3 Moze 15:1-33
-
Raʼiö niha na so zi kalua moroi ba waʼailania (1-33)
15 Ifuli zui fahuhuo Yehowa khö Moze hegöi Aʼaroni,
2 ”Fatunö ba ndraono Gizaraʼeli, ’Na mofökhö zi samösa ira matua irege kalua ba wamatuania* zi hulö nana, daʼö mbörö wa raʼiö ia.+
3 Hewaʼae lö tebato waʼakalua zi hulö nana andrö mazui teduhö wamatuania, lö tebulö wa raʼiö ia.
4 ”’Gofu hezo mörö ndra matua sofökhö andrö ba raʼiö naha wemörönia. Ba gofu hadia manö zi no idadaoni hasambalö raʼiö.
5 Niha sombambaya naha wemörö ndra matua daʼö, hasambalö isasai mbarunia ba möi ia mondri. Raʼiö ia ofeta aekhu luo.+
6 Gofu haniha zi dadao ba nidadaoni ndra matua sofökhö andrö, hasambalö isasai mbarunia ba möi ia mondri. Raʼiö ia ofeta aekhu luo.
7 Gofu haniha zombambaya ira matua sofökhö andrö, hasambalö isasai mbarunia ba möi ia mondri. Raʼiö ia ofeta aekhu luo.
8 Na so niha si lö raʼiö si göna ilo ndra matua sofökhö andrö, hasambalö isasai mbarunia ba möi ia mondri. Raʼiö ia ofeta aekhu luo.
9 Fefu zela* nidadaoni ndra matua sofökhö andrö ahori raʼiö.
10 Gofu haniha zombambaya gama-gama nidadaoni ndra matua daʼö, raʼiö ia ofeta aekhu luo. Gofu haniha zamazawa gama-gama daʼö, hasambalö isasai mbarunia ba möi ia mondri. Raʼiö ia ofeta aekhu luo.
11 Na ibabaya niha böʼö ira matua sofökhö daʼö+ ba lö nisasainia tangania, hasambalö isasai mbarunia niha nibabaya andrö ba möi ia mondri. Raʼiö ia ofeta aekhu luo.
12 Na ibabaya mbowoa tanö ira matua sofökhö andrö, hasambalö laboto mbowoa daʼö. Na ibabaya naha gö nifazökhi moroi ba geu, hasambalö lasasai.+
13 ”’Na no döhö ia ba lö saʼae kalua zi hulö nana andrö, fitu hari aefa daʼö isasai mbarunia ba mondri ia ba nidanö sohahau. Awena lö raʼiö ia saʼae.+
14 Ba ngaluo si walu, iʼohe föna Yehowa dombua marafadi mazui fune+ ba mbawandruhö nose waʼowulo ba ibeʼe khö gere.
15 Ibeʼe ere sambua wofo si tobali sumange fameta horö, ba si sambua tö tobali sumange nitunu. Yaʼia zangatulöʼö niha daʼö föna Yehowa faböi raʼiö ia saʼae.
16 ”’Na kalua nidanö mani ba zi samösa ira matua ba hasambalö mondri ia. Raʼiö ia ofeta aekhu luo.+
17 Isasai fefu mbarunia si göna idanö mani hegöi gama-gama nifazökhi moroi ba guli gurifö. Raʼiö fefu gama-gama daʼö ofeta aekhu luo.
18 ”’Na kalua nidanö mani ba zi samösa ira matua ba ginötö orudu ia khö ndra alawe, hasambalö mondri ira. Raʼiö ira ofeta aekhu luo.+
19 ”’Na kalua ndro ba zi samösa ira alawe ba ginötö afökhö dalunia, raʼiö ia sagötö zi fitu hari.+ Raʼiö niha sombambaya yaʼia ofeta aekhu luo.+
20 Gofu hezo mörö ndra alawe daʼö sagötö raʼiö ia börö waʼafökhö dalunia, raʼiö naha wemörönia. Ba gofu hadia manö zi no idadaoni hasambalö raʼiö.+
21 Gofu haniha zombambaya naha wemörö ndra alawe daʼö hasambalö isasai mbarunia ba mondri ia. Raʼiö ia ofeta aekhu luo.
22 Gofu haniha zombambaya gama-gama nidadaoni ndra alawe daʼö, hasambalö isasai mbarunia ba mondri ia. Raʼiö ia ofeta aekhu luo.
23 Na modadao ndra alawe daʼö ba naha wemörö mazui ba gama-gama tanö böʼö, niha sombambaya gama-gama daʼö raʼiö ia ofeta aekhu luo.+
24 Na orudu khönia ndra matua ba göna khönia ndro ba waʼafökhö dalu andrö,+ raʼiö ndra matua daʼö sagötö zi fitu hari. Gofu hezo mörö ndra matua daʼö, raʼiö naha wemörönia.
25 ”’Na lö tebato waʼaduwa ndro+ ba zi samösa ira alawe hewaʼae tenga inötö waʼafökhö dalunia,+ mazui kalua ndro me no awai ginötö waʼafökhö dalunia, raʼiö ia. Sagötö lö tebato ndronia ba raʼiö ia simane na afökhö dalunia.
26 Sagötö alua daʼö, gofu hezo mörö ia ba gofu hezo modadao ia, raʼiö nahia daʼö+ simane me afökhö dalunia.
27 Raʼiö niha sombambaya gama-gama daʼö. Hasambalö isasai mbarunia ba mondri ia. Raʼiö ia ofeta aekhu luo.+
28 ”’Hizaʼi, na no döhö waʼaduwa ndronia ba lö saʼae raʼiö ia ba zi fitu hari tö.+
29 Ba ngaluo si walu, iʼohe dombua marafadi mazui fune+ ba ibeʼe khö ndra ere ba mbawandruhö nose waʼowulo.+
30 Ibeʼe ere sambua wofo tobali sumange fameta horö ba si sambua tö tobali sumange nitunu. Ere zangatulöʼö yaʼia föna Yehowa enaʼö lö saʼae raʼiö ia.+
31 ”’Simane daʼö wangamoniʼömi iraono Gizaraʼeli enaʼö lö mate ira börö me lataʼunöisi nosegu si so ba gotaluara.+
32 ”’Daʼö goroisa na kalua zi hulö nana ba ndra matua, simanö göi ndra matua si raʼiö börö me möi baero nidanö mani khönia,+
33 ira alawe si raʼiö börö waʼafökhö dalu,+ ira matua sofökhö si lö tebato idanö mani mazui ira alawe si lö tebato faʼaduwa ndro,+ ba ira matua sorudu ba ndra alawe si raʼiö.’”
