Sura Yohane si Tölu 1:1-14
1 Moroi khö zatua si no alawa döfi,* khö Gayo niʼomasiʼö, fondrege niʼomasiʼögu.
2 Talifusögu niʼomasiʼö, mangandrö ndraʼo enaʼö lö mofökhö ndraʼugö ba lö hadia ia khöu simane iadaʼa.
3 Omuso sibai dödögu me tohare ndra talifusö ba latutunö wa lö si faröi ndraʼugö ba zindruhu hegöi ba woloʼö lala satulö andrö.+
4 Lö faʼomuso dödögu* sebua baero wamondrongo me lö laböhöli wanörö lala sindruhu iraonogu.+
5 Talifusögu niʼomasiʼö, lö faröi ndraʼugö wohalöwö khö ndra talifusö, hewaʼae lö öʼila haniha ira.+
6 Lafaduhuʼö föna mbanua niha Keriso waʼomasimö. Na mofanö ira dania, tolo ira simane niʼandrö Lowalangi.+
7 Börö döi Lowalangi wa mofanö ira, ba lö manötöna ira+ ba soi böʼö si lö mamati.
8 Andrö wa moʼömö ita ba wanemaʼö yaʼira soroi ba dödö,+ enaʼö falulu fohalöwö ita ba zindruhu.+
9 No irai ufaʼoheʼö zura ba mbanua niha Keriso, hizaʼi iʼaohasi ba dödö+ fefu niwaʼöma Dioterefe börö me edöna ia tobali siföföna ba gotaluami.+
10 Börö zimanö, na tohare ndraʼo dania, ututunö hewisa me iböbögö khöma zi lö duhu.*+ Börö me ambö khönia nifaluania, lö ihaogö wanemaʼö ira talifusö.+ Itenawa niha somasi manemaʼö yaʼira, ba iʼalui lala wangefaʼö niha andrö moroi ba mbanua niha Keriso.
11 Talifusögu niʼomasiʼö, böi oʼö zi lö sökhi, hizaʼi oʼö zi sökhi.+ Moroi khö Lowalangi niha samalua si sökhi,+ ba samalua si lö sökhi lö saboto ba dödönia Lowalangi.+
12 Sökhi duria Demeterio niʼombakhaʼö ndra talifusö, ba tefaudu lala waʼaurinia ba zindruhu. Mafaduhuʼö samösa göi ia, ba öʼila wa atulö wamaduhuʼöma.
13 Oya zedöna usura menaʼö, ba lö omasido uʼogunaʼö fena faoma taŵa ba wanura yaʼia.
14 Utötöna sibai enaʼö alio falukha ita ba talau fahuo-huo.
Yaʼohahau dödöu.
Laʼowai ndraʼugö ira talifusö. Faʼema göi wangowaigu khö ndra talifusöda ero samö-samösa.
Nisura ba gahe zura
^ Mazui ”zatua sokubaloi”.
^ Mazui te ”fangandrögu saohagölö”.
^ Sin.: ”ifatou ndraʼaga faoma fehede si lö sökhi”.
