4 Moze 22:1-41
22 Ba mofanö ndraono Gizaraʼeli lafazökhi nosera ba Danö si Mate Moabi ba zinga Nungo Nidanö Yoridano sangotahögö Yerikho.+
2 No irongo Balaki+ ono Zifori nifalua ndraono Gizaraʼeli ba niha Gamori.
3 Ataʼu sibai niha Moabi ba ndraono Gizaraʼeli börö me ato sibai ira. Humokha mbu niha Moabi börö waʼataʼu.+
4 Lamane niha Moabi khö ndra satua mbanua Midiano,+ ”Soi daʼö* hasambalö latölö fefu mbanua ba zi fasuida simane sawi si manga duʼu ba mbenua.”
Me luo daʼö, Balaki ono Zifori zi tobali razo ba Moabi.
5 Ifatenge niha ba wogaoni Bileamo ono Mbeori ba Wetori+ banua si tumbu yaʼia, sahatö ba zinga Nungo Nidanö Geferata. Imane, ”So sambua soi si no aheta ba Miserai ba no lanönöi soi daʼa.*+ No lafazökhi nosera tanö fönagu.
6 Uʼandrö khöu, aine ba daʼa ba elifi khögu soi daʼö+ börö me abölö ira moroi khögu. Uʼila wa tefahowuʼö niha nifahowuʼömö ba göna fangelifi niha niʼelifimö. Ma dania tola ulawa ba ufofanö ira ba soi daʼa.”
7 Ba mofanö ndra satua mbanua Moabi hegöi Midiano, möi ira lafalukhaisi Mbileamo ba labeʼe khönia gefe ba wangelifi iraono Gizaraʼeli.+ Lafaʼema khönia goroisa Mbalaki.
8 Aefa daʼö imane, ”Ba daʼa miförö bongi. Ubeʼe khömi wanema li gofu hadia niwaʼö Yehowa khögu.” Ba mörö ndra sondröniaʼö niha Moabi ba nomo Mbileamo.
9 Ba tohare Lowalangi wamalukhaisi Bileamo imane,+ ”Haniha zi fao khömö andrö?”
10 Imane Bileamo khö Lowalangi sindruhu, ”Balaki ono Zifori razo Moabi, so niwaʼönia khögu. Imane,
11 ’So sambua soi si no aheta moroi ba Miserai ba no lanönöi soi daʼa.* Aine ba daʼa ba elifi ira khögu.+ Ma dania tola ulawa ba ufofanö ira.’”
12 Imane Lowalangi khö Mbileamo, ”Tebai faoʼö khöra. Tebai öʼelifi mbanua daʼö börö me no ufahowuʼö ira.”+
13 Me sihulö wongi daʼö, maoso Mbileamo ba imane khö ndra sondröniaʼö nifatenge Mbalaki, ”Miʼangawuli ba mbanuami. Lö itehegö fao ndraʼo khömi Yehowa.”
14 Ba mangawuli ndra sondröniaʼö Moabi khö Mbalaki lamane, ”Lö omasi Mbileamo na fao ia khöma.”
15 Hizaʼi, ifuli ifatenge Balaki ndra sondröniaʼö sabölö egebua faka ba ato moroi ba zi oföna.
16 Falukha ira khö Mbileamo lamane, ”Daʼa niwaʼö Mbalaki ono Zifori: ’Uʼandrö khöu, aine ba daʼa, böi tehegö so zanaisi yaʼugö.
17 Hasambalö ubeʼe khöu zumange sabölö ebua. Ufalua gofu hadia niwaʼöu. Aine ba elifi khögu soi daʼa.’”
18 Imane Bileamo khö ndra enoni Mbalaki, ”Hewaʼae ibeʼe khögu nomonia Balaki safönu firö ba anaʼa, tebai usawö goroisa Yehowa Lowalangigu hewaʼae no ide-ide mazui ebua.+
19 Hizaʼi, ba daʼa miförö bongi. Daʼufuli usofu hadia dania niwaʼö Yehowa.”+
20 Ba zi bongi daʼö, möi Lowalangi khö Mbileamo imane, ”Na tohare ndra niha daʼö wogaoni yaʼugö, fao manö khöra. Hizaʼi, böi waʼö zi lö niwaʼögu khöu.”+
21 Mahemolu sihulö wonginia, maoso Mbileamo ifosela* galidenia,* ba fao ia khö ndra sondröniaʼö niha Moabi.+
22 Ba mofönu sibai khönia Lowalangi börö me no mofanö ia irege mosindro malaʼika Yehowa ba lala ba wombaʼagö yaʼia. Ba hulu galide so Mbileamo ba no fao göi darua ndra sohalöwö khönia.
23 Ba me iʼila kalide andrö so malaʼika Yehowa ba lala ba sara wöda ba dangania, iholeʼö ia ba ndruʼu. Börö daʼö, ibözi ia Bileamo enaʼö ifuli itörö lala.
24 Ba mosindro malaʼika Yehowa ba lala sise-ise ba gotalua kabu nagu, ba so göli kara faoma fatambai.
25 Me iʼila kalide andrö malaʼika Yehowa, isusuʼö ia ba gotalua göli kara irege tolazi gahe Mbileamo. Ifuli zui ibözi ia Bileamo.
26 Ihulö ia malaʼika Yehowa ba mozizio ia ba lala sise-ise, irege tebai iholeʼö ia kalide andrö ba gambölö mazui ba gabera.
27 Me iʼila malaʼika Yehowa, ifalögu ia tou kalide andrö hewaʼae so yawa ba hulunia Mbileamo. Mofönu sibai Mbileamo irege iböbözi galide daʼö faoma siʼonia.
28 Ba gafuriata, fahuhuo galide andrö ibeʼe* Yehowa+ ba imane khö Mbileamo, ”No tölu kali öbözi ndraʼo Pa, hadia zalagu khöu?”+
29 Imane Bileamo, ”Börö me ömaikö ndraʼo. Na so khögu wöda ba daʼa ba no ubunuʼö!”
30 Imane kalide daʼö khö Mbileamo, ”Yaʼodo andre kalide solohe-lohe yaʼugö sandrohu faʼaurimö irugi iadaʼa. Hadia no irai ufalua khöu zimane daʼa?” Imane Bileamo, ”Löʼö!”
31 Ba ibokai hörö Mbileamo+ andrö Yehowa irege iʼila malaʼika Yehowa si zizio ba lala ba no igogohe wöda. Iʼanemaiʼö ituhi danö ba mangalulu ia.
32 Aefa daʼö imane khönia malaʼika Yehowa, ”Hana wa irege tölu kali öbözi galide andrö khöu? Tohare ndraʼo ba wombaʼa yaʼugö börö me faböʼö niʼera-erau moroi ba gohitö dödögu.+
33 No tölu kali iʼila ndraʼo kalide daʼö ba iholeʼö ia.+ Na lö iholeʼö ia, ba no ubunu ndraʼugö iadaʼa, ba utehegö auri ia.”
34 Imane Bileamo khö malaʼika Yehowa, ”No ufalua horö börö me lö uʼila wa yaʼugö zosindro ba lala ba wamalukhaisi yaʼo. Na lö fao dödöu ba wofanögu andre, ba ufulido furi.”
35 Imane malaʼika Yehowa khö Mbileamo, ”Ofanö, fao khö ndra niha daʼö. Hizaʼi, ha nifatunögu khöu awai zi tola öwaʼö.” Ba mofanö Mbileamo fao ia khö ndra sondröniaʼö nifatenge Mbalaki.
36 Me irongo Balaki wa no tohare Mbileamo, iʼanemaiʼö ifalukhaisi ia ba mbanua Moabi, ba zinga Ndraso Garono ba nola danö mbanua andrö.
37 Imane Balaki khö Mbileamo, ”No ufatenge niha ba wamalukhaisi yaʼugö, ba hana wa lö tohareʼö? Hadia öwalinga tebai ubeʼe khöu zumange sebua?”+
38 Imane Bileamo khö Mbalaki, ”No tohare ndraʼo iadaʼa Pa. Hizaʼi, tebai uwaʼö zomasi-masi dödögu. Awai zi tola uwaʼö, ha si no iwaʼö Lowalangi.”+
39 Ba mofanö Mbileamo fao ira Mbalaki, ba ofeta ira ba Giriati-khusoti.
40 Ibeʼe zumange nitunu Balaki, yaʼia daʼö sawi ba biri-biri. Aefa daʼö, ifaʼoheʼö ösa khö Mbileamo hegöi khö ndra sondröniaʼö si fao khönia.
41 Mahemolu sihulö wonginia, ifaondragö Mbileamo Balaki ba iʼohe ba Mbamoti-mbaʼali.* Ba nahia daʼö, oroma khönia fefu soi daʼö.+
Nisura ba gahe zura
^ Sin.: ”Ono mbanua daʼö”.
^ Sin.: ”gulidanö”.
^ Sin.: ”gulidanö”.
^ Mazui ”ifasa dadaoma ba hulu”.
^ Sin.: ”galidenia si alawe”.
^ Sin.: ”ibokai mbawa galide si alawe andrö”.
^ Eluahania ”Nahia Salawa khö Mbaʼali”.
