4 Moze 16:1-50
16 Ba mangosara Gora+ khö Datano, Abiramo hegöi Gono. Kora andrö ono Yisihara,+ ono Gahati,+ ono Lewi.+ Datano hegöi Abiramo ono Geliabi.+ Gono ono Weleti. Yaʼira si datölu andre ngaʼötö Rubeno.+
2 Mamagölö ira ba wolawa Moze ba fao khöra 250 ndraono Gizaraʼeli. Yaʼira andrö fefu ira matua si tehöngö, sondröniaʼö hegöi salahi nono mbanua.
3 Owulo ira ba wolawa+ Moze faoma Aʼaroni ba lamane, ”No aföli ndraʼaga khömi! No teʼamoniʼö fefu nono mbanua daʼa,+ ba fao göi khöra Yehowa.+ Hana wa mangosipade ami ba nono mbanua Yehowa?”
4 Me irongo daʼö Moze ba mangalulu ia.
5 Imane khö Gora hegöi ba zi fao khönia, ”Mahemolu sihulö wongi iʼombakhaʼö Yehowa haniha dana khönia,+ haniha niʼamoniʼö, ba haniha zi tola mangondrasi yaʼia.+ Niha nifilinia,+ daʼö zangondrasi yaʼia.
6 Falua daʼa yaʼugö Kora hegöi si faʼawö khöu:+ Mihalö naha mbo galitö,+
7 mibeʼe mbo galitö yawania ba mitunu zumange somuhua mahemolu föna Yehowa. Niha nifili Yehowa dania,+ daʼö niʼamoniʼö. No töra saʼae wolaumi, yaʼami ngaʼötö Lewi!”+
8 Aefa daʼö, imane Moze khö Gora, ”Mifondrondrongo, yaʼami ngaʼötö Lewi.
9 No ifasambua ami Lowalangi ndraono Gizaraʼeli moroi ba gotalua ndraono Gizaraʼeli sato,+ ba itehegö miʼondrasi ia. No ifataro ami ba wangai halöwö ba nose Yehowa hegöi ba wanolo iraono Gizaraʼeli.+ Ba hadia ambö nasa khömi daʼö?
10 No göi itehegö khömi Lowalangi ba wangondrasi yaʼia ba fefu dalifusömi ngaʼötö Lewi. Ba hadia ambö nasa khömi daʼö? Hadia omasi göi ami tobali ere?+
11 Sindruhunia, yaʼugö hegöi si faʼawö khöu no milawa Yehowa. Haniha Gaʼaroni andrö wa mukökö-kökö ami khönia?”+
12 Ba ifakaoniʼö Datano hegöi Abiramo+ ono Geliabi andrö Moze. Hizaʼi lamane, ”Lö möiga!
13 No öheta ndraʼaga ba danö si fahöna susu ba wewani ba öbunu ndraʼaga ba danö si mate.+ Ba hadia ambö nasa khöu daʼö? Hadia omasiʼö tobali sondröniaʼö yaʼaga iadaʼa?
14 Öwaʼö sa wa öʼohe ndraʼaga ba danö si fahöna susu ba wewani,+ öbeʼe khöma mbenua awö kabu nagu tobali tana khöma. Hadia omasiʼö na laʼoʼö ndraʼugö ira niha daʼa simane niha sauʼa?* Lö möiga!”
15 Ba mofönu sibai Moze irege imane khö Yehowa, ”Böi tema zumange niʼa* si no labeʼe. Lö irai uhalö zageu galidera, lö irai ufalua khöra zi lö sökhi.”+
16 Ba imane Moze khö Gora, ”Yaʼami fefu, miʼondrasi Yehowa mahemolu, yaʼugö, si faʼawö khöu hegöi Aʼaroni.
17 Miʼohe ero samösa naha mbo galitö, beʼe bakha zumange somuhua ba miʼohe föna Yehowa, 250 naha fefu. Yaʼugö hegöi Aʼaroni, mifao khöra ba miʼohe naha mbo galitö khömi.”
18 Ba lahalö khöra ero samösa naha mbo galitö, labeʼe yawa mbo galitö, latunu zumange somuhua, ba mosindro ira ba mbawandruhö nose waʼowulo, fao Moze hegöi Aʼaroni.
19 Me iʼowuloi zi faʼawö khönia Kora+ ba mbawandruhö nose waʼowulo, oroma ba niha sato lakhömi Yehowa.+
20 Ba imane Yehowa khö Moze hegöi Aʼaroni,
21 ”Mifabali ami moroi ba ngawawa ndra niha daʼö enaʼö tola iʼanemaiʼö uhori ira iadaʼa.”+
22 Ba mangalulu Moze hegöi Aʼaroni lamane, ”He Lowalangi, yaʼugö zameʼe noso ba niha fefu.+ Hadia mofönu ndraʼugö ba nono mbanua daʼa fefu ha börö horö zi samösa?”+
23 Imane Yehowa khö Moze,
24 ”Waʼö ba niha sato, ’Mifandröndröu ami ba zi fasui nose Gora, Datano ba Abiramo!’”+
25 Aefa daʼö, möi Moze awö zondröniaʼö+ iraono Gizaraʼeli wamalukhaisi Datano ba Abiramo.
26 Imane Moze ba niha sato, ”Mifandröndröu ami moroi ba nose ndra niha si lö sökhi andre ba böi mibabaya gokhötara enaʼö lö mate ami ba horö nifaluara.”
27 Ba iʼanemaiʼö lafandröndröu ira ba zi fasui ose Gora, Datano ba Abiramo. Möi baero Datano faoma Abiramo ba mosindro ira ba mbawandruhö nose khöra. So ba daʼö woʼomora, iraonora hegöi ono sawuyu khöra.
28 Ba imane Moze, ”Ba daʼa dania miʼila wa nifatenge Yehowa ndraʼo ba wamalua daʼa fefu, ba tenga nilau dödögu* daʼa:
29 Na mate ndra niha daʼa simane faʼamate niha si toʼölö ba na fagölö wanguhuku si göna ira simane niha sato, eluahania tenga nifatenge Yehowa ndraʼo.+
30 Hizaʼi na ifalua Yehowa zi lö irai alua, irege asila danö* ba itölö ira fabaya okhötara, ba tekoʼo auri ira ba Lewatö,* ba daʼö dania aboto ba dödömi wa lö lafosumange Yehowa ira niha daʼa.”
31 Awai sibai fahuhuo Moze, iʼanemaiʼö asila danö gamaudu zi so yaʼira.+
32 Asila danö ba itölö ira, ösi nomora, ba fefu zi faʼawö khö Gora+ hegöi okhötara.
33 Tekoʼo auri ira ba Lewatö* ba fefu zi faʼawö khöra. Teduhö danö yawara irege ahori ira fefu.+
34 Moloi fefu ndraono Gizaraʼeli si so ba zi fasuira me larongo weʼira-ira ndra niha daʼö. Lamane, ”Ataʼuga na itölö ndraʼaga tanö!”
35 Ba tohare galitö moroi khö Yehowa,+ ikhozi fefu niha si 250 andrö sameʼe sumange somuhua.+
36 Ba imane Yehowa khö Moze,
37 ”Fatunö khö Geleazari ono Gere Aʼaroni ba wangai fefu naha mbo galitö+ andrö moroi ba galitö, börö me niʼamoniʼö daʼö. Waʼö göi khönia enaʼö ifandröndröu wamazawilinia alitö* andrö.
38 Naha mbo galitö nibeʼe ndra niha si no mate andrö börö horöra, labaliʼö naha sanifi-nifi ba wamoʼuli naha wanunu sumange.+ No labeʼe daʼö fefu tobali sumange khö Yehowa irege teʼamoniʼö. Daʼö zi tobali tandra ba ndraono Gizaraʼeli.”+
39 Ba möi Gere Eleazari wangai naha mbo galitö nifazökhi moroi ba tembaga, nibeʼe ndra niha sakhozi andrö mege. Iböbözi daʼö fefu tobali famoʼuli naha wanunu sumange,
40 simane niwaʼö Yehowa khö Moze. Daʼö zi tobali famangelama ba ndraono Gizaraʼeli wa tebai so zangahatöʼö yaʼia ba wanunu sumange somuhua föna Yehowa baero ngaʼötö Gaʼaroni.+ Tebai göi so zanara lahe Gora ba fefu zi faʼawö khönia.+
41 Mahemolunia, fatahi-tahi ndraono Gizaraʼeli khö Moze hegöi Aʼaroni,+ ”No mibunu nono mbanua Yehowa.”
42 Me owulo ira ba wolawa Moze hegöi Aʼaroni, lafaigi gamaudu nose waʼowulo ba laʼila no ibalugö nose andrö lawuo. Oroma lakhömi Yehowa.+
43 Möi Moze hegöi Aʼaroni föna nose waʼowulo+
44 ba imane Yehowa khö Moze,
45 ”Miheta ami moroi ba gotalua niha sato enaʼö tola uhori ira.”+ Ba iʼanemaiʼö latuhi danö.+
46 Imane Moze khö Gaʼaroni, ”Halö naha mbo galitö ba beʼe yawa mbo galitö moroi ba naha wanunu sumange,+ aefa daʼö tunu zumange somuhua. Aliokö, aeʼe falukhaisi zato ba falua khöra wangatulö+ börö me no mofönu sibai Yehowa. No ibörögö alua wamakao!”
47 Iʼanemaiʼö ihalö Aʼaroni niwaʼö Moze ba fagohi ia ba gotalua niha sato. Sindruhunia no ibörögö göna ira famakao. Andrö ibeʼe zumange somuhua Aʼaroni ba naha mbo galitö daʼö, ifalua wangatulö ba soi andrö.
48 No mosindro manö ia ba gotalua niha sauri awö zi no mate irege tebato wamakao andrö.
49 Faʼato zi mate ba wamakao daʼö 14.700 niha, baero zi mate si fao khö Gora.
50 Me mangawuli Gaʼaroni khö Moze ba mbawandruhö nose waʼowulo, no tebato saʼae wamakao andrö.
Nisura ba gahe zura
^ Sin.: ”omasiʼö ökoe hörö ndra niha daʼa?”
^ Mazui ”zumange bua nowi”.
^ Mazui ”ohitö dödögu”.
^ Sin.: ”ibokai mbawania tanö”.
^ Mazui ”Syeol”. Faigi Geluaha Ngawua Wehede.
^ Mazui ”Syeol”. Faigi Geluaha Ngawua Wehede.
^ Te akho mazui awu si so tanö bakha ba naha mbo galitö hegöi ba zingania.
