3 Moze 18:1-30
18 Ifuli zui fahuhuo Yehowa khö Moze,
2 ”Waʼö ba ndraono Gizaraʼeli, ’Yaʼo Yehowa Lowalangimi.+
3 Böi miʼoʼö gamuata niha Miserai, si toröi ami mböröta. Böi miʼoʼö göi gamuata niha Ganaʼana, ba niʼohegu yaʼami dania.+ Böi miʼoʼö zi toʼölö lafalua.
4 Miʼoʼö gangetula huku andrö khögu awö gamakhoitagu fefu. Mifaudugö ba daʼö lala waʼaurimi.+ Yaʼo Yehowa Lowalangimi.
5 Mifalua gamakhoitagu awö gangetula huku andrö khögu. Gofu haniha zamalua yaʼia hasambalö teʼorifi.+ Yaʼo Yehowa.
6 ”’Böi so ba gotaluami zamalua faʼorudu khö* dalifusö si fahatö khönia.+ Yaʼo Yehowa.
7 Böi mifalua waʼorudu khö namami mazui inami. Inami daʼö, andrö wa tebai orudu ami khönia.
8 ”’Böi mifalua waʼorudu khö woʼomo namami.+ Möi fangaila namami daʼö.*
9 ”’Böi mifalua waʼorudu khö dalifusömi alawe, he ono namami mazui ono ninami, he na ba nösi nomomi tumbu ia mazui tenga.+
10 ”’Böi mifalua waʼorudu khö maʼuwumi alawe, he na ono moroi khö nonomi matua ia mazui ono moroi khö nonomi alawe. Möi fangailami daʼö.*
11 ”’Böi mifalua waʼorudu khö nono namami ono alawe moroi khö woʼomo namami, börö me talifusömi alawe daʼö.
12 ”’Böi mifalua waʼorudu khö dalifusö namami ira alawe. Börö me so wöfö ndro namami khönia.+
13 ”’Böi mifalua waʼorudu khö dalifusö ninami ira alawe, börö me so wöfö ndro ninami khönia.
14 ”’Böi miʼailasi* dalifusö namami ira matua, yaʼia daʼö na mifalua waʼorudu khö woʼomonia. Foʼomonia andrö tana ninami.+
15 ”’Böi mifalua waʼorudu khö numönömi ira alawe.+ Foʼomo nonomi daʼö, andrö wa tebai orudu ami khönia.
16 ”’Böi mifalua waʼorudu khö woʼomo dalifusömi ira matua.+ Möi fangaila* dalifusömi ira matua daʼö.
17 ”’Böi mifalua waʼorudu khö nono alawe moroi ba ndra alawe nihalömi tobali foʼomomi.+ Böi mifalua waʼorudu khö maʼuwunia alawe, moroi ba nononia matua mazui ononia alawe. Yaʼira andrö si fahatö khö ndra alawe daʼö. Horö sebua daʼö.*
18 ”’Böi mihalö foʼomomi dalifusö ndrongami tobali foʼomomi si mendrua,+ aefa daʼö mifalua waʼorudu, fatua auri nasa woʼomomi ira alawe.
19 ”’Böi mifalua waʼorudu khö ndra alawe safökhö talu, fatua raʼiö ia nasa.+
20 ”’Böi mifalua waʼorudu khö woʼomo nawömi. Raʼiö ami dania.+
21 ”’Böi mitehegö fazamösa nonomi tobali sumange khö lowalangi Molokho.+ Böi mitaʼunöisi döi Lowalangimi wamalua daʼö.+ Yaʼo Yehowa.
22 ”’Böi mifalua waʼorudu khö ndra matua simane na orudu ami khö ndra alawe.+ Raʼiö gamuata daʼö.
23 ”’Tebai orudu ndra matua ba gurifö; raʼiö ia dania. Tebai göi ilulu ia ira alawe wamalua faʼorudu ba gurifö.+ Fasala daʼö moloʼö si no ifakhoi Lowalangi.
24 ”’Böi mifalua daʼö fefu faböi raʼiö ami. No lafalua daʼö soi ba zi fasuimi, nifofanögu fönami irege raʼiö ira.+
25 Daʼö mbörö wa raʼiö danöra ba uhuku dania zowanua ba daʼö börö me fasala ira. Iʼutaʼö ira soi daʼö.+
26 Lö tola löʼö miʼoʼö gamakhoitagu hegöi angetula huku khögu.+ Yaʼami hegöi niha si fatewu si toröi ba gotaluami, tebai mifalua fazambua gamuata si raʼiö andrö mege.+
27 No lafalua gamuata si raʼiö andrö ira niha si toröi ba soi daʼö fatua lö yaʼami,+ daʼö mbörö wa raʼiö danö andrö.
28 Na lö raʼiö danö daʼö mibeʼe, lö iʼutaʼö ami simane salua ba soi si toröi ba daʼö fatua lö yaʼami.
29 Gofu haniha zamalua fazambua gamuata si raʼiö andrö mege, hasambalö labunu.*
30 Tebai mifalua fazambua gamuata si raʼiö si toʼölö lafalua niha si toröi ba daʼö fatua lö yaʼami.+ Miʼonorogö tödö wamalua oroisagu andre faböi raʼiö ami ba gamuata daʼö fefu. Yaʼo Yehowa Lowalangimi.’”
Nisura ba gahe zura
^ Sin.: ”zangeheta balu-balu zaila”.
^ Sin.: ”Saila namami daʼö”.
^ Sin.: ”Saila ami daʼö”.
^ Sin.: ”Böi miheta mbalu-balu zaila”.
^ Sin.: ”Möi fangeheta mbalu-balu zaila”.
^ Mazui ”Amuata si lö faʼaila daʼö; amuata wohorö”.
^ Sin.: ”laheta ia moroi ba soinia”.
