ia wa yaʼodo andre niʼamoniʼö,+ ba fefu soi daʼö enaʼö lafolakhömi ndraʼo.’” Lö hede-hede Gaʼaroni.
4 Imane Moze khö Mizaeli ba Elisafa, ono matua khö Gusieli,+ tana nama Gaʼaroni, ”Mifazawa mboto dalifusömi andrö moroi ba golayama niʼamoniʼö ba miʼohe baero nose.”
5 Ba lafazawa mboto zi mate si darua andrö, si no mamake baru gere, ba laʼohe baero nose simane niwaʼö Moze.
6 Ba imane Moze khö Gaʼaroni, Eleazari hegöi khö Gitamari, yaʼia daʼö ono Gaʼaroni tanö böʼö, ”Miguti mbumi ba böi misika nukhami+ faböi mate ami ba lö mofönu Lowalangi ba nono mbanua sato. Ba abu dödö ndra talifusömi iraono Gizaraʼeli börö waʼamate niha nibunu Yehowa ba galitö.
7 Böi miheta ami ba zinga mbawandruhö nose waʼowulo faböi mate ami, börö me no tebayoini högömi faoma fanikha niʼamoniʼö* moroi khö Yehowa.”+ Ba laʼoʼö niwaʼö Moze.
8 Lö ara, fahuhuo Yehowa khö Gaʼaroni,
9 ”Fatua lö möiʼö ba nose waʼowulo, tebai öbadu nagu ba simanö göi ndraonou matua, mazui ngawalö duo tanö böʼö+ faböi mate ami. Daʼa gamakhoita si lö tebulö mifalua ofeta ba ngaʼötömi.
10 Wa mubeʼe gamakhoita daʼö enaʼö oroma gamaehuta niʼamoniʼö moroi ba zi lö muʼamoniʼö, ba si raʼiö moroi ba zi lö raʼiö,+
11 ba wamahaʼö fefu amakhoita Yehowa ba ndraono Gizaraʼeli nifaʼemania khö Moze.”+
12 Ba imane Moze khö Gaʼaroni hegöi khö ndraononia matua si toröi nasa yaʼia daʼö Eleazari faoma Itamari, ”Mihalö zi toröi zumange niʼa nitunu ba galitö khö Yehowa. Mifazökhi daʼö tobali roti si lö mufaruka ragi ba miʼa ba zinga naha wanunu sumange,+ börö me fondrege niʼamoniʼö roti daʼö.+
13 Moroi ba zumange nitunu ba galitö khö Yehowa, daʼö zi tobali tana khömi awö ngaʼötömi. Daʼö mbörö wa ba nahia niʼamoniʼö miʼa ia.+ Daʼö niwaʼö Lowalangi khögu.
14 Moroi ba zumange fangatulö nibeʼe ndraono Gizaraʼeli, tana khömi hegöi ngaʼötömi döla doto zumange nifazaule+ awö gahe, yaʼia daʼö tana niʼamoniʼö. Yaʼami, onomi matua, ba onomi alawe,+ miʼa daʼö fefu ba zi sambua nahia si lö raʼiö.
15 Töla doto zumange nifazaule awö gahe, yaʼia daʼö tana niʼamoniʼö, fabaya tawö moroi ba zumange nitunu ba galitö, miʼohe daʼö enaʼö mufazaule föna Yehowa tobali sumange nifazaule. Töla doto awö gahe andrö zi tobali tana khömi hegöi ngaʼötömi sagötö faʼara,+ simane niwaʼö Yehowa.”
16 Aefa daʼö, möi Moze wangalui nambi si tobali sumange fameta horö,+ hizaʼi no ahori akhozi fefu. Ba mofönu Moze khö Geleazari simanö göi khö Gitamari ono Gaʼaroni si toröi nasa. Imane,
17 ”Hana wa lö miʼa nagole zumange fameta horö andrö?+ Nagole daʼö no fondrege niʼamoniʼö, ba no ibeʼe khömi Lowalangi enaʼö tola miluʼi horö nono mbanua andre ba miʼatulöʼö ira föna Yehowa.
18 Tebai miʼohe ndro zumange andrö bakha ba nahia niʼamoniʼö.+ Andrö wa sinangea miʼa nagole daʼö ba naha si lö raʼiö, simane niwaʼö Lowalangi khögu.”
19 Imane Aʼaroni khö Moze, ”No labeʼe zumange fameta horö awö zumange nitunu föna Yehowa.+ Hizaʼi, tebai uʼa nagole zumange fameta horö andrö börö ngawalö zi lö sökhi salua khögu maʼökhö. Hadia omuso dödö Yehowa na uʼa nagole daʼö?”
20 Me no irongo daʼö, awena aboto ba dödö Moze.
Nisura ba gahe zura
^ Mazui ”fanikha famataro”. Sin.: ”fanikha famayoini”.
