4 Moze 23:1-30
23 Imane Bileamo khö Mbalaki, ”Fazökhi fitu ngawua naha wanunu sumange+ ba daʼa. Henaigö khögu fitu ngaʼeu zawi si matua ba fitu ngaʼeu mbiri-biri si matua.”
2 Iʼanemaiʼö ifalua Balaki niwaʼö Mbileamo. Labeʼe zumange ira Balaki faoma Bileamo sageu zawi si matua ba sageu mbiri-biri si matua ero sambua naha wanunu sumange.+
3 Imane Bileamo khö Mbalaki, ”Baloi ba daʼa, ba zinga zumange nitunu nibeʼemö, ba mofanö ndraʼo. Maʼatö ifalukhaisi ndraʼo Yehowa. Gofu hadia niwaʼönia khögu, ufatunö dania khöu.” Ba mofanö Mbileamo ba hili.
4 Ba tohare Lowalangi ba wamalukhaisi Bileamo.+ Imane khönia Bileamo, ”No ufazökhi fitu ngawua naha wanunu sumange, ba no ubeʼe sageu zawi si matua ba sageu mbiri-biri si matua ero sambua naha wanunu sumange.”
5 Yehowa zamatunö khö Mbileamo hadia zinangea iwaʼö.+ Imane, ”Fuliʼö khö Mbalaki, daʼa wehedeu khönia.”
6 Ba mangawuli Mbileamo khö Mbalaki ba iʼila no mosindro ia ba zinga zumange nitunu fao ia khö ndra sondröniaʼö niha Moabi.
7 Ba iwaʼö gamaedola andre,+
”Balaki razo Moabi zolohe yaʼo moroi ba Garamo,+Moroi ba hili ba gatumbukha.
Imane, ’Aine ba daʼa, elifi khögu Yakobo.
Aeʼe ba daʼa ba fetaʼu ndraono Gizaraʼeli.’+
8 Hewisa wa uʼelifi niha si lö iʼelifi Lowalangi?
Ba hewisa wa ufetaʼu niha si lö ifetaʼu Yehowa?+
9 Uʼila ira moroi ba zuzu hili kara,Ufaigi ira moroi ba hili-hili.
Ha yaʼira soi si toröi ba daʼö;+Ba wamaigira, faböʼö sibai ira moroi ba soi böʼö.+
10 Haniha zi tola mangerai ngawawa Yakobo simane faʼoya gawu-gawu,+Mazui sangerai si sambua niʼoʼöfa ndraono Gizaraʼeli?
Akha mate ndraʼo simane niha sadölö tödö,Akha aetu nosogu simane faʼaetu nosora.”
11 Imane Balaki khö Mbileamo, ”Hadia nifaluamö? Wa uʼohe ndraʼugö ba daʼa, ba wangelifi si faʼudu khögu. Ba hana wa öfahowuʼö ira.”+
12 Imane Bileamo, ”Hasambalö uwaʼö zi no iwaʼö khögu Yehowa.”+
13 Imane khönia Balaki, ”Aine, möi ita ba nahia tanö böʼö ba moroi ba daʼö dania öʼila ira. Hizaʼi, lö ahori öʼila ira fefu. Elifi ira khögu moroi ba daʼö.”+
14 Iʼohe ia Balaki ba Mbenua Zofimi, ba zuzu hili Wisiga.+ Ifazökhi fitu ngawua naha wanunu sumange, ba ibeʼe sageu zawi si matua ba sageu mbiri-biri si matua ero sambua naha wanunu sumange.+
15 Imane Bileamo khö Mbalaki, ”Baloi ba daʼa, ba zinga zumange nitunu nibeʼemö. Möido misa ba daʼö ba wamalukhaisi Lowalangi.”
16 Ba möi Yehowa wamalukhaisi Bileamo ba ifatunö hadia zinangea iwaʼö Bileamo.+ Imane, ”Fuliʼö khö Mbalaki, daʼa wehedeu khönia.”
17 Ba ifuli ia Bileamo khö Mbalaki, ba iʼila no mosindro Mbalaki ba zinga zumange nitunu fao ia khö ndra sondröniaʼö niha Moabi. Manofu Mbalaki khö Mbileamo, ”Hadia niwaʼö Yehowa?”
18 Ba iwaʼö gamaedola andre,+
”He Balaki, ozizio ba fondrondrongo.
Fondrondrongo niwaʼögu, yaʼugö ono Zifori.
19 Lowalangi andrö tenga simane niha si falimo-limo+Mazui simane niha si tebulö era-era.*+
Hasambalö ifalua gofu hadia niwaʼönia,Ba hasambalö itörö na fahuhuo ia.+
20 Möi ndraʼo ba daʼa ba wamahowuʼö;No ifahowuʼö+ ba tebai saʼae ubulöʼö.+
21 Lö itehegö Lowalangi na so waʼabölö gelemu solawa Yakobo,Ba lö itehegö alua wamakao ba ndraono Gizaraʼeli.
Yehowa Lowalangira zi fao khöra,+Ba tefolakhömi Lowalangi si tobali razo ba gotaluara.
22 Lowalangi zangeheta yaʼira moroi ba danö Miserai.+
Hulö dandru zawi gatua si matua ia khöra.+
23 Lö hadöi elemu si tola molawa Yakobo,+Mazui fangelifi si tola molawa Izaraʼeli.+
Iadaʼa, tola ladunö-dunö niha sanandrösa khö Yakobo hegöi Izaraʼeli,
’Mifaigi zi no ifalua Lowalangi!’
24 Daʼa soi si maoso hulö zingo,Mozizio ia simane singo.+
Lö mörö ia fatua lö ahori iʼa gahuluaniaBa fatua lö ibadu ndro gurifö niraʼunia.”
25 Imane Balaki khö Mbileamo, ”Na tebai öʼelifi ira, ba akha lö öfahowuʼö ira.”
26 Imane Bileamo, ”No uwaʼö khöu, awai nifaluagu ha niwaʼö Yehowa.”+
27 Aefa daʼö imane Balaki, ”Aine, fao khögu ba nahia böʼö. Te moroi ba daʼö dania itehegö khöu Lowalangi ba wangelifi soi daʼö khögu.”+
28 Ba iʼohe Mbileamo ba zuzu hili Weoro sangotahögö Yesimono.*+
29 Imane Bileamo khö Mbalaki, ”Fazökhi fitu ngawua naha wanunu sumange ba daʼa, ba henaigö khögu fitu ngaʼeu zawi si matua ba fitu ngaʼeu mbiri-biri si matua.”+
30 Ifalua Balaki niwaʼö Mbileamo. Ibeʼe sageu zawi si matua ba sageu mbiri-biri si matua ero sambua naha wanunu sumange.
