4 Moze 18:1-32
18 Imane Yehowa khö Gaʼaroni, ”Yaʼugö hegöi iraonou matua, ba fefu ngaʼötöu,* daʼö zoluʼi sala na so zanawö amakhoita ba naha niʼamoniʼö.+ Yaʼugö hegöi iraonou matua zoluʼi sala na so zanawö amakhoitagu ba halöwö gere.+
2 Ohe göi ndra talifusöu moroi ba mado Lewi, yaʼia daʼö mado namau, enaʼö fao ira khöu ba tobali ira sangai halöwö khöu+ hegöi ba ndraonou, föna nose Lowalangi si so Famaduhuʼö.+
3 Akha lafalua halöwö nibeʼeu khöra, simanö göi halöwöra ba nose.+ Hizaʼi, tebai lafahatö ira ba gama-gama si so ba nahia niʼamoniʼö hegöi ba naha wanunu sumange faböi mate ira simanö göi ami.+
4 Fao ira khöu ba lafalua halöwöra ba nose waʼowulo, mangai halöwö ira ba nose andrö. Niha si lö mutehegö,* tebai lafahatö ira khömi.+
5 Lö tola löʼö mifalua halöwömi ba nahia niʼamoniʼö+ hegöi ba naha wanunu sumange+ enaʼö lö mofönu zui ndraʼo+ ba ndraono Gizaraʼeli.
6 No ufasambua ndra talifusöu niha Lewi ba gotalua ndraono Gizaraʼeli, uʼamualagö ira khömi.+ Tebeʼe ira khö Yehowa ba wangai halöwö ba nose waʼowulo.+
7 Yaʼugö hegöi iraonou matua, mihalö halöwö gere soʼamakhaita ba naha wanunu sumange hegöi si so ba zi tambai nukha mbaʼa-baʼa.+ Yaʼami zamalua halöwö daʼö+ börö me no ubeʼe khömi ia tobali buala. Niha si lö mutehegö* samahatö yaʼira ba nahia niʼamoniʼö, hasambalö nibunu.”+
8 Imane Yehowa khö Gaʼaroni, ”Ufataro ndraʼugö tobali sohalöwö ba wamaigi fangogunaʼö tolo-tolo nibeʼe khögu.+ Moroi ba zumange niʼamoniʼö nibeʼe ndraono Gizaraʼeli, so zi tobali tana khöu hegöi iraonou matua. Daʼö dana khömi irugi zi lö aetu.+
9 Moroi ba zumange fondrege niʼamoniʼö nitunu ba galitö, so ösa zi tobali tana khömi. Simanö göi ba zumange niʼa,*+ sumange fameta horö+ hegöi sumange fameta zala.+ Daʼö wondrege niʼamoniʼö khöu hegöi ba ndraonou matua.
10 Miʼa daʼö ba nahia wondrege niʼamoniʼö.+ Dozi ira matua tola laʼa zumange andrö ba miʼamoniʼö daʼö.+
11 Tobali tana khömi zumange nibeʼe ndraono Gizaraʼeli+ awö zumange nifazaule.+ No ubeʼe khöu daʼö, ba ndraonou matua hegöi iraonou alawe tobali tana khöra sagötö faʼara.+ Tola laʼa zumange daʼö ira ösi nomou si lö raʼiö.+
12 ”Ubeʼe khöu fefu ziaʼa mbua danö sabölö sökhi+ moroi ba wanikha, agu si bohou awö mbua nowi nibeʼera khö Yehowa.+
13 Fefu ziaʼa mbua danö sasoso moroi ba nowira nibeʼera khö Yehowa, tobali tana khöu.+ Tola laʼa daʼö ira ösi nomou si lö raʼiö.
14 ”Fefu zi no lalulu* khö Lowalangi ba danö Gizaraʼeli, tobali tana khöu.+
15 ”Fefu ziaʼa+ nibeʼera khö Yehowa, niha hegöi urifö, tobali tana khöu. Hizaʼi moguna ösanu nono siaʼa, he niha+ hegöi urifö salakha.+
16 Na no töra sara waŵa nono siaʼa andrö, ösanu ia moloʼö böli si no mutatugöi, yaʼia daʼö 57 gram* firö,+ moloʼö suʼa-suʼa waʼabua niʼogunaʼö ba nahia niʼamoniʼö.
17 Tebai ösanu ziaʼa nono zawi, biri-biri si matua mazui nambi.+ Fefu gurifö daʼö niʼamoniʼö. Ötefeʼö ndronia ba naha wanunu sumange,+ ba ötunu dawönia enaʼö numalö miyawa zimbo si tobali sumange nitunu ba galitö. Hua zumange andrö möi fangomuso dödö Yehowa.+
18 Tobali tana khöu nagolenia simane töla doto moroi ba zumange nifazaule awö gahe kambölö.+
19 No ubeʼe khöu hegöi ba ndraonou matua awö ba ndraonou alawe fefu zumange niʼamoniʼö sedöna labeʼe iraono Gizaraʼeli khö Yehowa,+ tobali tana khöra irugi zi lö aetu.+ Daʼö mbuʼusa li nilau asio* ba gotaluami Yehowa hegöi ngaʼötöu irugi zi lö aetu.”
20 Itohugö Yehowa wangumaʼö khö Gaʼaroni, ”Lö hadöi ondröita tana khöu ba Gizaraʼeli ba lö hadöi tanöra si tola möi khöu.+ Yaʼo zondrorogö ba sangaʼasogö soguna khöu* ba ndraono Gizaraʼeli.+
21 ”No ubeʼe zi sambua niʼofulu+ khö ndra niha Lewi moroi ba gokhöta ndraono Gizaraʼeli. Daʼö zi tobali ondröita khöra, si tobali sulö ba halöwö nifaluara ba nose waʼowulo.
22 Tebai möi saʼae ndraono Gizaraʼeli ba nose waʼowulo. Tobali horöra na lafalua daʼö ba hasambalö mate ira.
23 Lafalua halöwöra ira niha Lewi ba nose waʼowulo, ba yaʼira zoluʼi sala nifalua ndraono Gizaraʼeli.+ Ba gotalua ndraono Gizaraʼeli, tebai manema ondröita niha Lewi.+ Moguna khömi gamakhoita daʼa irugi zi lö aetu ofeta ba ngaʼötömi.
24 No ubeʼe zi sambua niʼofulu khö ndra niha Lewi niʼamualagö ndraono Gizaraʼeli khö Yehowa. Daʼö zi tobali ondröita khöra. Daʼö mbörö wa uwaʼö ba niha Lewi wa tebai latema gondröita ba gotalua ndraono Gizaraʼeli.”+
25 Imane zui Yehowa khö Moze,
26 ”Fatunö ba niha Lewi, ’Mitema dania zi sambua niʼofulu moroi ba ndraono Gizaraʼeli, ba no ubeʼe daʼö tobali ondröita khömi.+ Moroi ba daʼö, lö tola löʼö mibeʼe zi sambua niʼofulunia tobali sumange khö Yehowa.+
27 Daʼö zi tobali tolo-tolo sinangea mibeʼe, amaedola mbua nowi daʼö moroi ba naha wamöbörö+ mazui bua si fahöna moroi ba naha wamera agu ba fanikha.
28 Börö zimanö, mibeʼe dolo-tolo khö Yehowa. Mitema zi sambua niʼofulu moroi ba ndraono Gizaraʼeli ba moroi ba daʼö mibeʼe dania dolo-tolo tana khö Yehowa andrö khö Gere Aʼaroni.
29 Moroi ba mbuala si no mitema, mibeʼe khö Yehowa zumange fondrege zi sökhi+ si tobali niʼamoniʼö.’
30 ”Fatunö khöra, ’Me no mibeʼe zabölö sökhi, ba khömi zi törania yaʼami niha Lewi. Mubaliʼö daʼö bua nowi moroi ba naha wamöbörö hegöi naha wamera agu ba fanikha.
31 Tola miʼa daʼö gofu hezo manö, simanö göi nösi nomomi, börö me daʼö luomi ba halöwö nifaluami ba nose waʼowulo.+
32 Lö fasala ami sagötö mibeʼe zabölö sökhi ba zi no mitema. Tebai mitaʼunöisi ngawalö niʼamoniʼö ba ndraono Gizaraʼeli. Na mifalua daʼö, hasambalö mate ami.’”+
Nisura ba gahe zura
^ Mazui ”nösi nomo zatuamö ira matua”.
^ Sin.: ”Niha si fatewu”, yaʼia daʼö niha si tenga ösi nomo Gaʼaroni.
^ Sin.: ”Niha si fatewu”, yaʼia daʼö niha si tenga ösi nomo Gaʼaroni.
^ Mazui ”zumange bua nowi”.
^ Yaʼia daʼö fefu zi no lalulu khö Lowalangi si tebai mufawuʼa mazui musanu.
^ Eluahania buʼusa li soʼahonoa ba si lö tebulö.
^ Sin.: ”Yaʼo dana khöu ba ondröitamö”.
