4 Moze 14:1-45
14 Ba muʼao fefu niha sato, laduhugö wege-ege ba zi sara wongi daʼö.+
2 Mukökö fefu ndraono Gizaraʼeli khö Moze faoma Aʼaroni+ ba latahigö ira fefu niha mbanua lamane, ”Abölö sökhi na mate ndraʼaga ba danö Miserai, mazui ba danö si mate andre!
3 Hana wa iʼohe ndraʼaga Yehowa ba danö daʼa, enaʼö mate ndraʼaga ba wöda?+ Laʼoloiʼö woʼomoma simanö göi ndraonoma.+ Abölö sökhi na mangawuli ita ba danö Miserai!”+
4 Faoma lamane khö nawöra, ”Datafili zondröniaʼö yaʼita ba mangawuli ita ba danö Miserai!”+
5 Ba mangalulu Moze faoma Aʼaroni ba laʼila daʼö iraono Gizaraʼeli.
6 Isika mbarunia Yosua+ ono Nuni hegöi Kalebi+ ono Yefune si möi mamauze soi daʼö.
7 Lamane ba ndraono Gizaraʼeli fefu, ”Tanö si no mafauze andrö sökhi sibai.+
8 Na omuso dödö Yehowa ba nifaluada, hasambalö wa ibeʼe khöda danö andrö si fahöna susu ba wewani.+ Hasambalö wa ibeʼe khöda.
9 Hizaʼi, böi milawa Yehowa. Böi miʼataʼufi niha ba soi daʼö,+ börö me tehori ira.* Lö hadöi solumöʼö yaʼira ba Yehowa zi fao khöda.+ Böi miʼataʼufi ira.”
10 Hewaʼae simanö, fefu niha sato edöna latebu zi darua andrö faoma kara.+ Hizaʼi oroma lakhömi Yehowa ba nose waʼowulo ba laʼila daʼö iraono Gizaraʼeli.+
11 Imane Yehowa khö Moze, ”Hawaʼara tö nasa laböhöli wolawa yaʼo soi daʼa?+ Hawaʼara mamati ira khögu hewaʼae oya dandra si no ufalua ba zanehe ira?+
12 Ufatörö khöra wökhö waba ba uhori ira. Abölö sökhi na ngaʼötöu nibaliʼögu soi sebua ba sabölö moroi khöra.”+
13 Imane Moze khö Yehowa, ”Yaʼugö zangeheta ono mbanuamö Izaraʼeli ba Miserai faoma faʼabölöu. Na öfalua daʼö, ba larongo ira niha Miserai+
14 ba lafatunö ba soi daʼa. No larongo wa yaʼugö Yehowa zi fao ba nono mbanuamö+ ba no öhaogö wamatunö haniha ndraʼugö sindruhunia ba nono mbanuamö.+ Lawuo si otarai khöu zi so yawara. Yaʼugö Yehowa, zowaö-waö tanö fönara ba döla lawuo na ba zi maʼökhö ba töla galitö na bongi.+
15 Na ösamuzaigö wamunu soi daʼa, ba lamane soi si no mamondrongo faʼabölömö,
16 ’Tebai iʼohe soi daʼö Yehowa ba danö si no ifabuʼu khöra ba si no möi ia ba hölu, andrö wa ibunu ira ba danö si mate.’+
17 Uʼandrö khöu Yehowa, yaʼoroma waʼabölöu sebua simane si no öfabuʼu mböröta me ömane,
18 ’Lö alio mofönu Yehowa ba fahöna khönia waʼomasi si lö faröi.+ Iʼefaʼö zala ba olalöwa, hizaʼi lö iʼefaʼö niha si lö sökhi moroi ba wanguhuku. Na so niha si fasala, laluʼi lua-lua horö nifaluania andrö iraononia, maʼuwunia hegöi mahonia.’+
19 Uʼandrö khöu, efaʼö zala soi daʼa simane si no öfalua iʼotarai ba danö Miserai ofeta maʼökhö,+ börö me fahöna khöu waʼomasi si lö faröi.”
20 Ba imane Yehowa, ”Uʼefaʼö zalara simane niʼandröu.+
21 Hewaʼae simanö, faya wa no sauri ndraʼo na lö anönö dania gulidanö andre lakhömi Yehowa.+
22 Tobali, fefu zi no mangila lakhömi awö dandra sahöli-höli dödö+ nifaluagu ba danö Miserai hegöi ba danö si mate, hizaʼi hameʼuga kali latandraigö ndraʼo+ ba lö lafondrondrongo wehedegu,+
23 lö irai laʼila dania danö nifabuʼugu khöra si no möido ba hölu khö ndra tuara. Samösa lö hadöi sangila tanö daʼö moroi ba gotalua niha si no mangoʼaya yaʼo.+
24 Ba börö me faböʼö gamuata genonigu Kalebi+ ba iʼoʼö wehedegu soroi ba dödönia, hasambalö uʼohe ia ba danö si no ifauze ba tobali dania okhöta ngaʼötönia danö daʼö.+
25 Börö me ba ndraso toröi niha Gamaleki hegöi niha Ganaʼana,+ miʼangawuli mahemolu ba danö si mate, mitörö lala si numalö ba Nasi Soyo.”+
26 Imane Yehowa khö Moze hegöi Aʼaroni,
27 ”Hawaʼara tö nasa laböhöli soi si lö sökhi andre ba wolawa yaʼo?+ No ofeta khögu wekökö ndraono Gizaraʼeli.+
28 Fatunö khöra, ’”Faya wa no sauri ndraʼo,” iwaʼö Yehowa, ”Hadia nirongogu moroi khömi, daʼö dania nifaluagu khömi!+
29 Yaʼami si no töra 20 fakhe si no tesura töi solawa yaʼo,+ fadela dania gamatelami ba danö si mate andre.+
30 Samösa lö hadöi dania ba gotaluami zi möi ba danö nifabuʼugu ba si no möido ba hölu,+ baero Galebi ono Yefune ba Yosua ono Nuni.+
31 ”’”Iraonomi si no laʼoloiʼö miwaʼö,+ yaʼira dania niʼohegu ba daʼö. Yaʼira dania zangila tanö nitimbagömi andrö.+
32 Hizaʼi, fadela dania gamatelami ba danö si mate andre.
33 Tobali dania kubalo ndraonomi matua ba danö si mate sagötö zi 40 fakhe.+ Yaʼira dania zoluʼi lua-lua gamuatami börö me no faröi ami* irege no ahori mate ami fefu ba danö si mate.+
34 Göna ami fanguhuku sagötö zi 40 fakhe+ moloʼö faʼarami ba wamauze soi daʼö, yaʼia daʼö 40 hari,+ sahari laʼerai zi döfi, enaʼö miʼila lua-luania na milawa ndraʼo.*
35 ”’”Yaʼo Yehowa, ba no fahuhuo ndraʼo. Daʼa nifaluagu ba nono mbanua si lö sökhi andre, si no mangosara ba wolawa yaʼo: Ba danö si mate andre ahori mate ira fefu.+
36 Ira matua nifatenge Moze ba wamauze tanö daʼa ba si tobali börö watahisara khönia me mangawuli ira ba ladunö-dunö ngawalö zi lö sökhi ba soi daʼö,+
37 lahuku fefu zolohe turia si lö sökhi andrö ba mate ira föna Yehowa.+
38 Hizaʼi, lö mate Yosua ono Nuni ba Kalebi ono Yefune si fao me lafauze soi daʼö.”’”+
39 Me ifaʼema wehede daʼö Moze ba ndraono Gizaraʼeli, abu sibai dödöra.
40 Ba maoso ira sihulö wongi sibai, möi ira ba zuzu hili. Lamane, ”No mafalua horö. Iadaʼa, no mafaʼanö ndraʼaga weʼamöi ba nahia niwaʼö Yehowa.”+
41 Imane Moze, ”Hana wa misawö goroisa Yehowa? Lö mofozu nifaluami.
42 Böi miʼofanö börö me lö fao khömi Yehowa. Hasambalö kala ami ba danga nudu.+
43 Milawa dania niha Gamaleki hegöi niha Ganaʼana ba daʼö.+ Mate ami ba mbawa wöda. Börö me no faröi ami khö Yehowa, andrö wa lö fao khömi Yehowa.”+
44 Hewaʼae simanö, fatandro ira weʼamöi ba zuzu hili.+ Hizaʼi, lö mofanö Moze, simanö göi dawöla amabuʼula li Yehowa, lö aheta ba nose.+
45 Ba tohare niha Gamaleki awö niha Ganaʼana si toröi ba hili daʼö, lasuwö ira irege muzawili ira ofeta ba Horama.+
Nisura ba gahe zura
^ Sin.: ”me yaʼira andrö öda roti”.
^ Sin.: ”börö wohorömi”.
^ Mazui ”na tobali ami si faʼudu khögu”.
