3 Moze 25:1-55
25 Ifuli zui fahuhuo Yehowa khö Moze ba Hili Zinaʼi,
2 ”Fatunö ba ndraono Gizaraʼeli, ’Na no dania mirugi danö nibeʼegu khömi,+ mifalua zabato khö Yehowa ba mifolombase danö andrö.+
3 Sagötö zi önö fakhe, tola mitanö zinanö ba nowimi, mitaba ndraha nagu khömi ba mibasi mbua danömi.+
4 Hizaʼi ba ndröfi si fitu, mitehegö molombase danö börö me ba ndröfi daʼö zabato khö Yehowa. Böi mitanö danömö zinanö ba nowi mazui mitaba ndraha nagu khömi.
5 Böi mihalö na so zinanö sowua moroi ba danömö si toröi ba nowimi. Böi mihalö na so zauri ba ndraha nagu si lö mutaba. Mifolombase danö sagötö zi döfi.
6 Hizaʼi, tola miʼa mbua zinanö sowua sagötö ndröfi zabato andrö. Tola göi laʼa daʼö ira sawuyumi, sohalöwö nigazimi, niha si fatewu ba gotaluami
7 hegöi urifömi awö gutu ndruʼu ba danömi. Fefu mbua zinanö tola miʼa.
8 ”’Miʼerai zi fitu fakhe sabato, yaʼia daʼö fitu kali fitu fakhe, 49 fakhe fefu.
9 Aefa daʼö, ba ngaluo si fulu ba mbaŵa si fitu, yaʼia daʼö Ngaluo Wangatulö,+ miʼebuaʼö wamoli torofe nifazökhi moroi ba dandru irege terongo ba soimi maʼasagörö.
10 Niʼamoniʼö ndröfi si 50 andrö, ba miʼombakhaʼö luo wangefa ba niha fefu.+ Daʼö ndröfi Yobeli* khömi, ba miʼangawuli ba danömi hegöi ba nösi nomomi zamösana.+
11 Döfi si 50 andrö, döfi Yobeli. Böi mitanö danömö zinanö, böi mihalö mbua zinanö sowua si töröi moroi furi mazui mibasi mbua nagu ba ndraha nagu si lö mutaba.+
12 Döfi Yobeli daʼö, andrö wa moguna miʼamoniʼö. Ha bua zinanö sowua manö zi tola miʼa.+
13 ”’Ba ndröfi Yobeli, hasambalö miʼangawuli ba gokhötami zamösana.+
14 Na so nifamawami mazui niʼölimi, böi milimo nawömi.+
15 Na miʼöli danö khö nawömi, miʼerai hauga fakhe no numalö iʼotarai ndröfi Yobeli. Faʼebua mbölinia enaʼö fagölö ba ndröfi si toröi mbaŵa wamasi.+
16 Nifamawa yaʼia daʼö fefu mbua nowi si tesöndra ba ndröfi daʼö. Hizaʼi na ara nasa, tola midouʼö mbölinia, ba na lö ara tö, miʼalösi mbölinia.
17 Böi milimo nawömi+ ba miʼataʼufi Lowalangimi.+ Yaʼo Yehowa Lowalangimi.+
18 Na miʼoʼö zi no ufakhoi ba mifalua gangetula huku khögu, ba ohahau dödömi wangiagö tanö andrö.+
19 Ba mowua dania danö+ irege abuso ami ba ohahau dödömi.+
20 ”’Hizaʼi te mimane, ”Na tebai mananö ndraʼaga mazui mamasi, hadia maʼa ba ndröfi si fitu andrö?”+
21 Böi mibusi dödömi. Ba ndröfi si önö, ubeʼe dania khömi howu-howu ba obönö khömi mbua nowi andrö ba zi tölu fakhe.+
22 Ba ndröfi si walu, mifuli zui mitanö danömö zinanö. Hizaʼi fatua lö mowua daʼö, miʼa dania mbua nowi si tohöna ofeta ba ndröfi si siwa.
23 ”’Böi mifamawa danö sagötö faʼara+ börö me okhötagu danö andrö.+ Ba wamaigigu, yaʼami andrö niha si fatewu ba si toröi sabata.+
24 Fefu niha ba soimi si no mamawa tanönia, khönia tebeʼe na tola iʼöli mangawuli.
25 ”’Na aekhu ba waʼanumana dalifusömi ba ifamawa ösa danönia, talifusö si fahatö khönia daʼö zinangea mowöli tanö daʼö.+
26 Na lö hadöi talifusönia sinangea mowöli mangawuli, hizaʼi furi daʼö awena obönö gefenia ba wowöli tanö daʼö mangawuli,
27 moguna iʼerai hawaʼoya mbua danö andrö iʼotarai me ifamawa, ifaheta daʼö ba mböli me ifamawa mböröta. Daʼö dania zi lö tola löʼö ibuʼa. Awena tola ifuli ia ba danönia.+
28 ”’Hizaʼi, na lö hadöi kefenia wowöli mangawuli, lö tebulö danö daʼö khö zowöli yaʼia irugi ndröfi Yobeli.+ Lafuli khönia danö daʼö dania ba ndröfi Yobeli ba mangawuli ia ba danönia.+
29 ”’Na so zamawa omonia ba mbanua si no mukölini, tebeʼe khönia ginötö ba wosanu mangawuli+ omo daʼö barö zi döfi iʼotarai me ifamawa. Afönu zi döfi tebeʼe khönia ginötö.
30 Hizaʼi na lö ifuli isanu barö zi döfi nomo andrö ba mbanua si no mukölini, niha sowöli andrö hegöi ngaʼötönia zangokhögö omo daʼö. Lö mufangawuli nomo daʼö ba ndröfi Yobeli.
31 Na omo nifamawa andrö tenga ba mbanua si no mukölini, tebeʼe ginötö khö zamawa ba wosanu mangawuli omo daʼö gofu hawaʼara manö, börö me si teʼuʼu ba mbenua sebolo. Lafangawuli nomo daʼö ba ndröfi Yobeli.
32 ”’Na ifamawa nomonia niha Lewi ba mbanuara misa,+ lö tebulö wa yaʼira zinangea mosanu mangawuli.
33 Na lö ifuli isanu nomonia andrö niha Lewi ba mbanuara misa, ba hasambalö mufuli khönia ba ndröfi Yobeli.+ Börö me omo si so ba mbanua niha Lewi, daʼö dana khöra ba gotalua ndraono Gizaraʼeli.+
34 Baero daʼö, benua soduʼu+ si so ba zi fasui mbanuara misa, tebai lafamawa börö me tana khöra daʼö sagötö faʼara.
35 ”’Na aekhu numana dalifusömi sahatö ba zingami irege tebai isöndra zoguna khönia, mitolo ia+ simane fanolomi niha si fatewu ba si toröi sabata,+ enaʼö lö tebulö toröi ia ba zingami.
36 Miʼataʼufi Lowalangimi.+ Ba böi miʼandrö nono gefemi khönia mazui mihalö haremi.+ Ba lö tebulö toröi dalifusömi ba zingami.
37 Na mifafizaʼö gefemi khönia, böi miʼandrö nono.+ Ba na mibeʼe gönia, böi miʼandrö zulö.
38 Yaʼo Yehowa Lowalangimi. Yaʼo zangeheta yaʼami ba danö Miserai+ ba ubeʼe khömi danö Ganaʼana ba wangoromaʼö wa yaʼo Lowalangimi.+
39 ”’Na aekhu numana dalifusömi sahatö ba zingami irege ifamawa ia khömi,+ böi mifohalöwö ia simane sawuyu.+
40 Mifalua khönia zimane nifaluami ba niha sohalöwö nigazimi,+ simane niha si toröi sabata. Mohalöwö ia khömi irugi ndröfi Yobeli.
41 Tola iröi ami ba mangawuli ia ba nösi nomonia, ba danö ndra tuania ba iʼohe fefu ndraononia.+
42 Yaʼira andrö sawuyugu nihetagu ba danö Miserai.+ Tebai laʼamawa ira tobali sawuyu.
43 Böi mifatörö khöra zi lö sökhi.+ Miʼataʼufi Lowalangimi.+
44 Sawuyumi ira matua ba sawuyumi ira alawe, enaʼö si otarai ba soi si fasui yaʼami. Tola miʼöli zawuyu andrö moroi khöra.
45 Tola göi miʼöli zawuyu moroi ba niha si fatewu si toröi ba gotaluami+ hegöi moroi ba nösi nomora si tumbu ba danömi. Tobali tana khömi ira.
46 Tobali ira sawuyumi sagötö faʼara ba tola latohugö iraonomi wangosawuyu yaʼira. Hizaʼi, tebai lafatörö khöra zi lö sökhi ira talifusömi hegöi iraono Gizaraʼeli.+
47 ”’Ba na kayo niha si fatewu mazui si toröi sabata ba danömi, hizaʼi numana dalifusömi ba ifamawa ia ba niha si fatewu mazui si toröi sabata, mazui ba nösi nomora,
48 me no ifamawa ia, itötöna wa mufuli muʼöli ia. Fazamösa dalifusönia ira matua zi tola mowöli yaʼia mangawuli,+
49 sibayania mazui ono zibayania hegöi si fahatö khönia* zi tola mowöli yaʼia mangawuli.
”’Mazui na kayo ia samuza inötö, ba tola ifuli iʼöli ia.+
50 Hizaʼi, moguna ua falukha ia khö zowöli yaʼia. Laʼerai hauga fakhe iʼotarai me ifamawa ia irugi ndröfi Yobeli aefa daʼö.+ Faʼebua mbölinia enaʼö fagölö ba zi hauga fakhe daʼö.+ Sagötö fohalöwönia, mibaliʼö ia simane niha sohalöwö nigazimi.+
51 Na ara nasa alua ndröfi Yobeli aefa daʼö, ebua wamuʼania na iʼöli mangawuli, moloʼö hauga fakhe tö zi toröi.
52 Na lö ara tö alua ndröfi Yobeli, moguna iʼerai ba ide-ide wamuʼania ba wowöli yaʼia mangawuli.
53 Mifalua khönia zimane nifaluami ba niha nigazimi, sangai halöwö khö zokhö yaʼia ero röfi. Mitatugöi wa lö ifalua khönia zi lö sökhi sokhö yaʼia.+
54 Hizaʼi, na tebai iʼöli ia samösa moloʼö si no mutatugöi andre, aefa ia awö ndraononia ba ndröfi Yobeli.+
55 ”’Sawuyugu ndraono Gizaraʼeli. Yaʼira andrö sawuyugu nihetagu ba danö Miserai.+ Yaʼo Yehowa Lowalangimi.
