4 Moze 11:1-35
11 Ibörögö fatahi ndraono Gizaraʼeli khö Yehowa hulö na itörö ira faʼatosasa. Me irongo daʼö Yehowa, mofönu sibai ia. Ibözi ira alitö moroi khö Yehowa ba so ösa zakhozi ba zinga nose.
2 Me laʼandrö wanolo khö Moze, mangandrö ia khö Yehowa+ ba awena tebato galitö.
3 Lafotöi nahia daʼö Tabera,* börö me ibözi ira alitö moroi khö Yehowa.+
4 Ogoluʼa-luʼa sibai+ niha si fatewu*+ si fao khöra, ba ibörögö meʼe ndraono Gizaraʼeli lamane, ”Omasiga maʼa nagole.+
5 Me so ndraʼaga ba Miserai mböröta, toʼölö ndraʼaga wemanga iʼa ba lö mabuʼa mböli, simanö göi laʼizu, kamandriki, baŵa perei, baŵa soyo hegöi baŵa safusi!+
6 Hizaʼi, lö hadöi faʼabölöma iadaʼa, ha mana andre niʼila-ilama.”+
7 Hulö ngawua ketumbar+ mana+ daʼö ba hulö gitö* na mufaigi.
8 Si toʼölönia, laʼanöröi iraono Gizaraʼeli wangozaragö mana ba lagili faoma tangara mazui latutu ba lösu. Aefa daʼö larino ba mbowoa mazui lafazökhi tobali kue sowulo-wulo.+ Hulö raso kue sami si no mufaruka fanikha.
9 Na atoru namo mbanua ba zi bongi gamaudu naha nose, ba atoru göi mana.+
10 No irongo Moze wege-ege ndraono Gizaraʼeli, dozi omo, föna mbawandruhö nosera zamösana. Ba mofönu sibai Yehowa+ ba fatuwu göi khö Moze nifaluara andrö.
11 Andrö imane Moze khö Yehowa, ”Hana wa öfakao nono mbanuamö andre? Hadia zalagu khöu irege lö omuso dödöu khögu ba öfaluʼigö khögu soi daʼa?+
12 Hadia tabinagu mege soi daʼa? Hadia yaʼo zoʼadonogö yaʼira irege öwaʼö khögu woluʼi yaʼira, simane solaya* iraono side-ide, weʼamöi ba danö nifabuʼumö si no möiʼö ba hölu khö ndra tuara?+
13 Hezo uʼalui nagole ö ndra niha daʼa? Lö labato weʼe ba lamane khögu, ’Beʼe öma nagole!’
14 Lö sagu khögu wolohe soi daʼa na ha yaʼo, marasedo.+
15 Na simane daʼa ndraʼugö khögu, sökhi manö bunudo iadaʼa.+ Ba na ahakhö dödöu ndraʼo, böi nönö gabula dödögu saʼae.”
16 Imane Yehowa khö Moze, ”Fili 70 ndra matua sondröniaʼö iraono Gizaraʼeli niʼataʼufi ba sinangea tobali sondröniaʼö ba halöwö daʼa moloʼö yaʼugö.+ Waʼö khöra weʼamöi ba nose waʼowulo ba mifao wezizio.
17 Möido mitou+ ba fahuhuo ndraʼo khöu ba daʼö.+ Uhalö ösa geheha+ si so khöu ba ubeʼe khöra. Latolo dania ndraʼugö ba wondrorogö soi daʼa irege tenga ha yaʼugö zangonorogö tödö.+
18 Fatunö ba soi daʼa, ’Miʼamoniʼö ami mahemolu+ börö me hasambalö miʼa nagole. No irongo Yehowa wege-egemi.+ Mimane, ”Omasiga maʼa nagole. Abölö ohahau dödöma me so ndraʼaga ba Miserai.”+ Hasambalö ibeʼe ömi nagole Yehowa ba miʼa.+
19 Miʼa dania nagole tenga ha sahari, 2 hari, 5 hari, 10 hari mazui 20 hari,
20 hizaʼi sara waŵa waʼara irege aföli ami ba itörö dögi nikhumi.+ No mitimbagö Yehowa si fao khömi. Meʼe ami fönania ba mimane, ”Hadia guna wa aheta ndraʼaga ba danö Miserai?”’”+
21 Imane Moze, ”So 600.000 ndra saradadu+ ba soi daʼa, ba no öwaʼö wa öbeʼe öra nagole, ba ibönö balazora daʼö ba zi sara waŵa.
22 Hewaʼae mutaba fefu nambi, biri-biri, awö zawi, hadia ibönö öra daʼö? Ba na mufaʼala fefu giʼa ba nasi, hadia ibönö?”
23 Aefa daʼö imane Yehowa khö Moze, ”Yaʼo Yehowa. Hadia tebai ufalua daʼö?*+ Anehe dania ndraʼugö na itörö wehedegu mazui löʼö.”
24 Ba möi baero Moze, ifaʼema wehede Yehowa ba ndraono Gizaraʼeli. Ifili 70 ndra matua ba gotalua zondröniaʼö iraono Gizaraʼeli. Iwaʼö khöra wezizio ba zi fasui ose waʼowulo.+
25 Ba möi tou Yehowa ba lawuo,+ fahuhuo ia khö Moze.+ Ihalö ösa geheha niʼamoniʼö+ nibeʼenia khö Moze ba ibeʼe khö ndra matua si 70 niha andrö. Me no so khöra waʼabölö geheha andrö, iʼanemaiʼö lafalua zimane nifalua zamaʼeleʼö,+ hizaʼi lö irai alua zimane daʼö saʼae.
26 So darua moroi ba gotalua zi 70 andrö zotöi Eledado faoma Medado. Ba nose manö laʼiagö ba lö möi ira ba nose waʼowulo. Börö me no mufasuraʼö döira, tebeʼe göi khöra geheha niʼamoniʼö ba lafalua zimane nifalua ndra samaʼeleʼö ba nose.
27 Lö ara, samösa ndra matua si fagohi ba wangombakhaʼö salua andrö khö Moze. Imane, ”Hiza Geledado faoma Medado ba nose, lafalua göi zimane nifalua ndra samaʼeleʼö!”
28 Ba imane Yosua+ ono Nuni sangai halöwö khö Moze iʼotarai me awuyu-wuyu, ”He Pa, waʼö khöra enaʼö labato!”+
29 Imane khönia Moze, ”Hadia abu dödöu na tohude ira moroi khögu?* Böi lau daʼö. Sindruhunia, omasido na tobali samaʼeleʼö fefu nono mbanua Yehowa, ba ibeʼe khöra Yehowa gehehania niʼamoniʼö!”
30 Ba mangawuli Moze ba nose, fao khönia ndra sondröniaʼö iraono Gizaraʼeli.
31 Aefa daʼö, tohare nangi sabölö-bölö moroi khö Yehowa, iʼoloiʼö wofo* moroi ba nasi. Ba börö nangi daʼö wa aekhu wofo ba zi fasui nose+ irege sahari fofanö numalö ba daʼa ba sahari fofanö numalö ba daʼö waʼoyania. Arakhagö sameter* waʼalawania moroi ba danö.
32 Laʼowuloi wofo daʼö iraono Gizaraʼeli maʼö-maʼökhö ba sara wongi, ba maʼökhö tö mahemolunia. Si löʼö-löʼönia laʼowuloi ero samösa 2.200 liter* ba lafazawili ba zinga nose.
33 Gasa-gasa wemangara nagole andrö, mofönu khöra Yehowa. Ihuku ira Yehowa faoma fökhö si möi börö waʼamate.+
34 Ba lafotöi nahia daʼö Kiberoti-hataʼawa,*+ börö me ba daʼö lakoʼo ndra niha sogoluʼa-luʼa.+
35 Ba mofanö ndraono Gizaraʼeli moroi ba Kiberoti-hataʼawa numalö ira ba Haseroti.+ Ba daʼö toröi ira.
Nisura ba gahe zura
^ Eluahania ”Fanunu”, yaʼia daʼö hola-hola galitö sebua.
^ Mazui ”niha moroi ba ngawalö soi”.
^ Sin.: ”gitö damar”.
^ Mazui ”ira matua solaya”.
^ Mazui ”Hadia talafo adogo-dogo danga Yehowa?”
^ Sin.: ”Hadia olohu ndraʼugö?”
^ Sin.: ”puyuh”. Fofo side-ide, mato 18 cm waʼanau. Ami sibai nagolenia, simane nagole manu.
^ Eluahania ”Lewatö Niha Sogoluʼa-luʼa”.
