3 Moze 20:1-27
20 Imane Yehowa khö Moze,
2 ”Fatunö ba ndraono Gizaraʼeli, ’Na so samösa niha zameʼe ononia khö lowalangi Molokho, hasambalö mubunu niha daʼö, he na iraono Gizaraʼeli hegöi niha si fatewu.+ Latebu ia kara irege mate.
3 Utimbagö niha daʼö ba ubunu ia,* börö me no ibeʼe nononia khö lowalangi Molokho ba itaʼunöisi nahia niʼamoniʼö+ hegöi töigu niʼamoniʼö.
4 Na so zangila ba soi daʼö no ibeʼe nononia khö lowalangi Molokho, hizaʼi laʼosilömangilagö ba lö labunu niha daʼö,+
5 utimbagö niha daʼö awö nösi nomonia.+ Yaʼo zamunu yaʼia* ba fefu zi fao khönia ba wamosumange* Molokho.
6 ”’Na so zi faröi khögu* ba möi ia khö zamaʼeleʼö+ mazui ba zogaoni bekhu niha si no mate,+ hasambalö utimbagö niha daʼö ba ubunu ia.*+
7 ”’Mihaogö ami faböi raʼiö ba miʼamoniʼö ami,+ börö me yaʼo Yehowa Lowalangimi.
8 Miʼoʼö ba mifalua gamakhoitagu.+ Yaʼo Yehowa zangamoniʼö yaʼami.+
9 ”’Haniha zangelifi amania mazui inania, hasambalö mubunu.+ Mate ia ba zalania andrö* börö me iʼelifi namania mazui inania.
10 ”’Daʼa goroisa ba ndra matua sohoröni foʼomo niha böʼö: Niha sohoröni foʼomo nawönia hasambalö mubunu, he ira matua ia mazui ira alawe.+
11 Niha sohoröni foʼomo namania, no iʼailasi namania.*+ Hasambalö mubunu zi darua niha andrö. Mate ira börö zalara.
12 Na so ndra matua sohoröni umönönia ira alawe, hasambalö mubunu zi darua niha andrö. Daʼö gamuata si lö enahöi. Mate ira börö zalara.+
13 ”’Na so ndra matua sohoröni ira matua simane na orudu ia ba ndra alawe, no lafalua gamuata si raʼiö.+ Hasambalö mubunu zi darua niha andrö. Mate ira börö zalara.
14 ”’Na so ndra matua sangowalu khö zi samösa ira alawe ba ihoröni nina ndra alawe daʼö, daʼö gamuata si lö enahöi.*+ Hasambalö mubunu ba mutunu ndra matua daʼö+ hegöi ira alawe si darua andrö faböi alua zimane daʼö ba gotaluami.
15 ”’Na so ndra matua sohoröni urifö, hasambalö mubunu ndra matua daʼö hegöi urifö andrö.+
16 Na so ndra alawe sohorö ba gurifö,+ hasambalö mibunu ndra alawe daʼö hegöi urifö andrö. Hasambalö mubunu ira. Mate ndra matua hegöi ira alawe samalua daʼö börö zalara.
17 ”’Na so ndra matua sohoröni gaʼania mazui akhinia ono alawe, yaʼia daʼö ono namania mazui inania, daʼö gamuata si möi fangaila. Faoma no laʼila zaila nawöra.+ Hasambalö mubunu zi darua niha andrö föna niha sato. No iʼailasi* gaʼania mazui akhinia ono alawe ira matua daʼö. Iluʼi zala nifaluania.
18 ”’Na so ndra matua sorudu ba ndra alawe safökhö talu, eluahania lö laʼamoniʼö ndro.+ Hasambalö mubunu zi darua niha andrö.*
19 ”’Böi mihoröni gaʼami mazui akhimi ono alawe, ono namami mazui inami, börö me tobali fangaila zi fahatö khömi daʼö.+ Laluʼi zala nifaluara yaʼira si darua andrö.
20 Na so ndra matua sohoröni foʼomo zibayania, no iʼailasi zibayania.*+ Laluʼi zala nifaluara yaʼira si darua andrö. Mate ira lö ono.
21 Na so ndra matua sangowalu khö woʼomo gaʼania mazui akhinia, alakha daʼö.+ No iʼailasi* gaʼania mazui akhinia. Lö moʼono ira.
22 ”’Hasambalö miʼoʼö+ ba mifalua fefu gamakhoita awö gangetula huku khögu,+ enaʼö lö iʼutaʼö ami tanö nibeʼegu khömi dania si tobali nahia waʼatoröimi.+
23 Böi miʼoʼö zi toʼölö lafalua ba soi nifofanögu fönami dania.+ No lafalua daʼö fefu ba anuzu dödögu wamaigi yaʼira.+
24 Daʼö mbörö wa no irai uwaʼö, ”Miʼokhögö dania danöra. Ubeʼe dania khömi danö daʼö, tanö si fahöna susu ba wewani.+ Yaʼo Yehowa Lowalangimi samasambua yaʼami moroi ba soi böʼö.”+
25 Moguna aboto ba dödömi hezo gurifö salakha ba si lö alakha, simanö göi wofo salakha ba si lö alakha.+ No utatugöi hadia manö gurifö, fofo, mazui urifö saliwa-liwa ba danö salakha ba wamaigimi. Böi tobali ami niʼogorofi börö daʼö fefu.+
26 Miʼamoniʼö ami fönagu börö me niʼamoniʼö ndraʼo.+ Yaʼo Yehowa ba ufasambua ami moroi ba soi böʼö enaʼö tobali tana khögu.+
27 ”’Hasambalö nibunu ndra matua mazui ira alawe sogaoni bekhu niha si no mate mazui samaʼeleʼö.+ Latebu ia kara irege mate. Mate ia börö horönia.’”*
Nisura ba gahe zura
^ Sin.: ”uheta ia moroi ba soinia”.
^ Sin.: ”zangeheta yaʼia moroi ba soinia”.
^ Sin.: ”ba wohorö khö”.
^ Mazui ”zamalua fohorö ba wamati”.
^ Sin.: ”uheta ia moroi ba soinia”.
^ Mazui ”Yaʼia samösa zoluʼi donia”.
^ Sin.: ”iheta mbalu-balu zaila namania”.
^ Mazui ”daʼö gamuata si lö faʼaila; amuata wohorö”.
^ Sin.: ”iheta mbalu-balu zaila”.
^ Sin.: ”laheta ira moroi ba soira”.
^ Sin.: ”iheta mbalu-balu zaila zibayania”.
^ Sin.: ”iheta mbalu-balu zaila”.
^ Mazui ”Iluʼi samösa ndronia”.
