3 Moze 26:1-46
26 ”’Böi fazökhi khöu lowalangi si lö eluaha.+ Böi fazökhi khöu nadu nitoto+ mazui ehomo niʼamoniʼö,* böi mitaruʼö gara nitoto+ ba mbanuami ba böi mangalulu ami khönia.+ Yaʼo Yehowa Lowalangimi.
2 Mifalua zabato ba mifosumange* nahia niʼamoniʼö khögu. Yaʼo Yehowa.
3 ”’Na lö tebulö ami woloʼö amakhoitagu, miʼoʼö ba mifalua goroisagu,+
4 ubeʼe khömi deu ba ginötönia,+ irege mowua danö+ ba mowua geu ba mbenua.
5 Fahöna dania mbua nowi nibasimi irege lö sahori migili mbua gandru siföföna ba no irugi zui baŵa waneteu bua nagu. Ba ginötö miteteu mbua nagu, no irugi inötö wananö tanömö zinanö. Abuso dania ami wemanga roti ba ohahau dödömi ba danö si toröi ami.+
6 Uʼasogö khömi waʼahono dödö ba soimi,+ ba miʼila mörö me lö sametaʼu yaʼami.+ Utaboi gurifö samuʼi ba soi daʼö, ba lö isuwö ami föda.
7 Migohi dania fefu nudumi ba mikalaisi ira faoma föda.
8 Dalima ba gotaluami zolohi si 100 niha, ba si 100 niha ba gotaluami zolohi si 10.000 niha. Kala fefu nudumi ba wödami.+
9 ”’Ufahowuʼö ami ba uʼoyaʼö ngaʼötömi irege ato sibai.+ Ufalua mbuʼusa ligu khömi.+
10 Gasa-gasa wemangami bua nowi me ndröfia, ba no irugi inötö wamasi irege mitiboʼö zi oföna enaʼö so naha zi bohou.
11 Ufataro nosegu ba gotaluami+ ba lö utimbagö ami.
12 Fao ndraʼo khömi ba yaʼo Lowalangimi.+ Ba tobali ami ono mbanuagu.+
13 Yaʼo Yehowa Lowalangimi sangeheta yaʼami ba danö Miserai irege lö saʼae laʼosawuyu ami. Ufatö mbea-bea noro* sangosawuyu yaʼami enaʼö adölö wofanömi.
14 ”’Hizaʼi, na lö mifondrondrongo niwaʼögu ba lö mifalua goroisagu,+
15 ba na mitimbagö gamakhoitagu+ ba fatuwu khömi gangetula huku andrö khögu, irege lö miʼoʼö zi no uwaʼö ba misawö mbuʼusa ligu,+
16 hasambalö uhuku ami. Ufatörö khömi wökhö TBC ba fogikhi. Balunö ami ba ahori waʼabölömi. Zaya-zaya gölö wananömi tanömö zinanö börö me si faʼudu khömi zi manga buania.+
17 Utimbagö ami ba kala ami ba danga nudumi.+ Lahundragö ami niha si fatiu tödö khömi+ ba moloi ami hewaʼae na lö solohi yaʼami.+
18 ”’Na lö nasa mirongo wehedegu, ba uhuku ami fitu winaeta moloʼö faʼebua horö nifaluami.
19 Uhöndrögö dania wayawasami, ubaliʼö siʼöli* dalu mbanua khömi+ ba simane tembaga* danömi.
20 Ahori waʼabölömi ba zi lö eluaha, börö me lö mowua danö khömi+ ba lö mowua geu ba mbenua.
21 ”’Na lö miböhöli wolawa yaʼo ba lö mifondrondrongo niwaʼögu, uhuku ami fitu winaeta moloʼö faʼebua horö nifaluami.
22 Ufatenge gurifö samuʼi ba gotaluami,+ ba laʼa nonomi+ awö gurifömi. Alö waʼatomi ba lö niha sanörö lala khömi.+
23 ”’Na no alua khömi daʼa ba lö nasa mirongo degu-degu+ ba lö miböhöli wolawa yaʼo,
24 ulawa göi ami, ba uhuku ami fitu winaeta moloʼö faʼebua horö nifaluami.
25 Ufarou nudumi enaʼö lasuwö ami faoma föda börö me misawö mbuʼusa limi khögu.+ Na moloi ami misa ba mbanuami,+ ufatörö khömi wökhö ba labeʼe ami ba danga nudumi.+
26 Na no uhori mbalazomi si no mihöna,*+ ba lö oya tö zi toröi. Ha sambua dania naha wamogö roti niʼogunaʼö ndra alawe si dafulu ba wamogö roti andrö. Latatugöi dania waʼoya gömi roti.+ Ha daʼö dana khömi ba lö abuso ami.+
27 ”’Na lö nasa mifondrondrongo niwaʼögu ba lö miböhöli wolawa yaʼo,
28 ba abölö-bölö göi wolawagu yaʼami,+ uhuku ami fitu winaeta moloʼö faʼebua horö nifaluami.
29 Börö waʼolofomi dania, miʼa nonomi matua hegöi onomi alawe.+
30 Uhori naha wamosumange*+ awö naha zumange somuhua khömi. Uʼorudugö gamatelami ba dete nadu niʼogorofi*+ khömi ba si lö noso. Uʼerogö ami börö waʼanuzu dödögu.+
31 Ululu ba danga niha dania mbanuami enaʼö ladudugö+ ba utehegö laröi nahia niʼamoniʼö khömi. Lö utema hua zumange nibeʼemi si möi fangomuso dödögu.
32 Ubaliʼö si lö niha-niha dania mbanuami+ irege tobali dödö zi faʼudu khömi si toröi ba daʼö.+
33 Ufazawili ami ba gotalua soi misa+ ba ufagohiʼö ami ba wöda.+ Tobali si lö niha-niha soimi+ ba adudu mbanuami.
34 ”’Sagötö feʼasomi ba danö zi faʼudu khömi, tobali si lö niha-niha soimi ba ibuʼa woʼömönia tanömi sanandrösa ba zabato. Ba luo daʼö, mufolombase* danö börö wamuʼa foʼömömi sanandrösa ba zabato.+
35 Sagötö lö niha ba daʼö, mufolombase danö andrö börö me lö solombase ia sagötö zabato khömi me toröi ami ba daʼö.
36 ”’Ufetaʼu dania niha si toröi+ ba danö nudu irege moloi ira ba ruru mbulu lehu satoru. Hewaʼae lö solohi yaʼira, moloi manö ira hulö nigohi wöda irege telögu ira ba danö.+
37 Simane niha soloi ba wöda, faoma latimba nawöra ba alabu ira hewaʼae lö solohi. Tebai milawa nudumi.+
38 Tehori ami ba soi böʼö,+ ba itölö ami tanö zi faʼudu khömi.
39 Utehegö obou niha si toröi ba danö nudu+ börö zala nifaluami. Obou dölara börö zala nifalua ndra tuara.+
40 Ba lafaduhuʼö wa fasala ira+ ba fasala göi ndra tuara ba no faröi ira. Lafaduhuʼö wa no lalawa ndraʼo ba no faröi ira.+
41 Andrö wa ulawa+ ba uʼohe ira ba danö zi faʼudu khöra.+
”’Maʼatö dania so wangide-ngideʼö+ ba niha sabeʼe tödö* andrö ba labuʼa zala si no lafalua.
42 Itörö tödögu mbuʼusa ligu khö Yakobo,+ Izaʼaki,+ Aberahamo,+ ba lö olifu ndraʼo danö andrö.
43 Sagötö me no laröi danö daʼö ba lö niha-niha, no abuʼa zabato khönia.+ Labuʼa zala si no lafalua börö me latimbagö gangetula huku andrö khögu ba fatuwu khöra gamakhoitagu.+
44 Hewaʼae simanö, me so ira ba danö zi faʼudu khöra, lö saʼozu utimbagö+ mazui uʼerogö ira irege tehori ira. Na ufalua daʼö, no usawö mbuʼusa ligu khöra.+ Yaʼo Yehowa Lowalangira.
45 Börö ira dania wa itörö tödögu mbuʼusa ligu khö ndra tuara+ si no uheta ba danö Miserai ba zanehe soi böʼö,+ ba wangoromaʼö wa Lowalangira ndraʼo. Yaʼo Yehowa.’”
46 Daʼö gamakhoita, angetula huku, ba oroisa Yehowa nibeʼenia ba ndraono Gizaraʼeli, nifaʼemania khö Moze ba Hili Zinaʼi.+
Nisura ba gahe zura
^ Faigi Geluaha Ngawua Wehede.
^ Sin.: ”miʼataʼufi”.
^ Mazui ”kalo mbagi”.
^ Eluahania lö aekhu deu moroi ba mbanua.
^ Eluahania oköli danö börö me lö moteu.
^ Sin.: ”ufatö ziʼomi”. Te daʼa ziʼo naha wosaitagö roti niʼogaladanga.
^ Sin.: ”nahia sagalawa”.
^ Ba li Heberaiʼo te moʼamakhaita ia ba ”zi taʼunö” ba wangoromaʼö faʼogoro.
^ Mazui ”mamalua sabato”.
^ Mazui ”niha si lö nisuna tödö”.
