4 Moze 25:1-18
25 Me so ndraono Gizaraʼeli ba Ziti,+ mohorö ira khö ndraono alawe Moabi.+
2 Ladönisi ndraono Gizaraʼeli iraono alawe daʼö ba wameʼe sumange khö lowalangira.+ Ba ibörögö manga ira ba latuhi danö föna lowalangira.+
3 Fao ndraono Gizaraʼeli ba wanömba Baʼali* Weoro+ irege mofönu sibai khöra Yehowa.
4 Börö daʼö imane Yehowa khö Moze, ”Raʼu fefu zondröniaʼö yaʼira. Bunu ba tawi gamatelara föna Yehowa, föna niha sato* enaʼö alö wönu Yehowa ba ndraono Gizaraʼeli.”
5 Imane Moze khö ndra sanguhuku iraono Gizaraʼeli,+ ”Mibunu fefu zanömba Baʼali* Weoro.”+
6 Hizaʼi ba zi lö mudöna-döna, tohare samösa nono matua Gizaraʼeli, no iʼohe ndra alawe niha Midiano+ ba zanehe Moze hegöi iraono Gizaraʼeli sege-ege föna mbawandruhö nose waʼowulo.
7 Me iʼila daʼö Fineha+ ono Geleazari, ono Gere Aʼaroni, iʼanemaiʼö möi ia ba gotalua niha sato ba ituyu sara doho.
8 Ba möi ia ba nose ndra matua andrö ba faoma itaruʼö khöra doho. Itaruʼö ba dalu* ndra alawe andrö irege atöla fatambai. Me no ifalua daʼö, döhö wökhö waba si göna ba ndraono Gizaraʼeli.+
9 Si mate ba wökhö waba andrö 24.000 niha.+
10 Aefa daʼö imane Yehowa khö Moze,
11 ”No alö wönugu ba ndraono Gizaraʼeli ibeʼe Fineha+ ono Geleazari ono Gere Aʼaroni, börö me lö itehegö na so zi faröi khögu.*+ Andrö wa lö uhori ira hewaʼae na sindruhunia uʼandrö ba niha enaʼö ha yaʼo nifosumangera.+
12 Fatunö khö Wineha wa omasido fawuʼu li khönia börö me omuso dödögu khönia.
13 Daʼa mbuʼusa ligu wa lö tebulö tobali ia ere hegöi ngaʼötönia sagötö faʼara,+ börö me lö itehegö na so zi faröi khö Lowalanginia,+ ba no ifalua wangatulö ba ndraono Gizaraʼeli.”
14 Töi ndra matua Gizaraʼeli nibunu fabaya ira alawe niha Midiano andrö yaʼia daʼö Simeri ono Zalu. Yaʼia andrö sondröniaʼö ba nösi nomo zatua ira matua moroi ba mado Zimeoni.
15 Töi ndra alawe niha Midiano nibunu andrö yaʼia daʼö Kosibi ono Zuri.+ Suri andrö zondröniaʼö ba nösi nomo zatua ira matua moroi ba zi sambua mado si so ba Midiano.+
16 Imane zui Yehowa khö Moze,
17 ”Suwö niha Midiano ba bunu ira,+
18 börö me no laʼonekhesi wolimo yaʼami irege mifalua horö ba Weoro+ sanandrösa khö Gosibi, ono zondröniaʼö niha Midiano andrö, nibunu+ me alua wökhö waba ba Weoro.”+
Nisura ba gahe zura
^ Mazui ”Lafaböbö ira iraono Gizaraʼeli khö Mbaʼali”.
^ Mazui ”ba zi maʼökhö”.
^ Mazui ”zamaböbö yaʼira khö Mbaʼali”.
^ Mazui ”waʼaila”.
^ Mazui ”na so zi fahindri khögu”.
