3 Moze 4:1-35
-
Sumange fameta horö (1-35)
4 Imane Yehowa khö Moze,
2 ”Fatunö ba ndraono Gizaraʼeli, ’Na so zamalua horö si lö muʼodödögö+ ba wanawö oroisa Yehowa, daʼa zinangea mifalua:
3 ”’Na ere si no mubayoini+ zamalua horö+ ba fasala fefu nono mbanua daʼa ibeʼe, lö tola löʼö ibeʼe khö Yehowa zawi si matua sawuyu-wuyu si lö fökhö si tobali sumange fameta horö ba zala nifaluania.+
4 Iʼohe zawi daʼö ba mbawandruhö nose waʼowulo+ föna Yehowa ba itufa tangania högö zawi andrö. Aefa daʼö, itaba föna Yehowa.+
5 Ere si no mubayoini+ andrö zolohe ösa ndro zawi daʼö bakha ba nose waʼowulo.
6 Iʼungugö durunia ba ndro daʼö+ ba itefeʼö fitu kali+ föna Yehowa, föna nukha mbaʼa-baʼa si so ba nahia niʼamoniʼö.
7 Ifagule ösa ndro daʼö ba dandru naha wanunu sumange soguna ba zumange somuhua+ si so föna Yehowa, bakha ba nose waʼowulo. Iduwagö ndro si töra ba narö naha wanunu sumange nitunu+ si so ba mbawandruhö nose waʼowulo.
8 ”’Ihalö fefu dawö zawi nibeʼe sumange fameta horö andrö, ifaogö dawö waliʼa awö zi so ba zi fasuinia,
9 buania si dombua sahatö ba lafoyo awö dawönia maʼafefu, simanö göi dawö gate.+
10 Enaʼö fagölö daʼö simane nihalö ba zawi si matua nibaliʼö sumange fangatulö.+ Itunu fefu daʼö ere ba naha wanunu sumange nitunu enaʼö numalö miyawa zimbo.
11 ”’Hizaʼi, uli zawi andrö, nagole, högö, ahe, betuʼa, si taʼunönia,+
12 ba fefu danö böʼö moroi ba zawi andrö enaʼö laʼohe baero nose ba naha si no mutatugöi,* yaʼia daʼö naha waniboʼö awu.* Itunu fefu daʼö ere yawa ba dete geu.+ Mutunu daʼö ba naha waniboʼö awu.
13 ”’Na fasala fefu nono mbanua Gizaraʼeli börö horö si lö muʼodödögö,+ hizaʼi lö laʼila wa no lasawö goroisa Yehowa,+
14 ba awena aboto ba dödöra wa no lafalua horö, moguna laʼohe sageu zawi si matua sawuyu-wuyu föna nose waʼowulo ba labeʼe daʼö tobali sumange fameta horö.
15 Ira sondröniaʼö soi daʼö latufa tangara högö zawi andrö föna Yehowa, ba lataba zawi daʼö föna Yehowa.
16 ”’Aefa daʼö, ere si no mubayoini zolohe ösa ndro zawi daʼö bakha ba nose waʼowulo.
17 Iʼungungö durunia ba ndro daʼö ba itefeʼö fitu kali föna nukha mbaʼa-baʼa,+ föna Yehowa.
18 Ifagule ösa ndro daʼö ba dandru naha wanunu sumange+ si so föna Yehowa, bakha ba nose waʼowulo. Iduwagö ndro si töra ba narö naha wanunu sumange nitunu si so ba mbawandruhö nose waʼowulo.+
19 Ihalö fefu dawö zawi andrö ba itunu ba naha wanunu sumange+ enaʼö numalö miyawa zimbo.
20 Ibeʼe zawi daʼa tobali sumange simane sawi si oföna no mege nibaliʼö sumange me ifalua horö. Daʼö zinangea ifalua ba wangatulöʼö yaʼira+ irege teʼefaʼö horöra.
21 Iʼohe baero nose zawi andrö ba itunu simane sawi si oföna no mege.+ Daʼö zumange fameta horö ba ndraono Gizaraʼeli maʼafefu.+
22 ”’Na so samösa zondröniaʼö+ samalua horö si lö muʼodödögö ba wanawö oroisa Yehowa, ba fasala ia,
23 mazui aboto ba dödönia wa no ifalua horö börö me no isawö goroisagu, lö tola löʼö iʼohe sageu nambi si matua sawuyu-wuyu si lö fökhö.
24 Itufa tangania högö nambi sawuyu-wuyu andrö ba itaba föna Yehowa, ba naha wanaba sumange nitunu.+ Daʼö zumange fameta horö.
25 Ihalö ösa ndro zumange daʼö ere faoma turunia ba ifagule ba dandru+ naha wanunu sumange nitunu. Iduwagö ndro si töra ba narö naha wanunu sumange.+
26 Itunu fefu dawö zumange andrö ere enaʼö numalö miyawa zimbo, simane tawö zumange fangatulö.+ Ere zamalua fangatulö khö zondröniaʼö andrö ba teʼefaʼö horönia.
27 ”’Na so ba gotalua soi daʼö zamalua horö si lö muʼodödögö ba wanawö oroisa Yehowa, ba fasala ia,+
28 mazui aboto ba dödönia wa no ifalua horö, lö tola löʼö ibeʼe sageu nambi si alawe sawuyu-wuyu si lö fökhö si tobali sumange fameta horönia.
29 Itufa tangania högö gurifö nibeʼe sumange andrö, ba itaba ba naha wanaba sumange nitunu.+
30 Ihalö maʼifu ndro nambi daʼö ere faoma turunia ba ifagule ba dandru naha wanunu sumange nitunu. Iduwagö ndro si töra ba narö naha wanunu sumange.+
31 Ihalö fefu dawö+ zumange andrö ere simane nifalua ba dawö zumange fangatulö.+ Itunu fefu dawö zumange andrö enaʼö numalö miyawa zimbo. Hua zumange andrö möi fangomuso dödö Yehowa. Ere zamalua fangatulö khönia ba teʼefaʼö horönia.
32 ”’Hizaʼi, na ibeʼe mbiri-biri tobali sumange fameta horö, lö tola löʼö ibeʼe sageu mbiri-biri si alawe sawuyu-wuyu si lö fökhö.
33 Itufa tangania högö gurifö nibeʼe sumange andrö, ba itaba ba naha wanaba sumange nitunu si tobali sumange fameta horö.+
34 Ihalö ösa ndro nambi daʼö ere faoma turunia ba ifagule ba dandru naha wanunu sumange nitunu.+ Iduwagö ndro si töra ba narö naha wanunu sumange.
35 Ihalö fefu dawö zumange andrö ere simane nifalua ba dawö mbiri-biri si matua sawuyu-wuyu si tobali sumange fangatulö. Itunu fefu dawö zumange andrö ba naha wanunu sumange, ba dete zumange nitunu ba galitö khö Yehowa enaʼö numalö miyawa zimbo.+ Ere zamalua fangatulö khönia ba teʼefaʼö horönia.+
Nisura ba gahe zura
^ Sin.: ”naha si lö taʼunö”.
^ Mazui ”awu sotawö”, yaʼia daʼö awu si no mufaruka ba dawö gurifö nibeʼe sumange.
