3 Moze 7:1-38
7 ”’Daʼa goroisa sanandrösa ba zumange fameta zala:+ Fondrege niʼamoniʼö zumange daʼa.
2 Urifö nibaliʼö sumange fameta zala, lataba ba naha wanaba sumange nitunu. Mutefeʼö ndronia+ ba zi fasui naha wanunu sumange.+
3 Beʼe fefu dawönia tobali sumange,+ farahugö giʼonia sotawö, tawö waliʼa,
4 buania si dombua sahatö ba lafoyo ba fefu dawönia hegöi tawö gate.+
5 Itunu daʼö ere ba naha wanunu sumange irege numalö miyawa zimbo tobali sumange nitunu ba galitö khö Yehowa.+ Daʼö zumange fameta zala.
6 Dozi ira matua si no tobali ere, daʼö zi manga.+ Laʼa daʼö ba zi sambua nahia niʼamoniʼö. Fondrege niʼamoniʼö daʼö.+
7 Oroisa sanandrösa ba zumange fameta horö, mufalua göi zimane daʼö ba zumange fameta zala. Tobali tana khö gere nagole zumange andrö börö me yaʼia zameʼe sumange fangatulö.+
8 ”’Na so niha samasao sumange nitunu khö gere, uli+ zumange daʼö tobali tana khö gere.
9 ”’Fefu zumange niʼa* si no mubogö, nirino ba mbowoa mazui ba kuali saloʼo,+ tobali tana khö gere sameʼe yaʼia. Daʼö dana khönia.+
10 Hizaʼi, sumange si lö murino, he nifaruka ba wanikha+ mazui soköli,+ tobali tana khö nono Gaʼaroni fefu. Fagölö-gölö fefu gurakha nitemara.
11 ”’Daʼa goroisa na so zomasi mameʼe sumange fangatulö+ khö Yehowa:
12 Na ibeʼe zumange andrö ba wangandrö saohagölö,+ enaʼö ibeʼe göi roti si lö mufaruka ragi niʼogaladanga si no mufaruka fanikha, roti sanifi-nifi si lö mufaruka ragi nifagule fanikha, ba roti niʼogaladanga moroi ba hamo darigu si sökhi nifaruka fanikha.
13 Ibeʼe göi roti niʼogaladanga si no mufaruka ragi awö zumange fangatulö niʼohenia ba wangandrö saohagölö.
14 Moguna ibeʼe khö Yehowa fazambua moroi ba zi hauga ngawalö roti andrö tobali tana niʼamoniʼö. Daʼö zi tobali tana khö gere sanefeʼö do zumange fangatulö.+
15 Nagole moroi ba zumange fangatulö nibeʼe ba wangandrö saohagölö andrö enaʼö muʼa ba ngaluo mubeʼe ia. Tebai mubeʼe yawa ofeta mahemolu sihulö wongi.+
16 ”’Na ibeʼe gurifö andrö tobali sumange ba wamalua buʼusa li+ mazui sumange si no aoha gölö fameʼe+ enaʼö muʼa ba ngaluo mubeʼe ia, ba tola muʼa zi törania mahemolu sihulö wongi.
17 Hizaʼi, na so nagole si töra irugi ba ngaluo si tölu, ba mitunu.+
18 Na muʼa nagole andrö ba ngaluo si tölu, lö hadöi hare nitema niha sameʼe sumange daʼö. Lö omuso dödögu khönia. Ogoro ndraʼo nagole zumange daʼö, ba iluʼi lua-luania dania niha si manga nagole andrö.+
19 Böi miʼa nagole si no göna ngawalö zi raʼiö. Mitunu daʼö. Ha niha si lö raʼiö zi tola manga nagole nibeʼe tobali sumange.
20 ”’Na so niha si no raʼiö si manga nagole zumange fangatulö andrö nibeʼe khö Yehowa, mibunu niha daʼö.*+
21 Na so zi manga nagole zumange fangatulö nibeʼe khö Yehowa, hizaʼi no ibabaya zi raʼiö börö waʼaraʼiö niha,+ urifö si raʼiö,+ mazui gofu hadia zi raʼiö hegöi niʼogorofi,+ mibunu niha daʼö.’”*
22 Imane nasa Yehowa khö Moze,
23 ”Fatunö ba ndraono Gizaraʼeli, ’Tebai miʼa dawö+ zawi si matua, biri-biri si matua sawuyu-wuyu mazui nambi.
24 Tawö gurifö si mate me musöndra mazui nibunu gurifö böʼö, tola muʼogunaʼö ba danö böʼö, hizaʼi tebai miʼa.+
25 Na so zi manga tawö gurifö nibaliʼö sumange nitunu ba galitö khö Yehowa, mibunu niha daʼö.*
26 ”’Gofu hezo toröi ami, tebai miʼa ndro+ wofo mazui do gurifö tanö böʼö.
27 Mibunu niha si manga do.’”*+
28 Imane nasa Yehowa khö Moze,
29 ”Fatunö ba ndraono Gizaraʼeli, ’Dozi solohe sumange fangatulö khö Yehowa, enaʼö ibeʼe ösa zumange andrö khö Yehowa.+
30 Iʼohe dawö gurifö daʼö+ faoma tangania samösa ba itunu tobali sumange khö Yehowa. Ibeʼe göi dötöʼa gurifö andrö ba ifazaule-zaule tobali sumange nifazaule+ föna Yehowa.
31 Ere zanunu tawö gurifö andrö ba naha wanunu sumange enaʼö numalö miyawa zimbo.+ Hizaʼi, tötöʼa gurifö andrö tobali tana khö Gaʼaroni hegöi iraononia matua.+
32 ”’Moroi ba zumange fangatulö nibeʼemi, ahe kambölö gurifö andrö mibeʼe tobali tana niʼamoniʼö khö gere.+
33 Ahe kambölö andrö tobali tana khö gere ngaʼötö Gaʼaroni sameʼe do hegöi tawö zumange fangatulö.+
34 Moroi ba zumange fangatulö nibeʼemi, ubeʼe dötöʼa zumange nifazaule-zaule andrö awö gahe kambölö, yaʼia daʼö tana niʼamoniʼö khö Gere Aʼaroni hegöi iraononia matua. Daʼa gamakhoita si lö tebulö lafalua iraono Gizaraʼeli irugi zi lö aetu.+
35 ”’Moroi ba zumange nitunu ba galitö khö Yehowa, daʼö dana khö Gaʼaroni hegöi iraononia matua iʼotarai me teʼohe ira ba wangai halöwö tobali ere khö Yehowa.+
36 Iʼotarai me tefataro* ira tobali ere, no iʼoroiʼö Yehowa enaʼö labeʼe daʼö iraono Gizaraʼeli tobali tana khöra.+ Daʼa gamakhoita si lö tebulö lafalua iraono Gizaraʼeli irugi zi lö aetu.’”
37 Daʼö gamakhoita sanandrösa ba zumange nitunu,+ sumange niʼa,+ sumange fameta horö,+ sumange fameta zala,+ sumange fangatulö,+ ba sumange famataro.+
38 Yehowa zameʼe amakhoita daʼa khö Moze ba Hili Zinaʼi,+ yaʼia daʼö me muʼoroiʼö ba ndraono Gizaraʼeli wameʼe sumange khö Yehowa ba Danö si Mate Zinaʼi.+
Nisura ba gahe zura
^ Mazui ”zumange bua nowi”.
^ Sin.: ”miheta ia moroi ba soinia”.
^ Sin.: ”miheta ia moroi ba soinia”.
^ Sin.: ”miheta ia moroi ba soinia”.
^ Sin.: ”Miheta ia moroi ba soinia”.
^ Sin.: ”tebayoini”.
