3 Moze 3:1-17
3 ”’Na mibeʼe zawi si tobali sumange fangatulö+ föna Yehowa, mibeʼe zi lö fökhö, he si matua hegöi si alawe.
2 Mitufa tangami högö zawi andrö ba mitaba föna mbawandruhö nose waʼowulo. Iraono Gaʼaroni si no tobali ere dania zanefeʼö do ba zi fasui naha wanunu sumange.
3 Muhalö ösa zumange andrö ba mubaliʼö sumange nitunu ba galitö khö Yehowa,+ yaʼia daʼö tawö+ waliʼa awö zi so ba zi fasuinia,
4 buania si dombua sahatö ba lafoyo awö dawönia maʼafefu, simanö göi dawö gate.+
5 Latunu daʼö fefu iraono Gaʼaroni yawa ba dete zumange nitunu si so ba dete geu ba naha wameʼe sumange enaʼö numalö miyawa zimbo.+ Daʼö zumange nitunu ba galitö. Hua zumange andrö möi fangomuso dödö Yehowa.+
6 ”’Na mibeʼe mbiri-biri mazui nambi tobali sumange fangatulö föna Yehowa, mibeʼe zi lö fökhö, he si matua hegöi si alawe.+
7 Na mibeʼe mbiri-biri si matua sawuyu-wuyu tobali sumange, miʼohe daʼö föna Yehowa.
8 Mitufa tangami högö mbiri-biri andrö ba mitaba föna mbawandruhö nose waʼowulo. Iraono Gaʼaroni dania zanefeʼö do ba zi fasui naha wanunu sumange.
9 Moroi ba zumange fangatulö andrö, muheta dawönia ba mubaliʼö sumange nitunu ba galitö khö Yehowa,+ yaʼia daʼö iʼonia sotawö* sahatö ba döla hulu, tawö waliʼa awö zi so ba zi fasuinia,
10 buania si dombua sahatö ba lafoyo awö dawönia maʼafefu, simanö göi dawö gate.+
11 Itunu fefu daʼö ere ba naha wanunu sumange enaʼö numalö miyawa zimbo. Daʼö gö* nibaliʼö sumange nitunu ba galitö khö Yehowa.+
12 ”’Na mibeʼe nambi, miʼohe daʼö föna Yehowa.
13 Mitufa tangami högö nambi andrö ba mitaba föna mbawandruhö nose waʼowulo. Iraono Gaʼaroni dania zanefeʼö do ba zi fasui naha wanunu sumange.
14 Mibeʼe ösa tobali sumange nitunu ba galitö khö Yehowa dawö waliʼa awö zi so ba zi fasuinia,+
15 buania si dombua sahatö ba lafoyo awö dawönia maʼafefu, simanö göi dawö gate.
16 Itunu fefu daʼö ere ba naha wanunu sumange enaʼö numalö miyawa zimbo. Daʼö gö* nibaliʼö sumange nitunu ba galitö. Hua zumange andrö möi fangomuso dödögu. Fefu dawö tobali tana khö Yehowa.+
17 ”’Daʼa gamakhoita si lö tebulö mifalua ofeta ba ngaʼötömi, gofu hezo toröi ami: Tebai miʼa dawö, simanö göi ndro.’”+
Nisura ba gahe zura
^ Esolo giʼo mbiri-biri ba götö Zura Niʼamoniʼö. Si löʼö-löʼönia 5 kg waʼabua.
^ Sin.: ”roti”. Eluahania moroi ba zumange fangatulö andrö, daʼa dana khö Yehowa.
^ Sin.: ”roti”. Eluahania moroi ba zumange fangatulö andrö, daʼa dana khö Yehowa.
