3 Moze 19:1-37
19 Ifuli zui fahuhuo Yehowa khö Moze,
2 ”Fatunö ba ndraono Gizaraʼeli fefu, ’Miʼamoniʼö ami me no niʼamoniʼö ndraʼo.+ Yaʼo Yehowa Lowalangimi.
3 ”’Mifosumange* namami+ awö ninami ba mifalua khögu zabato.+ Yaʼo Yehowa Lowalangimi.
4 Böi mifosumange lowalangi+ si lö guna andrö mazui mifazökhi nadu.*+ Yaʼo Yehowa Lowalangimi.
5 ”’Na mibeʼe zumange fangatulö khö Yehowa,+ yatefaudu wameʼemi sumange andrö enaʼö itema.+
6 Muʼa nagole zumange andrö ba ginötö miʼohe ia hegöi mahemolunia. Hizaʼi, na so zi toröi ba ngaluo si tölu hasambalö mitunu.+
7 Na so zi manga sumange andrö ba ngaluo si tölu, niʼogorofi zumange daʼö ba lö saʼae utema.
8 Iluʼi lua-lua horönia niha si manga sumange daʼö börö me no itaʼunöisi zumange niʼamoniʼö khö Yehowa. Börö daʼö, hasambalö labunu ia.*
9 ”’Na mibasi nowimi, böi mihorigö mibasi irugi hinölu, ba böi miʼozaragö zi toröi mbua nowimi.+
10 Böi mihalö zi toröi mbua nagu ba kabu khömi mazui miʼozaragö zaekhu tou. Miröi fefu daʼö ba niha si numana*+ hegöi si fatewu. Yaʼo Yehowa Lowalangimi.
11 ”’Böi miʼanagö,+ böi milimo niha,+ ba böi mifuyuʼö zindruhu khö nawömi.
12 Böi miʼaeʼe ba hölu ba waya ba döigu,+ börö me tobali fotaʼunöisi döi Lowalangimi daʼö. Yaʼo Yehowa Lowalangimi.
13 Böi milimo nawömi+ ba böi mirabu niha.+ Böi mitaha gazi niha sohalöwö khömi ofeta mahemolu sihulö wongi.+
14 ”’Böi miʼelifi niha safiso ba böi mibaʼa lala niha sauʼa.+ Miʼataʼufi Lowalangimi.+ Yaʼo Yehowa.
15 ”’Böi mifuyuʼö zindruhu na miʼetuʼö huku. Böi faʼawö ami ba niha daʼö ha börö me numana mazui kayo ia.+ Mitörö zatulö khö nawömi na miʼetuʼö huku.
16 ”’Böi mifangörö-ngörö ami ba nomo nawömi wamatunö si lö duhu.+ Böi miʼodödögö wangalui lala enaʼö mate nawömi.*+ Yaʼo Yehowa.
17 ”’Böi so ba dödömi watiusa khö dalifusömi.+ Miʼodödögö wanegu yaʼia+ faböi miluʼi horönia.
18 ”’Böi misulöni zi lö sökhi+ mazui fahöʼö ami khö nawömi. Miʼomasiʼö nawömi simane faʼomasimi ami.+ Yaʼo Yehowa.
19 ”’Böi zi lö mifalua goroisagu andre: Böi mifangalau gurifö si dombua balö.+ Böi mitanö zinanö si dombua balö ba nowimi, ba böi mifake nukha si dombua ngawalö mbana.+
20 ”’Na orudu zi samösa ira matua khö ndra alawe, ba ira alawe daʼö sawuyu nibeʼe khö ndra matua tanö böʼö, ba lö muhöli ia mazui muʼefaʼö, hasambalö tehuku ira. Hizaʼi, tebai mibunu ira börö me lö muʼefaʼö zawuyu andrö.
21 Hasambalö iʼohe ira matua daʼö sageu mbiri-biri si matua ba mbawandruhö nose waʼowulo. Biri-biri daʼö tobali sumange fameta zala khö Yehowa.+
22 Ere zamalua fangatulö khö ndra matua daʼö ba ginötö ibeʼe mbiri-biri andrö tobali sumange fameta horönia khö Yehowa. Na ifalua daʼö, teʼefaʼö horönia.
23 ”’Na no mirugi danö nibeʼegu khömi ba mitanö ngawalö zinanö sowua ba daʼö, tobali raʼiö ba alakha mbuania khömi. Sagötö zi tölu fakhe ba wamobörö, alakha mbuania khömi. Tebai miʼa daʼö.
24 Hizaʼi na no irugi zi öfa fakhe, teʼamoniʼö fefu mbuania. Mibeʼe daʼö fefu tobali sumange khö Yehowa si fao faʼomuso dödö.+
25 Na no irugi lima fakhe, fahöna mbuania dania ba tola miʼa. Yaʼo Yehowa Lowalangimi.
26 ”’Böi miʼa gofu hadia ia fabaya do.+
”’Böi mamaʼeleʼö ami mazui fakelemu.+
27 ”’Böi miʼogaolo wanöwö bumi mazui mifaloʼo gambimi.*+
28 ”’Böi mikhokhoi mbotomi na so zi mate,+ ba böi mifazökhi tato ba mbotomi. Yaʼo Yehowa.
29 ”’Böi mitehegö tobali ira alawe sohorö-horö nonomi+ ba wangailasi yaʼia, faböi afönu faʼalösökhi danömi ba taʼunö börö zohorö-horö.+
30 ”’Mifalua zabato+ ba mifosumange* naha niʼamoniʼö khögu. Yaʼo Yehowa.
31 ”’Böi miʼaeʼe ba zogaoni bekhu niha si no mate+ ba böi miʼandrö wanuturu lala khö zamaʼeleʼö+ faböi raʼiö ami. Yaʼo Yehowa Lowalangimi.
32 ”’Mifosumange niha si no ahuwa+ hegöi niha si no atua.+ Miʼataʼufi Lowalangimi.+ Yaʼo Yehowa.
33 ”’Böi mifakao niha si fatewu ba soimi.+
34 Hewisa gamuatami ba ndraono Gizaraʼeli enaʼö simane daʼö gamuatami ba niha si fatewu si toröi ba gotaluami.+ Miʼomasiʼö ira simane fangomasiʼömi yaʼami, börö me no irai tobali ami niha si fatewu ba danö Miserai.+ Yaʼo Yehowa Lowalangimi.
35 ”’Böi miʼogunaʼö zuʼa-suʼa, kilo, hegöi tumba si lö atulö.+
36 Miʼogunaʼö waliʼera* satulö, kara wanuʼa satulö hegöi fanuʼa satulö.*+ Yaʼo Yehowa Lowalangimi, sangeheta yaʼami ba danö Miserai.
37 Börö daʼö, miʼoʼö ba mifalua fefu gamakhoitagu awö gangetula huku andrö khögu.+ Yaʼo Yehowa.’”
Nisura ba gahe zura
^ Sin.: ”Miʼataʼufi”.
^ Mazui ”mifazökhi nadu moroi ba loga”.
^ Sin.: ”laheta ia moroi ba soinia”.
^ Mazui ”nifakao”.
^ Mazui te ”Böi milau zi lö hede-hede na teʼala waʼauri nawömi”.
^ Te daʼa zi toʼölö lafalua niha baero.
^ Sin.: ”miʼataʼufi”.
^ Mazui ”kilo”.
