3 Moze 6:1-30
6 Imane zui Yehowa khö Moze
2 ”Na managö zi samösa niha, mazui falimo ia, mazui lö ibuʼa zi no ifiza mazui ilimo niröi khönia,+ tobali horönia daʼö ba no faröi ia khö Yehowa,+
3 mazui isöndra gama-gama satoru ba falimo ia. Na möi ia ba hölu wa lö nifaluania daʼö,+ daʼa zinangea ifalua:
4 Na no ifalua daʼö ba fasala ia, lö tola löʼö ifuli zi no itagö mazui nisöndrania ba walimosa mazui nirabunia, mazui niröi khönia, mazui gama-gama nisöndrania,
5 mazui gofu hadia nisöndrania börö me fahölu ia ba waya. Hasambalö afönu wamuʼania fangali,+ inönö sambua niʼolima moroi ba zi no ihalö. Lö tola löʼö ibeʼe daʼö fefu ba zokhö ba ginötö mufaduhuʼö wa yaʼia zi fasala.
6 Ibeʼe göi sageu mbiri-biri si matua moloʼö faʼebua mböli si no mutatugöi ba iʼohe khö gere tobali sumange fameta zala+ khö Yehowa.
7 Ere dania zamalua fangatulö khönia föna Yehowa ba teʼefaʼö fefu zala nifaluania.”+
8 Imane zui Yehowa khö Moze,
9 ”Fatunö khö Gaʼaroni hegöi ba ndraononia matua, ’Daʼa goroisa sanandrösa ba zumange nitunu:+ Enaʼö latunu ba galitö zumange andrö sara wongi waʼara ofeta moluo. Tebai mate galitö ba naha wanunu sumange andrö.
10 Ifake mbaru sebua khönia ere nifazökhi moroi ba nukha si sökhi,+ ba ifake zarewa sadogo-dogo*+ nifazökhi moroi ba nukha si sökhi. Aefa daʼö, ifazawa nawu*+ zumange nitunu andrö moroi ba naha wanunu sumange ba itiboʼö ba zinga naha wanunu sumange.
11 Aefa daʼö, igati zui nukhania+ faoma nukha tanö böʼö ba iʼohe nawu andrö baero nose, ba naha si no mutatugöi.*+
12 Tebai mate hola-hola galitö ba naha wanunu sumange. Tebai mubunu. Ero sihulö wongi, möi gere wameʼe eu ba galitö+ andrö ba ibeʼe zumange nitunu yawa ba dete. Itunu dawö zumange fangatulö andrö yawa ba dete zumange nitunu irege numalö miyawa zimbo.+
13 Muhonogöi enaʼö lö mate galitö ba naha wanunu sumange. Tebai mubunu.
14 ”’Daʼa goroisa sanandrösa ba zumange niʼa:*+ Iraono Gaʼaroni zolohe daʼö föna Yehowa ba naha wanunu sumange.
15 Samösa moroi ba gotalua gere ihalö sandraʼu darigu si sökhi hegöi fanikha moroi ba zumange niʼa, ba fefu gumöyö ba detenia. Itunu fefu daʼö ba naha wanunu sumange enaʼö numalö miyawa zimbo, ba wosalahini ngawalö zumange.* Hua zumange andrö möi fangomuso dödö Yehowa.+
16 Aʼaroni zi manga si toröi hamo darigu andrö awö ndraononia matua.+ Mufazökhi daʼö tobali roti si lö mufaruka ragi ba muʼa ba zi sambua naha niʼamoniʼö. Laʼa daʼö ba golayama nose waʼowulo.+
17 Na mufazökhi roti andrö, böi mufaruka ragi.+ No ubeʼe daʼö tobali tana khöra moroi ba zumange nitunu ba galitö khögu.+ Fondrege niʼamoniʼö daʼö,+ fagölö simane sumange fameta horö ba sumange fameta zala.
18 Fefu nono matua ngaʼötö Gaʼaroni, daʼö zi manga.+ Daʼö dana khöra hegöi ngaʼötöra sagötö faʼara moroi ba zumange nitunu ba galitö khö Yehowa.+ Gofu hadia zi göna ba zumange daʼö, tobali niʼamoniʼö.’”
19 Imane zui Yehowa khö Moze,
20 ”Na tefataro*+ Gaʼaroni tobali ere sebua, ero maʼökhö ibeʼe zumange niʼa+ khö Yehowa, lafalua göi zimane daʼö iraononia, yaʼia daʼö 2,2 liter*+ hamo darigu si sökhi. Matonga labeʼe sihulö wongi, ba matonga ba zi bongi.
21 Lafaruka hamo andrö ba wanikha yawa ba kuali saloʼo.+ Me no ahori faruka, mutataba zumange andrö tobali sumange niʼa si no mubogö. Hua zumange andrö möi fangomuso dödö Yehowa.
22 Dozi ngaʼötö Gaʼaroni si no mufataro* tobali ere sebua,+ hasambalö lafalua daʼö fefu. Daʼa gamakhoita si lö tebulö götö-götö waʼara: Mutunu fefu zumange andrö khö Yehowa enaʼö numalö miyawa zimbo.
23 Latunu fefu zumange niʼa moroi khö ndra ere. Tebai laʼa daʼö.”
24 Imane Yehowa khö Moze,
25 ”Fatunö khö Gaʼaroni hegöi ba ndraononia matua, ’Daʼa goroisa sanandrösa ba zumange fameta horö:+ Sumange daʼa enaʼö lataba föna Yehowa ba naha wanaba sumange nitunu.+ Fondrege niʼamoniʼö daʼö.
26 Ere sameʼe sumange fameta horö andrö, daʼö zi manga.+ Iʼa daʼö ba zi sambua nahia niʼamoniʼö ba golayama nose waʼowulo.+
27 ”’Gofu hadia zi göna ba zumange daʼö, tobali niʼamoniʼö. Na tokana ba mbaru zi samösa niha ndro zumange andrö, isasai mbaru daʼö ba zi sambua nahia niʼamoniʼö.
28 Bowoa tanö niʼogunaʼö ba wondrino sumange andrö, lö tola löʼö mufakiko. Hizaʼi, na ba mbowoa tembaga murino ia, muhaogö wondrundrukhu ba musasai ba nidanö.
29 ”’Dozi ira matua si no tobali ere, daʼö zi manga.+ Fondrege niʼamoniʼö daʼö.+
30 Hizaʼi, tebai muʼa zumange fameta horö na no laʼohe ösa ndronia bakha ba nose waʼowulo soguna ba wangatulö ba nahia niʼamoniʼö.+ Hasambalö latunu.
Nisura ba gahe zura
^ Mazui ”nawu sotawö”, yaʼia daʼö awu si no mufaruka ba dawö gurifö nibeʼe sumange.
^ Mazui ”nono zarewa”.
^ Sin.: ”naha si lö taʼunö”.
^ Mazui ”zumange bua nowi”.
^ Mazui ”ba wanörö tödö sumange andrö maʼafefu”.
^ Sin.: ”tebayoini”.
^ Sin.: ”mubayoini”.
