3 Moze 12:1-8
-
Fangamoniʼö na no aefa moʼono (1-8)
12 Imane zui Yehowa khö Moze,
2 ”Fatunö ba ndraono Gizaraʼeli, ’Na manabina zi samösa ira alawe ba tumbu khönia nono matua, raʼiö ia sagötö zi fitu hari, simane faʼaraʼiönia me afökhö dalunia.+
3 Ba ngaluo si walu, lö tola löʼö isuna nononia andrö.+
4 Moguna iʼamoniʼö ia ira alawe daʼö moroi ba ndro sagötö zi 33 hari tö. Fatua lö awai iʼamoniʼö ia, tebai ibabaya gofu hadia niʼamoniʼö ba tebai möi ia ba nahia niʼamoniʼö.
5 ”’Ba na tumbu khönia nono alawe, raʼiö ia sagötö zi 14 hari simane faʼaraʼiönia me afökhö dalunia. Aefa daʼö, lö tola löʼö iʼamoniʼö ia moroi ba ndro sagötö zi 66 hari tö.
6 Na no awai iʼamoniʼö ia börö waʼatumbu nononia alawe mazui ononia matua, lö tola löʼö iʼohe sageu mbiri-biri si matua sawuyu-wuyu si döfi faʼebua mazui ambö tobali sumange nitunu.+ Iʼohe göi sambua wune mazui marafadi si tobali sumange fameta horö. Ibeʼe fefu daʼö khö ndra ere föna mbawandruhö nose waʼowulo.
7 Ere dania zameʼe daʼö fefu khö Yehowa tobali sumange ba sangatulöʼö yaʼia, ba lö saʼae raʼiö ia ba ndronia andrö. Simane daʼö goroisa khö ndra alawe si tumbu ono matua mazui ono alawe.
8 Na lö sagu khönia wameʼe si sageu mbiri-biri, lö tola löʼö iʼohe dombua marafadi mazui dombua wune.+ Sambua marafadi nibaliʼö sumange nitunu ba sambua tö tobali sumange fameta horö. Ere dania zangatulöʼö yaʼia ba lö raʼiö ia saʼae.’”
