3 Moze 11:1-47
-
Urifö salakha hegöi si löʼö (1-47)
11 Imane zui Yehowa khö Moze hegöi Aʼaroni,
2 ”Fatunö ba ndraono Gizaraʼeli, ’Urifö si so ba dete danö si tola miʼa+ yaʼia daʼö
3 fefu zi öfa ahe samomendrua femanga göra, si no fabali saʼa ba moʼotalua.
4 ”’Hizaʼi, tebai miʼa gurifö na ha ifomendrua wemanga gönia mazui ha si no fabali saʼa. Si oföna ondra, börö me lö si fabali zaʼa hewaʼae na ifomendrua wemanga gönia. Börö daʼö, tobali ia urifö salakha.+
5 Simanö göi hiraks,*+ börö me lö si fabali zaʼa hewaʼae na ifomendrua wemanga gönia. Börö daʼö, tobali ia urifö salakha.
6 Simanö göi kelinci,* börö me lö si fabali zaʼa hewaʼae na ifomendrua wemanga gönia. Börö daʼö, tobali ia urifö salakha.
7 Simanö göi mbawi,+ hewaʼae na fabali zaʼa ba moʼotalua, hizaʼi lö ifomendrua wemanga gönia. Börö daʼö, tobali ia urifö salakha.
8 Tebai miʼa nagolenia mazui mibabaya gamatelania. Fefu daʼö oi salakha.+
9 ”’Urifö sauri ba nidanö si tola miʼa, he ba nasi mazui ba nungo nidanö yaʼia daʼö sohuna-huna ba sofere-fere.+
10 Hizaʼi, urifö sauri ba nasi hegöi ba nungo nidanö, he si gide-ide* hegöi ngawalö gurifö sauri ba nidanö, si lö mohuna-huna ba si lö fere-fere, tobali salakha daʼö.
11 Fefu daʼö, oi salakha. Tebai miʼa nagolenia,+ ba tobali salakha gamatelania.
12 Fefu zauri ba nidanö si lö huna-huna ba si lö fere-fere, tobali salakha daʼö.
13 ”’Daʼa gurifö si hombo si tebai miʼa ba salakha: moyo,+ moyo nasi, fofo saitö si manga amatela,+
14 moyo soyo hegöi ngawalö moyo saitö,
15 fefu ngawalö gaga,
16 fofo ondra, lamuhu, katawaena, fefu ngawalö wötö,
17 lamuhu side-ide, bebe laza, lamuhu sanau talinga,
18 surati, fofo pelikan, fofo si manga amatela,
19 tumbao, fefu ngawalö wofo kotoli, fofo hupo hegöi bögi.
20 Fefu ngawalö gurifö si gide-ide si so afi si öfa ahe, oi tobali salakha daʼö.
21 ”’Moroi ba gotalua gurifö si gide-ide si so afi si öfa ahe, si tola miʼa ha si so ahe sanau ba wanaoka ba dete danö,
22 yaʼia daʼö fefu ngawalö mbogo-bogo, ngawalö gao,+ ba larewe.
23 Fefu ngawalö gurifö si gide-ide si so afi si öfa ahe tanö böʼö, tobali salakha daʼö.
24 Tola raʼiö ami ibeʼe urifö andrö. Niha sombambaya amatela gurifö daʼö raʼiö ia ofeta tanö owi.+
25 Na göna mbaru zi samösa niha gamatela gurifö side-ide andrö ba lö tola löʼö isasai.+ Raʼiö ia ofeta aekhu luo.
26 ”’Fefu gurifö si so ba dete danö si no fabali saʼa hizaʼi lö moʼotalua ba lö ifomendrua kali wemanga gönia, tobali urifö salakha daʼö. Dozi niha sombambaya yaʼia raʼiö.+
27 Moroi ba gotalua gurifö si öfa ahe, fefu gurifö sanguhundragö tanö faoma laluʼa kahenia, tobali urifö salakha daʼö. Niha sombambaya amatela gurifö daʼö raʼiö ia ofeta aekhu luo.
28 Niha samazawa amatela gurifö andrö, lö tola löʼö isasai mbarunia,+ ba raʼiö ia ofeta aekhu luo.+ Tobali salakha fefu gurifö daʼö.
29 ”’Tobali urifö salakha fefu gurifö si so ba dete danö sorudu ba nawönia: teʼu narö danö, teʼu,+ ba fefu mbayakomo,
30 öʼö, bayakomo sebua, salamander, bayakomo gawu hegöi loa.
31 Fefu gurifö daʼö tobali salakha.+ Niha sombambaya amatela gurifö daʼö raʼiö ia ofeta aekhu luo.+
32 ”’Taʼunö fefu gofu hadia manö zi göna ba gamatela gurifö, he baru, nukha goni, gama-gama nifazökhi moroi ba geu mazui moroi ba guli gurifö. Gofu hadia gama-gama daʼö, lö tola löʼö muʼungu ba nidanö. Raʼiö daʼö ofeta aekhu luo, awena ifuli dania lö raʼiö ia.
33 Na aekhu gamatelania ba mbowoa tanö, lö tola löʼö miboto mbowoa daʼö. Raʼiö fefu zi so ba mbowoa andrö.+
34 Taʼunö fefu gö si göna idanö moroi ba mbowoa daʼö, simanö göi nibadu si so ba mbowoa.
35 Taʼunö gofu hadia manö zi göna ba gamatela gurifö daʼö, he naha wamogö kue mazui kompor side-ide, lö tola löʼö mirasa. Fefu daʼö oi raʼiö ba lö tebulö waʼaraʼiönia.
36 Na aekhu gamatela gurifö daʼö ba gumbu nidanö mazui ba mbaʼa, lö raʼiö nidanönia. Hizaʼi, niha sombambaya amatela daʼö, tobali raʼiö.
37 Na aekhu gamatela gurifö daʼö ba danömö si lö mutaru, lö raʼiö danömö andrö.
38 Hizaʼi, na aekhu gamatela gurifö daʼö ba danömö si no mubasöi, raʼiö danömö andrö.
39 ”’Na so gurifö si so ba dete danö si no mate, yaʼia daʼö urifö si tola muʼa, niha sombambaya amatela gurifö daʼö raʼiö ia ofeta aekhu luo.+
40 Na so zi manga amatela gurifö daʼö, lö tola löʼö isasai mbarunia ba raʼiö ia ofeta aekhu luo.+ Niha samazawa amatela gurifö daʼö, hasambalö isasai mbarunia ba raʼiö ia ofeta aekhu luo.
41 Miʼogorofi fefu gurifö side-ide salakha.+ Tebai miʼa daʼö fefu.
42 Tebai miʼa gurifö side-ide soʼananaʼö talunia, si öfa ahe mazui soya ahe börö me niʼogorofi fefu gurifö daʼö.+
43 Böi tobali ami niʼogorofi ha börö gurifö side-ide andrö. Böi taʼunö ami mazui raʼiö börö daʼö fefu.+
44 Börö me yaʼo Yehowa Lowalangimi,+ mihaogö ba miʼamoniʼö ami,+ me no niʼamoniʼö ndraʼo.+ Andrö böi raʼiö ami börö gurifö daʼö fefu.
45 Yaʼo Yehowa zangeheta yaʼami moroi ba danö Miserai ba wangoromaʼö wa yaʼo Lowalangimi.+ Miʼamoniʼö ami,+ me no niʼamoniʼö ndraʼo.+
46 ”’Daʼö goroisa sanandrösa ba gurifö si so ba dete danö, si hombo, sauri ba nidanö ba urifö side-ide,
47 enaʼö miʼila mifaehusi hezo zi raʼiö ba si lö raʼiö, ba hezo zi tola muʼa ba si tebai muʼa.’”+
Nisura ba gahe zura
^ Hulö marmut sebua, lö hadöi iʼo, ba toröi ia ba gotalua gara.
^ Sin.: ”kawelu”. Hulö simane kelinci, hizaʼi abölö ebua nasa gawelu. Anau dalinga hegöi ahenia.
^ Te eluahania urifö si gide-ide sauri ba zi sambua ngawawa.
