3 Moze 13:1-59
13 Aefa daʼö, imane Yehowa khö Moze hegöi Aʼaroni,
2 ”Na so zobuʼu ba guli zi samösa niha, gimö-gimö mazui belua si tola tobali bou auri,*+ laʼohe niha daʼö khö Gere Aʼaroni mazui fazamösa moroi ba gotalua gere nono Gaʼaroni.+
3 Ifareso ere hadia zanandrawa ba gulinia. Na izumaigö afusi mbu fetahö laheto andrö ba abakha zanandrawa, tenga ha ba dete guli, lafotöi daʼö bou auri. Na iʼila daʼö ere, hasambalö ifatunö ba niha sato wa raʼiö niha daʼö.
4 Hizaʼi, na so zafusi ba gulinia ba lö afusi mbunia, ha ba dete guli so zanandrawa, ifasambua niha daʼö ere sagötö zi fitu hari.+
5 Aefa daʼö, ifuli zui ifareso ia ere ba ngaluo si fitu. Na ha ndrege daʼö zanandrawa andrö ba lö manana ba gulinia tanö böʼö, ifuli zui ifasambua ia ere fitu hari tö.
6 ”Ifuli zui ifareso ia ere ba ngaluo si fitu. Na ibörögö alösö gulinia sanandrawa andrö ba lö manana ba gulinia tanö böʼö, eluahania daʼö ha gimö-gimö. Hasambalö ifatunö ere ba niha sato wa lö raʼiö niha daʼö.+ Isasai mbarunia ba lö raʼiö ia saʼae.
7 Hizaʼi, na ifuli manandrawa gimö-gimönia andrö me no awai ifatunö ere wa lö saʼae raʼiö ia, lö tola löʼö möi ia ifalukhaisi gere.
8 Ifareso zui ia ere ba na manandrawa daʼö ba gulinia eluahania bou auri daʼö.+ Hasambalö ifatunö ere wa raʼiö niha daʼö.
9 ”Na so niha si göna bou auri hasambalö laʼohe ia khö gere,
10 ba ere zamareso yaʼia.+ Na so zafusi si no obuʼu ba gulinia ba daʼö mbörö wa afusi mbunia, ba so zi no agabökha+ ba gulinia,
11 fökhö bou auri sabölö-bölö daʼö. Hasambalö ifatunö ere ba niha sato wa raʼiö niha daʼö. Lö moguna ifasambua niha daʼö+ ere ba wamareso samuza tö, börö me no oroma wa raʼiö ia.
12 Na iʼila ere wa no iʼanöröi guli niha daʼö bou auri ba no ibalugö ia maʼasageu iʼotarai högö numalö ba duturu kahe,
13 ba no ifareso ia ere wa sageu manö mbotonia afönu bou auri ba fefu gulinia afusi, moguna ifatunö ere wa lö göna niha böʼö wökhönia andrö.* Börö me no ahori afusi gulinia fefu, lö raʼiö niha daʼö.
14 Tobali ia si raʼiö na so zagabökha ba gulinia.
15 Na iʼila ere so zokho si no agabökha, hasambalö ifatunö wa raʼiö niha daʼö.+ Raʼiö zokho daʼö, ba bou auri daʼö.+
16 Ba na afusi zokho si no agabökha andrö, hasambalö möi niha daʼö wamalukhaisi ere.
17 Hasambalö ifareso ia ere.+ Na ifuli afusi gulinia sanandrawa andrö, ifuli zui ifatunö ere wa lö raʼiö niha daʼö.
18 ”Na so waosa ba zi samösa niha, ba no döhö waosa daʼö,
19 hizaʼi na kalua zobuʼu safusi mazui sobelua soroyo-royo, moguna iforomaʼö ia khö gere.
20 Hasambalö ifareso ia ere.+ Na izumaigö afusi mbu ba abakha zanandrawa, tenga ha ba dete guli, eluahania bou auri daʼö si tumbu ba laheto waosa. Hasambalö ifatunö ere wa raʼiö niha daʼö.
21 Ba na iʼila ere wa lö hadöi bu safusi, ha ba dete guli so zanandrawa, ba no ahoe laʼa-laʼania, ifasambua niha daʼö ere sagötö zi fitu hari.+
22 Aefa daʼö, na itugu tedou zanandrawa andrö, hasambalö ifatunö ere wa raʼiö niha daʼö. Bou auri daʼö.
23 Hizaʼi, na lö tedou zanandrawa andrö, eluahania daʼö laheto waosa. Hasambalö ifatunö ere wa lö raʼiö niha daʼö.+
24 ”Na so zakhozi uli, ba gamaudu zokho si lö döhö andrö kalua zafusi mazui sobelua soroyo-royo,
25 hasambalö ifareso ia ere. Na izumaigö afusi mbu fetahö laheto andrö ba abakha zanandrawa, tenga ha ba dete guli, eluahania bou auri daʼö si tumbu ba laheto zakhozi. No göna niha daʼö bou auri ba hasambalö ifatunö ere wa raʼiö niha daʼö.
26 Hizaʼi, na iʼila ere wa lö hadöi bu safusi ba laheto daʼö, ha ba dete guli so zanandrawa, ba no ahoe laʼa-laʼania, ifasambua niha daʼö ere sagötö zi fitu hari.+
27 Ba ngaluo si fitu, hasambalö ifareso ia ere. Na manandrawa daʼö ba guli tanö böʼö, hasambalö ifatunö ere wa raʼiö niha daʼö. Bou auri daʼö.
28 Hizaʼi, na lö manandrawa zakhozi andrö ba gulinia, ba no ahoe laʼa-laʼania, eluahania laheto zakhozi daʼö börö waʼagambu. Hasambalö ifatunö ere wa lö raʼiö niha daʼö, börö me ha laheto zakhozi daʼö.
29 ”Na so zanandrawa ba guli högö mazui ba zimbi zi samösa ira matua hegöi ira alawe,
30 hasambalö ifareso ia ere.+ Na ba laheto andrö aʼusö maʼifu mbu mazui ba zimbi, ba abakha zanandrawa, tenga ha ba dete guli, eluahania daʼö sanandrawa ba guli högö mazui ba zimbi. Hasambalö ifatunö ere wa raʼiö niha daʼö, börö me bou auri daʼö ba guli högö mazui ba zimbi.
31 Hizaʼi, na iʼila ere wa sanandrawa andrö ha ba dete guli, ba lö hadöi bu mazui gambi si no aitö ba daʼö, ifasambua niha daʼö ere sagötö zi fitu hari.+
32 Ba ngaluo si fitu, hasambalö ifareso ia ere. Na lö manana zanandrawa andrö ba lö hadöi bu mazui gambi si no aʼusö, ba ha ba dete guli so zanandrawa andrö,
33 hasambalö latöwö ia. Hizaʼi, tebai latöwö gamaudu zanandrawa. Ifasambua niha daʼö ere sagötö zi fitu hari.
34 ”Ba ngaluo si fitu, ifuli ifareso ia ere. Na lö manana zanandrawa andrö ba guli högö mazui ba zimbinia, ba ha ba dete guli so zanandrawa, hasambalö ifatunö ere wa lö raʼiö niha daʼö. Moguna isasai mbarunia ba lö raʼiö ia.
35 Na no lafatunö ira ere wa lö raʼiö niha daʼö, hizaʼi awena oroma wa manana zanandrawa andrö,
36 hasambalö ifareso ia ere. Na manana zanandrawa andrö, eluahania raʼiö ia. Lö moguna saʼae ifuli ifareso ere hadia aʼusö mbu mazui gambi niha daʼö.
37 Na no ifareso ere wa lö manana zanandrawa andrö, ba tumbu ba daʼö mbu mazui gambi saitö, eluahania no döhö zanandrawa andrö. Lö raʼiö ia, ba hasambalö ifatunö ere wa lö raʼiö niha daʼö.+
38 ”Na so mbelua ba zi samösa ira matua mazui ira alawe,
39 hasambalö ifareso ia ere.+ Na ahoe laʼa-laʼa mbelua andrö, eluahania daʼö ha ewaö si lö möi famaʼala ba guli. Lö raʼiö niha daʼö.
40 ”Na so ndra matua sahori bu högö lua-luania batule ia, lö raʼiö niha daʼö.
41 Na ahori mbu högönia tanö föna ba tobali batule ia, lö raʼiö ia.
42 Hizaʼi, na so zafusi soroyo-royo ba högönia si batule andrö mazui ba gamaudu högönia tanö föna, bou auri daʼö ba högönia mazui ba gamaudu högönia tanö föna.
43 Hasambalö ifareso ia ere. Na iʼila ere wa so zokho safusi soroyo-royo ba högönia si batule, ba hulö mbou auri na mufaigi,
44 eluahania no göna ia bou auri ba raʼiö ia. Börö me so mbou auri ba högönia, moguna ifatunö ere wa raʼiö ia.
45 Niha si göna bou auri, nukha sasika ifake, tebai isukhu mbunia, ba lö tola löʼö ibalugö mbawania weʼao imane, ’Raʼiö! Raʼiö!’
46 Raʼiö ia sagötö göna khönia mbou auri. Mufandröndröu ia ba niha sato börö me raʼiö ia, labeʼe ia baero nose.+
47 ”Na falemba mbou auri ba nukha nifazökhi moroi ba mbu mbiri-biri mazui moroi ba nukha si sökhi,
48 mazui ba rozi nukha nisoso moroi ba mbu mbiri-biri hegöi nukha si sökhi, mazui ba guli gurifö ba fefu gama-gama nifazökhi moroi ba guli gurifö,
49 ba tobali owugeʼe aruzö-ruzö mazui oroyo-royo mbaru daʼö börö mbou auri, simanö göi guli gurifö, rozi nukha, mazui gofu hadia gama-gama nifazökhi moroi ba guli gurifö, moguna laforomaʼö khö ndra ere nukha daʼö börö me so misa mbou auri.
50 Ifareso ere mbou auri daʼö, ba fefu gama-gama si göna bou auri ifandröndröu ba niha sagötö zi fitu hari.+
51 Na ifareso ere ba ngaluo si fitu ba iʼila wa no ahori göna ba mbaru, rozi nukha, mazui ba guli gurifö (gofu hadia gama-gama nifazökhi moroi ba guli gurifö), bou auri samuʼi daʼö ba raʼiö gama-gama andrö.+
52 Itunu ere gofu hadia manö gama-gama nifazökhi moroi ba guli gurifö, rozi nukha nisoso moroi ba mbu mbiri-biri hegöi nukha si sökhi, baru mazui hadia manö gama-gama si göna bou auri andrö. Hasambalö mutunu gama-gama daʼö börö me no göna bou auri samuʼi.
53 ”Hizaʼi, na iʼila ere wa bou auri andrö lö itöröi mbaru, rozi nukha, mazui gofu hadia manö gama-gama nifazökhi moroi ba guli gurifö
54 iwaʼö ere enaʼö lasasai fefu gama-gama si no göna bou auri andrö ba lafandröndröu ba niha sagötö zi fitu hari tö.
55 Me no lasasai gama-gama daʼö, ifuli zui ifareso ere. Na lö tebulö mbou auri daʼö hewaʼae lö monönö waʼebua, raʼiö gama-gama daʼö. Hasambalö mutunu börö me no ifakiko ia bou auri, he tanö bakha hegöi tanö baero.
56 ”Na no lahaogö wanasai ba iʼila ere wa no ahoe laʼa-laʼa mbou auri andrö, isika ere mbaru si no göna bou auri, moroi ba guli gurifö mazui rozi nukha.
57 Hizaʼi, na ifuli tumbu mbou auri ba mbaru, rozi nukha, mazui gama-gama nifazökhi moroi ba guli gurifö, eluahania no tedou waʼebua mbou auri andrö. Gofu hadia gama-gamania, hasambalö mitunu.+
58 Na no musasai ba aheta mbou auri andrö ba mbaru daʼö, ba rozi nukha, mazui gofu hadia manö gama-gama nifazökhi moroi ba guli gurifö, lafuli lasasai gama-gama daʼö ba zi mendrua kali. Awena dania lö raʼiö saʼae gama-gama daʼö.
59 ”Daʼö goroisa sanandrösa ba mbou auri si so ba mbaru nifazökhi moroi ba mbu mbiri-biri mazui nukha si sökhi, rozi nukha, mazui gofu hadia manö gama-gama nifazökhi moroi ba guli gurifö, enaʼö aboto ba dödö gere hadia gama-gama si raʼiö mazui si lö raʼiö sinangea mufatunö ba niha sato.”
Nisura ba gahe zura
^ Ba li Heberaiʼo, ”bou auri” eluahania ngawalö wökhö guli si tola göna ba niha. Tola göi daʼö geluahania kiwo si so ba nukha hegöi ba nomo.
^ Mazui ”lö raʼiö niha daʼö”.
