3 Moze 14:1-57
14 Ifuli zui fahuhuo Yehowa khö Moze,
2 ”Daʼa goroisa sinangea iʼoʼö niha si göna bou auri na iʼondrasi gere, ba ngaluo me mutatugöi wa lö saʼae raʼiö ia.+
3 Möi gere baero nose ba wamareso yaʼia. Na no döhö mbou aurinia andrö,
4 iwaʼö khönia ere enaʼö iʼohe dombua wofo si lö alakha, eu eresi, nukha soyo,* ba tanömö hiso.* Muʼogunaʼö daʼö fefu ba wangamoniʼö yaʼia.+
5 Iwaʼö ere enaʼö lataba wofo si sambua ba dete mbowoa tanö si no lafoʼösi idanö sohahau.
6 Aefa daʼö, ihalö sambua tö wofo sauri, eu eresi, nukha soyo, ba tanömö hiso,* ba iʼungugö fefu daʼö ba ndro wofo nitaba no mege.
7 Itefeʼö ere ndro daʼö fitu kali ba niha sangamoniʼö yaʼia moroi ba mbou auri. Ifatunö ere wa lö saʼae raʼiö niha daʼö, ba ifoloi wofo sauri andrö ba mbenua.+
8 ”Niha sangamoniʼö yaʼia andrö lö tola löʼö isasai mbarunia, itöwö fefu mbunia sageu yaʼia, ba möi ia mondri. Awena saʼae lö raʼiö ia ba tola möi ia bakha ba nose. Hizaʼi, baero nose toröi ia sagötö zi fitu hari.
9 Ba ngaluo si fitu, itöwö fefu mbunia, bu gambi awö mbu röngö-röngö. Na no ifalua daʼö, lö tola löʼö isasai mbarunia ba möi ia mondri. Awena saʼae lö raʼiö ia.
10 ”Ba ngaluo si walu, yamuhalö dua ngaʼeu mbiri-biri si matua sawuyu-wuyu ba sageu mbiri-biri si alawe+ si döfi faʼebua mazui ambö, ba si lö mofökhö. Ihalö göi 6,6 liter* hamo darigu si sökhi si no mufaruka fanikha tobali sumange niʼa*+ ba mato sambua niʼotölu liter* wanikha.+
11 Ere samatunö wa lö saʼae raʼiö ia, daʼö zolohe niha daʼö föna Yehowa ba fefu zumange andrö ba mbawandruhö nose waʼowulo.
12 Ihalö ere sageu mbiri-biri si matua sawuyu-wuyu tobali sumange fameta zala,+ ba mato sambua niʼotölu liter* wanikha. Lafazaule daʼö föna Yehowa tobali sumange nifazaule.+
13 Ere zanaba biri-biri si matua sawuyu-wuyu andrö ba nahia si toʼölö lataba zumange fameta horö+ yaʼia daʼö ba naha niʼamoniʼö. Sumange fameta zala andrö dana khö gere simane sumange fameta horö.+ Fondrege niʼamoniʼö daʼö.+
14 ”Ihalö ere maʼifu ndro gurifö nibaliʼö sumange fameta zala andrö. Ifagule ba dalinga kambölö niha samoni andrö, ba duru sebua ba dangania kambölö hegöi ba duturu kahe sebua kambölö.
15 Ifaduwa maʼifu wanikha daʼö+ ere ba laluʼa dangania kabera.
16 Aefa daʼö, iʼungugö durunia kambölö ba wanikha si so ba laluʼa dangania kabera. Itefeʼö maʼifu wanikha daʼö faoma turunia fitu kali föna Yehowa.
17 Na no awai daʼö, fanikha si so ba laluʼania andrö ifagule ba dalinga kambölö niha samoni andrö, ba duru sebua ba dangania kambölö hegöi ba duturu kahe sebua kambölö, börö me ba daʼö mege no ifagule ndro zumange fameta zala.
18 Fanikha si toröi ba laluʼania ifagule ba högö niha daʼö. Ifalua daʼö ere enaʼö atulö niha andrö föna Yehowa.+
19 ”Ere zameʼe urifö si tobali sumange fameta horö+ ba yaʼia zangatulöʼö niha daʼö. Aefa daʼö, itaba gurifö andrö tobali sumange nitunu.
20 Ba ibeʼe zumange nitunu ere hegöi sumange niʼa+ ba naha wanunu sumange. Yaʼia zangatulöʼö niha daʼö,+ ba awena saʼae lö raʼiö ia.+
21 ”Hizaʼi, na numana niha daʼö ba tebai ibeʼe zi no mutatugöi, yamuʼohe sageu mbiri-biri si matua sawuyu-wuyu tobali sumange fameta zala nifazaule, ba wangatulöʼö yaʼia. Iʼohe göi 2,2 liter* hamo darigu si sökhi nifaruka fanikha tobali sumange niʼa, mato sambua niʼotölu liter* wanikha,
22 ba dombua ngawua marafadi mazui fune, moloʼö si sagu khönia. Sambua wofo si tobali sumange fameta horö ba si sambua tö tobali sumange nitunu.+
23 Ba ngaluo si walu,+ iʼohe fefu daʼö khö gere ba mbawandruhö nose waʼowulo föna Yehowa, ba wotatugöi wa lö raʼiö ia saʼae.+
24 ”Ihalö ere mbiri-biri si matua sawuyu-wuyu tobali sumange fameta zala+ ba mato sambua niʼotölu liter* wanikha. Ifazaule daʼö föna Yehowa tobali sumange nifazaule.+
25 Aefa daʼö, itaba nono mbiri-biri si matua sawuyu-wuyu tobali sumange fameta zala. Ihalö ere maʼifu ndro mbiri-biri daʼö ba ifagule ba dalinga kambölö niha samoni andrö, ba duru sebua ba dangania kambölö hegöi ba duturu kahe sebua kambölö.+
26 Ifaduwa maʼifu wanikha daʼö ere ba laluʼa dangania kabera.+
27 Ba itefeʼö maʼifu wanikha si so ba laluʼa dangania kabera andrö faoma turunia kambölö fitu kali föna Yehowa.
28 Na no awai daʼö, fanikha si so ba laluʼania andrö ifagule ba dalinga kambölö niha samoni andrö, ba duru sebua ba dangania kambölö hegöi ba duturu kahe sebua kambölö, börö me ba daʼö mege no ifagule ndro zumange fameta zala.
29 Fanikha si toröi ba laluʼania ifagule ba högö niha daʼö. Ifalua daʼö ere enaʼö atulö niha andrö föna Yehowa.
30 ”Ihalö ere sambua marafadi mazui fune tobali sumange, moloʼö si sagu ba niha daʼö,+
31 yaʼia daʼö si tola ibeʼe, tobali sumange fameta horö+ ba si sambua tö tobali sumange nitunu. Ibeʼe fefu daʼö fao zumange niʼa, ba ere zangatulöʼö yaʼia föna Yehowa.+
32 ”Daʼö goroisa sinangea ifalua si samösa niha si göna bou auri, si tebai mameʼe si no mutatugöi, ba ginötö mufatunö wa lö raʼiö ia saʼae.”
33 Ba fahuhuo Yehowa khö Moze hegöi Aʼaroni,
34 ”Na möi dania ami ba danö Ganaʼana,+ tanö nibeʼegu khömi+ ba so ba daʼö nomo nitehegögu si göna bou auri,+
35 enaʼö möi zokhö omo daʼö ba wangombakha khö gere, ’So niʼilagu ba mbagolö nomogu. Hulö mbou auri.’
36 Iwaʼö ere enaʼö laheta fefu zi so ba nomo daʼö, awena dania möi gere wamareso. Enaʼö lö hadöi niha hegöi gama-gama ba nomo andrö fatua lö tohare gere. Na löʼö, ifatunö ere wa raʼiö fefu nösi nomo daʼö.
37 Na ifareso ba iʼila ba dowa nomo daʼö so zowugeʼe aruzö-ruzö mazui oroyo-royo, ba tenga ha baero zi göna, no irugi bakha,
38 möi baero gere iheta ia moroi ba nomo daʼö. Ihaogö wondruhö omo daʼö sagötö zi fitu hari.+
39 ”Awena zui ba ngaluo si fitu, ifuli möi gere ba wamareso. Na tedou waʼebua laheto andrö misa ba dowa,
40 iwaʼö ere enaʼö laheta gara si göna laheto andrö ba dowa ba latiboʼö baero mbanua, ba naha waniboʼö gama-gama si raʼiö.
41 Aefa daʼö, iwaʼö ba niha enaʼö laʼoʼoi fefu dowa tanö bakha ba nomo andrö. Simi si no laʼoʼoi moroi ba dowa andrö latiboʼö baero mbanua, ba naha waniboʼö gama-gama si raʼiö.
42 Ba lafuli labeʼe gara si bohou fogati gara si no latiboʼö. Lafalemba gara andrö faoma simi,* awena la-plester.
43 ”Na ifuli so zolaheto ba nomo daʼö me no laheta garania ba me no laʼoʼoi ba la-plester,
44 möi gere wamareso omo daʼö. Na tedou waʼebua laheto andrö ba nomo daʼö, eluahania bou auri samuʼi daʼö.+ Raʼiö nomo daʼö.
45 Ba iwaʼö ere enaʼö ladudugö nomo daʼö, yaʼia daʼö fefu garania, eu, plester hegöi simi ba dowa. Laʼohe gadudulania baero mbanua, ba naha waniboʼö gama-gama si raʼiö.+
46 Gofu haniha zi möi ba nomo daʼö me no muhaogö wondruhö,+ raʼiö niha daʼö ofeta aekhu luo.+
47 Gofu haniha zi mörö mazui si manga ba nomo daʼö, lö tola löʼö isasai mbarunia.
48 ”Hizaʼi, na ifareso nomo daʼö ere ba lö tedou waʼebua laheto andrö me no mu-plester, ifatunö ere wa lö raʼiö nomo daʼö börö me no taya lahetonia.
49 Ba wangamoniʼö omo daʼö,* yamuhalö dombua wofo, eu eresi, nukha soyo, ba tanömö hiso.*+
50 Itaba sambua wofo ba dete mbowoa tanö si no lafoʼösi idanö sohahau.
51 Ifuli zui ihalö sambua tö wofo sauri, eu eresi, tanömö hiso,* ba nukha soyo. Iʼungugö fefu ba ndro wofo si no mutaba. Itefeʼö göi fitu kali ndro daʼö ba gamaudu nomo andrö.+
52 Iʼamoniʼö nomo daʼö* faoma do wofo, idanö sohahau, fofo sauri, eu eresi, tanömö hiso,* ba nukha soyo.
53 Ifoloi wofo sauri andrö baero mbanua, ba mbenua sebolo, enaʼö teʼamoniʼö nomo daʼö* ba lö raʼiö saʼae.
54 ”Daʼö goroisa sanandrösa ba mbou auri, fökhö guli högö mazui simbi,+
55 bou auri ba mbaru+ mazui ba nomo,+
56 simanö göi sanandrösa ba zobuʼu ba guli zi samösa niha, gimö-gimö hegöi belua,+
57 ba wotatugöi si raʼiö ba si lö raʼiö.+ Daʼö goroisa sanandrösa ba mbou auri.”+
Nisura ba gahe zura
^ Mazui ”kirimisi”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Mazui ”sumange bua nowi”.
^ Mazui ”tambu laʼuri nifaruka”.
^ Sin.: ”Ba wangehao omo daʼö moroi ba horö”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Sin.: ”Iʼehao nomo daʼö moroi ba horö”.
^ Faigi Geluaha Ngawua Wehede.
^ Mazui ”ba wangatulöʼö omo daʼö”.
