3 Moze 17:1-16
17 Imane Yehowa khö Moze,
2 ”Fatunö khö Gaʼaroni, iraononia matua, ba fefu ndraono Gizaraʼeli, ’Daʼa niwaʼö Yehowa:
3 ”’”Na so ndraono Gizaraʼeli sanaba sawi, biri-biri, mazui nambi baero mazui bakha ba nose,
4 ba lö iʼohe gurifö daʼö ba mbawandruhö nose waʼowulo tobali sumange khö Yehowa föna nose Yehowa, moʼömö do niha daʼö. No mamunu niha ia* ba hasambalö göi labunu ia.*
5 Wa labeʼe goroisa daʼa enaʼö lö lataba guriföra iraono Gizaraʼeli ba mbenua, hizaʼi laʼohe khö Yehowa. Hasambalö labeʼe gurifö daʼö khö gere ba mbawandruhö nose waʼowulo. Lataba gurifö daʼö tobali sumange fangatulö khö Yehowa.+
6 Itefeʼö ndro gurifö daʼö ere ba naha wanunu sumange khö Yehowa ba mbawandruhö nose waʼowulo. Itunu göi dawö enaʼö numalö miyawa zimbo. Hua zumange andrö möi fangomuso dödö Yehowa.+
7 Börö daʼö, tebai saʼae labeʼe zumange iraono Gizaraʼeli khö lowalangi adu si hulö nambi*+ nifosumangera.*+ Moguna khömi gamakhoita daʼa irugi zi lö aetu ofeta ba ngaʼötömi.”’
8 ”Fatunö khöra, ’Gofu haniha, he iraono Gizaraʼeli mazui niha si fatewu ba gotaluami, sameʼe sumange nitunu mazui sumange tanö böʼö
9 ba na lö iʼohe ba mbawandruhö nose waʼowulo tobali sumange khö Yehowa, hasambalö mubunu niha daʼö.*+
10 ”’Gofu haniha zi manga do hadia ia, he iraono Gizaraʼeli mazui niha si fatewu ba gotaluami, hasambalö utimbagö ia ba ubunu.*+
11 Dozi sauri, bakha ba ndronia so nosonia.+ No utatugöi enaʼö muʼogunaʼö ia ba naha wanunu sumange+ enaʼö tola mifalua wangatulö salahimi.*+ Do daʼö zangatulöʼö yaʼami börö me ba daʼö so noso.
12 Daʼö mbörö wa uwaʼö ba ndraono Gizaraʼeli, ”Fefu ami tebai miʼa ndro,+ simanö göi niha si fatewu ba gotaluami tebai laʼa ndro.”+
13 ”’Na so ndraono Gizaraʼeli mazui niha si fatewu ba gotaluami si möi malu ba sahulu fofo mazui urifö tanö böʼö si tola muʼa, lö tola löʼö iduwagö ndro+ gurifö daʼö ba ibalugö tanö.
14 Noso zauri fefu yaʼia daʼö donia, börö me bakha ba ndro so noso. Daʼö mbörö wa uwaʼö ba ndraono Gizaraʼeli, ”Tebai miʼa ndro gofu hadia ia, börö me bakha ba ndronia so nosonia. Gofu haniha zi manga do, hasambalö labunu.”*+
15 Gofu haniha, he iraono Gizaraʼeli mazui niha si fatewu si manga urifö si no mate me isöndra mazui si no isasawi utu ndruʼu,+ hasambalö isasai mbarunia ba möi ia mondri. Raʼiö ia ofeta aekhu luo.+ Aefa daʼö, lö raʼiö ia saʼae.
16 Hizaʼi, na lö isasai mbarunia ba na lö mondri ia, iluʼi lua-lua horönia.’”+
Nisura ba gahe zura
^ Sin.: ”iduwagö ndro”.
^ Sin.: ”laheta ia moroi ba soinia”.
^ Sin.: ”khö nambi”.
^ Sin.: ”ba zi möi ira mohorö”.
^ Sin.: ”laheta ia moroi ba soinia”.
^ Sin.: ”uheta ia moroi ba soinia”.
^ Mazui ”salahi nosomi”.
^ Sin.: ”laheta ia moroi ba soinia”.
