4 Moze 19:1-22
-
Sawi soyo hegöi idanö ba wangamoniʼö (1-22)
19 Imane Yehowa khö Moze hegöi Aʼaroni,
2 ”Daʼa goroisa nihonogöi Yehowa: ’Waʼö ba ndraono Gizaraʼeli enaʼö laʼohe khöu zageu zawi soyo si lö fökhö, si lö safatö ahe+ ba si lö irai monoro.*
3 Beʼe daʼö khö Gere Eleazari. Iʼohe daʼö baero ba nose waʼowulo ba mutaba zawi andrö fönania.
4 Aefa daʼö, ihalö maʼifu Ere Eleazari ndro zawi daʼö faoma turunia ba itefeʼö fitu kali föna nose waʼowulo.+
5 Ba latunu ba zanehe ia zawi daʼö, fao guli, nagole, do awö zi taʼunönia.+
6 Moguna ihalö geu eresi, sinanö hiso*+ hegöi nukha soyo* ba ifazaumba fefu ba galitö fanunu zawi andrö.
7 Ba möi ia isasai mbarunia, aefa daʼö mondri. Awena tola möi ia bakha ba nose waʼowulo, hizaʼi raʼiö ia ofeta aekhu luo.
8 ”’Niha sanunu sawi daʼö hasambalö mondri ia ba isasai nukhania, ba raʼiö ia ofeta aekhu luo.
9 ”’Samösa niha si lö raʼiö zangowuloi awu zawi daʼö,+ iʼiröʼö baero nose waʼowulo ba nahia si no mutatugöi.* Laʼiröʼö daʼö iraono Gizaraʼeli ba wangehenaigö idanö niʼogunaʼö ba wangamoniʼö.+ Daʼö zumange fameta horö.
10 Niha sangowuloi awu daʼö moguna isasai mbarunia ba raʼiö ia ofeta aekhu luo.
”’Moguna ba ndraono Gizaraʼeli gamakhoita daʼa irugi zi lö aetu hegöi ba niha si fatewu si toröi ba gotaluami.+
11 Niha sombambaya boto zi mate, raʼiö ia sagötö zi fitu hari.+
12 Ba ngaluo si tölu, iʼamoniʼö ia niha daʼö ba nidanö andrö, ba lö saʼae raʼiö ia ba ngaluo si fitu. Hizaʼi na lö iʼamoniʼö ia ba ngaluo si tölu, raʼiö ia nasa ba ngaluo si fitu.
13 Na so zombambaya boto zi mate ba lö iʼamoniʼö ia, no itaʼunöisi nose Yehowa niha daʼö+ ba hasambalö labunu ia.*+ Börö me lö latefeʼö khönia nidanö fangamoniʼö,+ raʼiö ia ba lö tebulö waʼaraʼiönia.
14 ”’Daʼa goroisa na so zi mate ba nose: Dozi niha si no möi ba nose daʼö hegöi niha si so ba nose andrö, raʼiö ia sagötö zi fitu hari.
15 Fefu naha si lö lagö-lagö* ahori raʼiö.+
16 Dozi niha si so ba newali sombambaya boto zi mate, töla zi mate, lewatö mazui niha si mate ba wöda, raʼiö ia fitu hari waʼara.+
17 Ba wangamoniʼö niha si raʼiö andrö, mihalö maʼifu nawu zumange fameta horö, mibeʼe ba karawa ba mifaduwa ba daʼö nidanö sohau-hau.
18 Aefa daʼö, lö tola löʼö möi samösa niha si lö raʼiö+ ba wangai tanömö hiso*+ ba iʼungugö ba nidanö andrö. Itefeʼö daʼö ba nose, ba gama-gama, niha si so ba daʼö, ba niha sombambaya töla mazui boto zi mate, ba lewatö mazui ba niha nibunu.
19 Niha si lö raʼiö andrö zanefeʼö idanö ba niha si raʼiö ba ngaluo si tölu hegöi ba ngaluo si fitu, ba teʼamoniʼö ia moroi ba horö ba ngaluo si fitu.+ Mondri niha si raʼiö andrö ba isasai mbarunia, awena lö raʼiö ia ofeta aekhu luo.
20 ”’Hizaʼi, niha si raʼiö si lö mangamoniʼö yaʼia hasambalö nibunu,*+ börö me itaʼunöisi naha niʼamoniʼö khö Yehowa. Lö latefeʼö khönia nidanö fangamoniʼö, andrö wa raʼiö ia.
21 ”’Daʼa goi-goi soguna irugi zi lö aetu: Niha sanefeʼö idanö ba wangamoniʼö+ moguna isasai mbarunia, ba niha sombambaya idanö daʼö, raʼiö ia ofeta aekhu luo.
22 Gofu hadia nibabaya niha si raʼiö hasambalö raʼiö, ba niha sombambaya daʼö tobali raʼiö ofeta aekhu luo.’”+
Nisura ba gahe zura
^ Mazui ”si lö irai mufasa kalo mbagi”.
^ Faigi Geluaha Ngawua Wehede.
^ Mazui ”kirimisi”.
^ Sin.: ”si lö taʼunö”.
^ Sin.: ”laheta ia moroi ba danö Gizaraʼeli”.
^ Mazui ”lagö-lagö si no muböbö”.
^ Faigi Geluaha Ngawua Wehede.
^ Sin.: ”laheta ia ba gotalua nono mbanua sato”.
