3 Moze 8:1-36
-
Mufataro Gaʼaroni hegöi ngaʼötönia tobali ere (1-36)
8 Imane zui Yehowa khö Moze,
2 ”Kaoni Gaʼaroni hegöi iraononia matua,+ ba ohe mbaru gere,+ fanikha famataro,*+ sawi si matua si tobali sumange fameta horö, dua ngaʼeu mbiri-biri si matua hegöi raga-raga nifoʼösi faoma roti si lö mufaruka ragi.+
3 Ba waʼö ba ndraono Gizaraʼeli fefu enaʼö owulo ira föna mbawandruhö nose waʼowulo.”
4 Ifalua daʼö Moze simane niwaʼö Yehowa, ba owulo fefu ndraono Gizaraʼeli föna mbawandruhö nose waʼowulo.
5 Imane Moze ba niha sato, ”Yehowa zangumaʼö khöda enaʼö tafalua daʼa.”
6 Ba möi Moze wogaoni Aʼaroni hegöi iraononia matua, iwaʼö khöra enaʼö lasasai ira ba nidanö.+
7 Aefa daʼö, ibeʼe khö Gaʼaroni mbaru sebua,+ böbö löwi,+ awö mbaru sanau si lö taʼio.+ Ifonukha Gaʼaroni faoma nukha gere*+ ba ibeʼe mböbö löwi+ nukha gere enaʼö fandroli wamöbö yaʼia.
8 Ifasa göi mbalu-balu dötöʼa+ ba ibeʼe bakha ba daʼö Gurimi hegöi Tumimi.+
9 Ihalö mböbö högö+ ba ibeʼe khö Gaʼaroni. Föna mböbö högö andrö ibeʼe mbala högö si takile moroi ba ganaʼa, yaʼia daʼö tandra wolulu faʼauri niʼamoniʼö.+ Ifalua fefu daʼö Moze simane sibai niwaʼö Yehowa khönia.
10 Lö ara, ihalö Moze wanikha famataro,* itefeʼö ba nose Lowalangi awö gama-gama si so bakha ba daʼö,+ ba iʼamoniʼö fefu.
11 Ihalö ösa wanikha daʼö ba itefeʼö fitu kali ba naha wanunu sumange awö fefu gama-gamania, simanö göi ba mbaʼa nidanö hegöi tuwu-tuwunia, ba iʼamoniʼö fefu daʼö.
12 Ba gafuriata, ifaduwa ösa wanikha famataro* daʼö ba högö Gaʼaroni ba ibayoini enaʼö tola ifalua halöwö niʼamoniʼö.+
13 Aefa daʼö, mohede Moze khö ndraono Gaʼaroni enaʼö lafahatö ira ba ibeʼe khöra mbaru sebua, böbö löwi hegöi balu-balu högö,+ simane niwaʼö Yehowa khönia.
14 Ba möi Moze wolohe sawi si matua si tobali sumange fameta horö. Aʼaroni ba fefu ndraononia matua latufa tangara högö zawi andrö si tobali sumange.+
15 Itaba zawi daʼö Moze ba iʼungugö durunia ba ndro+ gurifö andrö, ba ifagule ba dandru si so ba naha wanunu sumange, enaʼö teʼamoniʼö naha wanunu sumange andrö. Hizaʼi, iduwagö ndro si töra ba narö naha wanunu sumange. Simane daʼö lala wangamoniʼö yaʼia enaʼö tola muʼogunaʼö ba wameʼe sumange.
16 Ihalö fefu Moze dawö waliʼa, tawö gate awö mbua si dombua hegöi tawönia, ba itunu ba naha wanunu sumange enaʼö numalö miyawa zimbo.+
17 Si töra yaʼia daʼö nagole, uli hegöi si taʼunönia, itunu baero nose,+ simane niwaʼö Yehowa khö Moze.
18 Aefa daʼö, iʼohe mbiri-biri si matua tobali sumange nitunu. Aʼaroni ba fefu ndraononia matua latufa tangara högö mbiri-biri andrö.+
19 Itaba gurifö andrö Moze ba itefeʼö ndronia ba zi fasui naha wanunu sumange.
20 Itatawi mbiri-biri daʼö ba itunu fefu fabaya högö hegöi tawönia* enaʼö numalö miyawa zimbo.
21 Oföna isasai mbetuʼa awö gahenia, awena itunu ba naha wanunu sumange enaʼö numalö miyawa zimbo. Daʼö zumange nitunu, ba hua zumange andrö möi fangomuso dödö. Daʼö zumange nitunu ba galitö khö Yehowa, simane niwaʼö Yehowa khö Moze.
22 Ba iʼohe sageu tö mbiri-biri si matua Moze, yaʼia daʼö biri-biri famataro.+ Aʼaroni hegöi iraononia matua latufa tangara högö mbiri-biri andrö.+
23 Itaba mbiri-biri daʼö Moze, ba ifagule ösa ndronia ba dalinga kambölö, turu sebua ba danga kambölö, awö duturu kahe sebua ba gambölö Gaʼaroni.
24 Aefa daʼö, mohede Moze khö ndraono Gaʼaroni ba ifagule ndro daʼö ba dalinga kambölö, turu sebua ba danga kambölö, awö duturu kahe sebua ba gambölöra. Itefeʼö ndro si töra ba zi fasui naha wanunu sumange andrö.+
25 Ihalö dawö, iʼo sotawö, tawö waliʼa, tawö si so ba gate, bua si dombua fao dawö hegöi ahe kambölö.+
26 Moroi ba raga-raga roti si lö mufaruka ragi si so föna Yehowa, ihalö sambua roti niʼogaladanga andrö Moze,+ sambua roti niʼogaladanga nifaruka fanikha,+ ba sambua roti sanifi-nifi. Ibeʼe fefu daʼö ba dete dawö hegöi ahe kambölö mbiri-biri andrö.
27 Ba ihalö fefu daʼö Moze, ibeʼe ba laluʼa danga Gaʼaroni hegöi iraononia matua. Fefu daʼö lafazaule föna Yehowa tobali sumange nifazaule.
28 Me no awai daʼö, ifuli ihalö ba dangara Moze ba itunu yawa ba dete naha wanunu sumange nitunu, enaʼö numalö miyawa zimbo. Daʼö fefu zumange famataro, ba hua zumange andrö möi fangomuso dödö. Daʼö zumange nitunu ba galitö khö Yehowa.
29 Ba ihalö döla nosu mbiri-biri andrö Moze, ifazaule föna Yehowa tobali sumange nifazaule.+ Tana khö Moze döla nosu mbiri-biri famataro andrö, simane niwaʼö Yehowa khönia.+
30 Ihalö maʼifu wanikha famataro*+ hegöi do si so ba naha wanunu sumange, itefeʼö khö Gaʼaroni hegöi ba ndraononia matua, simanö göi nukhara. Simane daʼö wangamoniʼönia Aʼaroni, iraononia matua+ awö nukhara.+
31 Ba imane Moze khö Gaʼaroni hegöi iraononia matua, ”Rino+ nagole mbiri-biri andre föna mbawandruhö nose waʼowulo. Ba daʼö miʼa fabaya roti si so ba raga-raga niʼogunaʼö me mufataro ami. Lö tola löʼö miʼa+ börö me daʼö niʼoroiʼö khögu.
32 Mitunu fefu nagole mazui roti si toröi.+
33 Tebai mofanö ami ba zinga mbawandruhö nose waʼowulo sagötö zi fitu hari irege awai wamataro yaʼami, börö me moguna fitu hari ginötö wamataro yaʼami tobali ere.*+
34 Yehowa zangumaʼö khöda enaʼö tafalua fefu daʼa maʼökhö ba wangatulöʼö yaʼami.+
35 Tebai mofanö ami ba zinga mbawandruhö nose waʼowulo bongi maʼökhö sagötö zi fitu hari,+ ba mifalua halöwömi khö Yehowa+ faböi mate ami. Daʼö zi no muʼoroiʼö khögu.”
36 Ba lafalua fefu niwaʼö Yehowa andrö ira Aʼaroni hegöi iraononia matua, nifaʼemania khö Moze.
Nisura ba gahe zura
^ Sin.: ”famayoini”.
^ Mazui ”efod”. Daʼa mbaru sebua si so tanö föna ba tanö furi.
^ Sin.: ”famayoini”.
^ Sin.: ”famayoini”.
^ Mazui ”tawö ba zi fasui bua”.
^ Sin.: ”famayoini”.
^ Sin.: ”ba wofönui tangami”.
