3 Moze 22:1-33
22 Ifuli fahuhuo Yehowa khö Moze,
2 ”Fatunö khö Gaʼaroni hegöi ba ndraononia matua enaʼö lahaogö wondrorogö* ngawalö niʼamoniʼö,+ nifasambua* ndraono Gizaraʼeli tobali sumange khögu. Böi lataʼunöisi döigu niʼamoniʼö.+ Yaʼo Yehowa.
3 Waʼö khöra, ’Daʼa gamakhoita irugi zi lö aetu. Na so ngaʼötömi zangahatöʼö yaʼia ba ngawalö niʼamoniʼö, nifasambua* ndraono Gizaraʼeli khö Yehowa, sagötö raʼiö ia, hasambalö labunu ia.*+ Yaʼo Yehowa.
4 Ngaʼötö Gaʼaroni si göna bou auri+ mazui sokiöni zi hulö nana,+ tebai iʼa ngawalö niʼamoniʼö irege lö raʼiö ia saʼae.+ Simanö göi niha si raʼiö si no mombambaya boto zi mate,+ mazui si kalua idanö mani,+
5 mazui sombambaya urifö side-ide si raʼiö sowulo ba zi sambu-sambua nahia,+ mazui sombambaya niha si raʼiö ba ngawalö hadia ia hegöi niha samobörö faʼaraʼiö nawönia.+
6 Gofu haniha zombambaya si raʼiö simane daʼö, ba raʼiö ia ofeta aekhu luo. Tebai iʼa ngawalö niʼamoniʼö ba hasambalö möi ia mondri.+
7 Na no aekhu luo ba lö saʼae raʼiö ia. Tola iʼa ngawalö niʼamoniʼö börö me daʼö gönia.+
8 Tebai iʼa gurifö si no mate nisöndrania mazui urifö si mate nisasawi gutu ndruʼu, faböi raʼiö ia.+ Yaʼo Yehowa.
9 ”’Lö tola löʼö laʼoʼö goroisagu enaʼö lö lafalua horö ba mate ira börö me lataʼunöisi ngawalö niʼamoniʼö. Yaʼo Yehowa zangamoniʼö yaʼira.
10 ”’Ba niha si lö mutehegö,* tebai laʼa ngawalö niʼamoniʼö,+ simane daʼö göi zi möi sawuyu mazui niha si fatewu si fao khö ndra ere.
11 Hizaʼi, niha niʼöli gere ba gefenia samösa tola fao ia wemanga, simane daʼö göi zawuyu si tumbu ba nomo gere.+
12 Na mangowalu nono gere ono alawe ba zi tenga ere,* tebai fao ia wemanga ngawalö niʼamoniʼö nibeʼe sumange.
13 Na tobali lakha mbanua nono gere mazui no fabali ia khö woʼomonia, ba lö ono, ba mangawuli ia ba nomo namania simane me ono alawe ia, tola iʼa wöfö gö namania.+ Hizaʼi ba niha si lö mutehegö,* tebai laʼa.
14 ”’Na so zi manga gö niʼamoniʼö si tenga niʼodödögö, ifuli igati gö niʼamoniʼö andrö ba ibeʼe khö gere, inönö sambua niʼolima tö.+
15 Börö daʼö, tebai lataʼunöisi ira ere ngawalö niʼamoniʼö nibeʼe ndraono Gizaraʼeli tobali sumange khö Yehowa+
16 irege fasala ndraono Gizaraʼeli labeʼe ba göna ira fanguhuku börö me laʼa ngawalö niʼamoniʼö. Yaʼo Yehowa zangamoniʼö yaʼira.’”
17 Fahuhuo zui Yehowa khö Moze,
18 ”Waʼö khö Gaʼaroni, iraononia matua, ba fefu ndraono Gizaraʼeli, ’Na so ndraono Gizaraʼeli mazui si fatewu ba Gizaraʼeli zameʼe sumange nitunu+ khö Yehowa, ba wamalua buʼusa li mazui ba wameʼe sumange si no aoha gölö,+
19 yamubeʼe zawi si matua, biri-biri si matua sawuyu-wuyu, mazui nambi si lö fökhö,+ enaʼö itema Lowalangi.
20 Böi mibeʼe gurifö sofökhö tobali sumange,+ börö me lö omuso dödö Lowalangi khömi dania.
21 ”’Na so zolohe sumange fangatulö+ khö Yehowa ba wamalua buʼusa li mazui ba wameʼe sumange si no aoha gölö, yamubeʼe zawi, biri-biri, mazui nambi si lö fökhö, enaʼö itema Lowalangi. Tebai so zageu gurifö andrö sofökhö.
22 Tebai mubeʼe sumange gurifö si lö hörö, safatö töla, si no mesokho, sobuʼulo, si so gimö-gimö mazui sobelua. Böi mibeʼe gurifö simane daʼö khö Yehowa ba böi mibeʼe ba naha wanunu sumange khö Yehowa.
23 Tola mibeʼe sumange si no aoha gölö zawi si matua mazui biri-biri hewaʼae na anau zara gahenia. Hizaʼi, lö mutema daʼö na mibeʼe tobali sumange ba wamalua buʼusa li.
24 Tebai mibeʼe sumange khö Yehowa gurifö si no abao bazili, si no afufu, si no muheta mazui si no mutaba. Böi mibeʼe gurifö daʼö tobali sumange ba soimi.
25 Na so niha si fatewu solohe sumange simane daʼö, böi mibeʼe daʼö tobali ö* khö Lowalangimi, börö me no tekiko ba mofökhö. Lö omuso dödö Lowalangi khömi dania.’”
26 Fahuhuo zui Yehowa khö Moze,
27 ”Sawi si matua, biri-biri si matua, mazui nambi si bohou moʼono, tebai mifabali khö ninania sagötö zi fitu hari.+ Hizaʼi, na no irugi walu hari, tola mutema gurifö daʼö tobali sumange, sumange nitunu ba galitö khö Yehowa.
28 Na mitaba zawi si matua mazui biri-biri, tebai miʼendrongagö wanaba yaʼia fabaya ono ba ngaluo si fagölö.+
29 ”Na mibeʼe gurifö tobali sumange fangandrö saohagölö khö Yehowa,+ mibeʼe daʼö enaʼö omuso dödö Lowalangi khömi.
30 Hasambalö miʼa ba ngaluo daʼö ba böi miröi ofeta mahemolu sihulö wongi.+ Yaʼo Yehowa.
31 ”Miʼoʼö ba mifalua goroisagu.+ Yaʼo Yehowa.
32 Böi mitaʼunöisi döigu niʼamoniʼö,+ ba miʼamoniʼö ndraʼo ba gotalua ndraono Gizaraʼeli.+ Yaʼo Yehowa zangamoniʼö yaʼira.+
33 Yaʼo zangeheta yaʼami ba danö Miserai, enaʼö miʼila wa yaʼo Lowalangimi.+ Yaʼo Yehowa.”
Nisura ba gahe zura
^ Mazui ”niʼamoniʼö”.
^ Sin.: ”wamasambua yaʼia moroi ba”.
^ Mazui ”niʼamoniʼö”.
^ Sin.: ”laheta ia moroi ba soinia”.
^ Sin.: ”niha si fatewu”, yaʼia daʼö si tenga ösi nomo Gaʼaroni.
^ Mazui ”ba niha si fatewu”.
^ Sin.: ”niha si fatewu”, yaʼia daʼö si tenga ösi nomo Gaʼaroni.
^ Sin.: ”roti”.
