4 Moze 10:1-36
10 Imane Yehowa khö Moze,
2 ”Fazökhi dombua dorofe+ niböbözi moroi ba wirö. Ogunaʼö daʼö ba wangowuloi iraono Gizaraʼeli hegöi ba wamofanö yaʼira.
3 Na mufoli dorofe si dombua andrö ba owulo fefu ndraono Gizaraʼeli wamalukhaisi yaʼugö ba mbawandruhö nose waʼowulo.+
4 Na ha sambua dorofe nifoli, ha ira kumandru zi saribu ba ndraono Gizaraʼeli zamalukhaisi yaʼugö.+
5 ”Na faböʼö-böʼö wamoli torofe,* eluahania mofanö ngawawa mado sanaruʼö osera tanö ba gatumbukha.+
6 Na faböʼö-böʼö wamoli torofe ba zi mendrua kali, eluahania mofanö ngawawa mado sanaruʼö osera tanö raya.+ Simane daʼö wamoli torofe ero so ngawawa sofanö.
7 ”Na muʼowuloi ndraono Gizaraʼeli, mufoli dorofe+ hizaʼi lö lafaböʼö-böʼöni wamoli.
8 Iraono Gaʼaroni, yaʼia daʼö ira ere, daʼö zamoli torofe andrö.+ Simane daʼö na mifoli dorofe irugi zi lö aetu ofeta ba ngaʼötömi.
9 ”Na fasuwö ami ba wolawa niha samakao yaʼami ba soimi, mifoli dorofe tandra wasuwöta.+ Itörö tödö Yehowa ami ba iʼefaʼö ami ba danga nudu.
10 ”Simane daʼö göi na omuso dödömi,+ he na mifalua gowasa+ mazui ba mbaŵa si bohou, mifoli dorofe föna zumange nitunu+ hegöi sumange fangatulö.+ Daʼö mbörö wa itörö tödö Lowalangi ami. Yaʼo Yehowa Lowalangimi.”+
11 Ba ngaluo si 20 ba mbaŵa si 2 ba ndröfi si 2,+ tefazawa döla lawuo yawa nose Lowalangi+ si so Famaduhuʼö.
12 Ba mofanö ndraono Gizaraʼeli moroi ba Danö si Mate Zinaʼi, laʼoʼö zi no mufakhoi ba wofanö.+ Ba tebato döla lawuo andrö ba Danö si Mate Farana.+
13 Daʼö zi oföna sibai wofanöra moloʼö niwaʼö Yehowa khö Moze.+
14 Si oföna mofanö yaʼia daʼö si tölu ngawawa mado nidöniaʼö Yehuda, moloʼö ngawawara* zamösana. Sondröniaʼö ngawawa daʼö Nahaso+ ono Gaminadabi.
15 Sondröniaʼö mado Gisasari yaʼia daʼö Netaneʼeli+ ono Zuara.
16 Sondröniaʼö mado Zebuloni yaʼia daʼö Eliabi+ ono Helono.
17 Me labokai nose Lowalangi+ ba mofanö ngaʼötö Gereso+ hegöi ngaʼötö Merari.+ Yaʼira zamazawa ose Lowalangi.
18 Aefa daʼö, mofanö zi tölu ngawawa mado nidöniaʼö Rubeno moloʼö ngawawara* zamösana. Sondröniaʼö ngawawa daʼö Elisuri+ ono Zedeuri.
19 Sondröniaʼö mado Zimeoni yaʼia daʼö Selumieli+ ono Zurisadaʼi.
20 Sondröniaʼö mado Gado yaʼia daʼö Eliazafi+ ono Degueli.
21 Lö ara, mofanö ngaʼötö Gahati samazawa gama-gama ba naha niʼamoniʼö.+ Enaʼö no tefasindro nose Lowalangi ba ginötö larugi.
22 Ba mofanö zi tölu ngawawa mado nidöniaʼö Geferai moloʼö ngawawara* zamösana. Sondröniaʼö ngawawa daʼö Elisama+ ono Gamihudi.
23 Sondröniaʼö mado Manase yaʼia daʼö Gamalieli+ ono Wedasuri.
24 Sondröniaʼö mado Mbeniami yaʼia daʼö Abidano+ ono Gideono.
25 Aefa daʼö, mofanö zi tölu ngawawa mado nidöniaʼö Dano moloʼö ngawawara* zamösana. Tobali ira saradadu si so tanö furi ngawawa maʼafefu. Sondröniaʼö ngawawa daʼö Ahieseri+ ono Gamisadai.
26 Sondröniaʼö mado Gaseri yaʼia daʼö Fagieli+ ono Gokherana.
27 Sondröniaʼö mado Nafetali yaʼia daʼö Ahira+ ono Genani.
28 Simane daʼö wamöföʼö fofanö ndraono Gizaraʼeli hegöi saradadura.+
29 Ba imane Moze khö Hobaba ono Regueli*+ ama matua Moze niha Midiano andrö, ”Mofanö ndraʼaga ba nahia si no ituturu khöma Yehowa.+ Aine, fao khöma.+ Sökhi dödöma khöu börö me no ifabuʼu Yehowa wa ibeʼe dania ngawalö zi sökhi ba ndraono Gizaraʼeli.”+
30 Hizaʼi imane, ”Lö möido. Mangawulido ba soigu hegöi ba nösi nomogu.”
31 Imane Moze, ”Maʼandrö khöu böi röi ndraʼaga, börö me yaʼugö zangila hezo zi tefaudu mataruʼö nosema ba danö si mate. Tola tobali ndraʼugö sanuturu lala khöma.
32 Na fao ndraʼugö,+ gofu hadia howu-howu nibeʼe Yehowa khöma, hasambalö mabeʼe khöu ösa.”
33 Ba mofanö ira iʼotarai hili nifili Yehowa,+ tölu hari ira ba lala ba wangalui naha wolombase. Tanö föna labeʼe dawöla+ amabuʼula li Yehowa sagötö fofanöra.+
34 Töla lawuo moroi khö Yehowa+ zanuturu lalara ba zi maʼökhö.
35 Ero lafazawa Dawöla, imane Moze, ”Faoso yaʼugö Yehowa+ ba fazawili misa zi faʼudu khöu. Yamoloi fönau niha si fatiu tödö khöu.”
36 Ba na latouʼö tou Dawöla andrö lamane, ”He Yehowa, fuliʼö ba ndraono Gizaraʼeli si hauga ribu faʼato si tebai muʼerai.”+
Nisura ba gahe zura
^ Mazui ”Na ebua mazui ide-ide ba anau mazui adogo-dogo li dorofe”.
^ Sin.: ”saradadura”.
^ Sin.: ”saradadura”.
^ Sin.: ”saradadura”.
^ Sin.: ”saradadura”.
^ Yaʼia daʼö Yetero.
