3 Moze 24:1-23
24 Ifuli zui fahuhuo Yehowa khö Moze,
2 ”Waʼö ba ndraono Gizaraʼeli enaʼö laʼohe khöu ba daʼö wanikha zaitu si sökhi, fanikha wandru ba nose Lowalangi faböi mate haga wandru andrö.+
3 Aʼaroni zanunu fandru daʼö föna Yehowa iʼotarai bongi ofeta sihulö wongi ba nose waʼowulo, yaʼia daʼö föna nukha mbaʼa-baʼa sahatö ba Dawöla Famaduhuʼö. Moguna khömi gamakhoita daʼa irugi zi lö aetu ofeta ba ngaʼötömi.
4 Yaʼia zamaigi-maigi fandru si so ba naha wandru+ nifazökhi moroi ba ganaʼa si sökhi, föna Yehowa.
5 ”Bogö 12 ngawua roti niʼogaladanga. Ero sambua roti enaʼö 4,4 liter* hamo darigu si sökhi.
6 Beʼe roti daʼö yawa ba dete meza nifazökhi moroi ba ganaʼa si sökhi föna Yehowa, dombua famaʼoli.+ Önö ngawua ero famaʼoli.+
7 Beʼe gumöyö si sökhi ba dete roti si no mufaʼoli andrö. Kumöyö daʼö zi tobali salahi ba roti andrö fefu*+ tobali sumange nitunu ba galitö khö Yehowa.
8 Ero ngaluo Sabato, mubeʼe roti daʼö föna Yehowa.+ Daʼa mbuʼusa ligu ba ndraono Gizaraʼeli soguna irugi zi lö aetu.
9 Tobali tana khö Gaʼaroni roti daʼö hegöi khö ndraononia matua+ ba laʼa ba nahia niʼamoniʼö.+ Börö me fondrege niʼamoniʼö daʼö tana khö ndra ere nihalö moroi ba zumange nitunu ba galitö khö Yehowa. Moguna khöra gamakhoita daʼa sagötö faʼara.”
10 Ba gotalua ndraono Gizaraʼeli, so samösa ndra matua, inania moroi ba gotalua ndra alawe Gizaraʼeli ba amania niha Miserai.+ Faʼudu ia khö zi samösa ira matua Gizaraʼeli ba nose.
11 Iʼoʼaya ba iʼelifi döi Lowalangi ono ndra alawe Gizaraʼeli andrö.+ Börö daʼö, laʼohe ia khö Moze.+ Töi ninania yaʼia daʼö Selomiti ono Dibiri moroi ba mado Dano.
12 Lataha manö ndra matua daʼö, irege latema gangetula moroi khö Yehowa.+
13 Aefa daʼö imane Yehowa khö Moze,
14 ”Ohe ndra matua daʼö si no mangelifi yaʼodo baero nose waʼowulo. Fefu zi no mamondrongo fehedenia, enaʼö latufa tangara högönia ba latebu ia faoma kara.+
15 Fatunö ba ndraono Gizaraʼeli, ’Niha sangelifi Lowalangi andrö, iluʼi horönia.
16 Niha sangoʼaya töi Yehowa hasambalö nibunu.+ Fefu niha sato latebu ia faoma kara. Labunu niha sangoʼaya töi Lowalangi, he iraono Gizaraʼeli sindruhu hegöi niha si fatewu.
17 ”’Niha samunu awönia niha, labunu göi ia.+
18 Niha samunu urifö nawönia, hasambalö ibeʼe wangali, urifö wangali gurifö.*
19 Na so zamesokho awönia, ba lafalua göi khönia zimane daʼö.+
20 Töla safatö wangali döla safatö, hörö wangali hörö, ifö wangali nifö. Hadia nifaluania ba wamesokho awönia, daʼö göi labeʼe famesokhonia.+
21 Niha samunu urifö, hasambalö ibeʼe wangali,+ hizaʼi niha samunu awönia niha, labunu göi ia.+
22 ”’Moguna gangetula huku andrö ba niha si fatewu hegöi ba ndraono Gizaraʼeli sindruhu.+ Yaʼo Yehowa Lowalangimi.’”
23 Ba fahuhuo Moze ba ndraono Gizaraʼeli, laʼohe baero nose waʼowulo niha sangelifi Lowalangi andrö, ba latebu ia kara.+ Lafalua daʼö iraono Gizaraʼeli simane sibai niwaʼö Yehowa khö Moze.
