4 Moze 13:1-33
13 Imane Yehowa khö Moze,
2 ”Fatenge ndra matua ba wamauze* tanö Ganaʼana nibeʼegu dania ba ndraono Gizaraʼeli. Fatenge samösa zondröniaʼö+ ero sambu-sambua mado ndra tuara.”+
3 Ba ifatenge ira Moze iʼotarai Danö si Mate Farana+ simane niwaʼö Yehowa. Fefu ndra matua andrö sondröniaʼö iraono Gizaraʼeli.
4 Daʼa döira: Moroi ba mado Rubeno, Samua ono Zakuri;
5 ba mado Zimeoni, Safata ono Hori;
6 ba mado Yehuda, Kalebi+ ono Yefune;
7 ba mado Gisasari, Igeala ono Yosefo;
8 ba mado Geferai, Hosia+ ono Nuni;
9 ba mado Mbeniami, Falati ono Rafu;
10 ba mado Zebuloni, Adieli ono Zodi;
11 ba mado Yosefo+ ba mado Manase,+ Gadi ono Zusi;
12 ba mado Dano, Amieli ono Gamali;
13 ba mado Gaseri, Seturo ono Mikhaʼeli;
14 ba mado Nafetali, Nahebi ono Wofisi;
15 ba mado Gado, Guli ono Makhi.
16 Daʼö döi-töi ndra matua nifatenge Moze ba wamauze tanö Ganaʼana. Ifaböʼöni döi Hosia ono Nuni andrö Moze, ifotöi ia Yosua.*+
17 Me ifatenge ira Moze ba wamauze tanö Ganaʼana, imane khöra, ”Miʼaeʼe ba Negebi, ba miʼaeʼe ba mbanua si so ba hili.+
18 Mifaigi hewisa danö andrö,+ hadia agabölö niha si toröi ba daʼö mazui tebai, hadia ato ira mazui löʼö,
19 ba mifaigi hadia sökhi danö daʼö mazui löʼö, hadia no mufoʼöli mbanuania mazui ha ose-ose.
20 Mifaigi hadia atabö zinanö ba daʼö mazui löʼö,+ so döla geu mazui löʼö. Böi miʼataʼufi,+ ba miʼohe ösa mbua zinanö si so ba daʼö.” Me luo daʼö, awena ibörögö mowua nagu.+
21 Ba mofanö ira, lafauze soi daʼö iʼotarai Danö si Mate Zini+ numalö ba Rehobo,+ sahatö ba Lebo-hamata.*+
22 Me numalö ira ba Negebi, ofeta ira ba Heberona.+ Ba daʼö toröi Gahima, Sezai, ba Talamai,+ niha Genaki.*+ Fitu fakhe tefasindro mbanua Heberona fatua lö mufasindro Zoana ba Miserai.
23 Me ofeta ira ba Ndraso Esikoli,+ lataba sara ndraha nagu ba sangamohi mbua. Darua zamabea ba laʼohe ösa mbua dalimo hegöi bua ara.+
24 Lafotöi nahia daʼö Daso Esikoli,*+ börö me no lataba ndraha nagu sowua ba daʼö iraono Gizaraʼeli.
25 Me no irugi 40 hari,+ mangawuli ira wamauze soi daʼö.
26 Lafalukhaisi Moze, Aʼaroni, ba fefu ndraono Gizaraʼeli ba Danö si Mate Farana ba Gadesi.+ Lafatunö ba niha sato hadia zi no laʼila ba laforomaʼö mbua geu si no laʼohe.
27 Lamane khö Moze, ”No marugi danö nifatengeu yaʼaga. Sindruhu sa wa fahöna ba daʼö susu ba wewani.+ Yaʼe mbua zinanö si no maʼohe.+
28 Hizaʼi, niha si toröi ba daʼö agabölö sibai ba alawa wokölinira banuara. So göi niha Genaki ba daʼö.+
29 Ba danö Negebi+ toröi niha Gamaleki.+ Ba mbanua si so ba hili toröi niha Kheti, niha Yebusi+ hegöi niha Gamori.+ Toröi niha Ganaʼana+ ba zinga nasi+ hegöi ba zinga Nungo Nidanö Yoridano.”
30 Irara dödö niha sato Kalebi föna Moze imane, ”Miʼaine, mofanö ita! Hasambalö wa takalaisi ira ba tarabu soi daʼö.”+
31 Lamane ira matua si fao khö Galebi, ”Tebai talawa ira börö me agabölö sibai ira moroi khöda.”+
32 Ba lö laböhöli wamatunö si lö sökhi+ ba ndraono Gizaraʼeli sanandrösa ba soi nifauzera. Lamane, ”Soi andrö nifauzema, soi si manga niha. Egebua niha ira ba daʼö.+
33 So göi ba daʼö Nadaoya ngaʼötö Genaki.+ Yaʼira andrö ngaʼötö Nadaoya. Na tafaedogö ita khöra, hulö gao ita fönara, ba simane daʼö göi wamaigira yaʼita.”
Nisura ba gahe zura
^ Mazui ”wamareso”.
^ Mazui ”Yehosua”, eluahania ”Yehowa No Fangorifi”.
^ Mazui ”lala si numalö ba Hamata”.
^ Niha segebua boto ba sagabölö.
^ Eluahania ”Ngamohi Mbua Nagu”.
