4 Moze 27:1-23
27 Ba tohare ndraono alawe ono Zelofadi,+ ono Heferi, ono Gileadi, ono Makhiri, ono Manase, moroi ba nösi nomo Manase ono Yosefo. Töi ndraononia alawe yaʼia daʼö Mala, Noa, Hogela, Milika ba Tirisa.
2 Mozizio ira föna Moze, Ere Eleazari, ira sondröniaʼö,+ ba fefu niha sato föna mbawandruhö nose waʼowulo lamane,
3 No mate namama ba danö si mate, hizaʼi lö fao ia ba ngawawa solawa Yehowa, si faʼawö khö Gora.+ Mate ia börö horönia samösa ba lö hadöi khönia ono matua.
4 Lö matehegö na taya döi namama moroi ba nösi nomonia ha börö me lö khönia ono matua. Beʼe khöma danö simane talifusö namama ono matua.”
5 Ba iʼohe föna Yehowa zalua andre Moze.+
6 Ba fahuhuo Yehowa khö Moze,
7 ”Sindruhu niwaʼö ndraono Zelofadi andrö. Beʼe khöra danö ondröita simane khö dalifusö namara ira matua. Beʼe khöra gondröita namara.+
8 Fatunö ba ndraono Gizaraʼeli, ’Na mate zi samösa ira matua ba lö ononia matua, mibeʼe gondröitania khö nononia alawe.
9 Ba na lö hadöi khönia ono alawe, mibeʼe gondröitania khö dalifusönia ira matua.
10 Na lö hadöi talifusönia ira matua, mibeʼe gondröitania khö dalifusö namania ira matua.
11 Ba na lö hadöi talifusö namania ira matua, mibeʼe gondröitania ba niha si fahatö khöra ba nösi nomora. Niha daʼö zangokhögö ondröita andrö dania. Daʼö gangetula huku soguna ba ndraono Gizaraʼeli, simane niwaʼö Yehowa khö Moze.’”
12 Aefa daʼö imane Yehowa khö Moze, ”Aeʼe yawa ba Hili Gabari+ andrö, ba faigi danö nibeʼegu ba ndraono Gizaraʼeli dania.+
13 Na no öʼila, ba mate dania ndraʼugö*+ simane gaʼau Aʼaroni.+
14 Me fasoso khögu ndraono Gizaraʼeli ba Danö si Mate Zini, no misawö goroisagu yaʼami si darua, ba lö miʼamoniʼö ndraʼo tanö fönara me ubeʼe öra nidanö.+ Alua daʼö ba Gumbu Nidanö Meriba+ ba Gadesi,+ ba Danö si Mate Zini.”+
15 Imane Moze khö Yehowa,
16 ”He Yehowa Lowalangi sameʼe noso ba niha fefu, fataro samösa ndra matua tobali sondröniaʼö ono mbanuamö andre.
17 Ira matua daʼö dania zondröniaʼö halöwöra ba lö tebulö ibeʼe khöra wanuturu lala, enaʼö lö muzawili nono mbanua Yehowa simane biri-biri si lö kubalo.”
18 Imane Yehowa khö Moze, ”Fataro Yosua ono Nuni, ira matua sabeʼe dödöda, ba tufa tangau högönia ba wamataro yaʼia.+
19 Ba waʼö khönia wezizio föna Gere Eleazari ba föna nono mbanua sato, ba fataro ia tobali sondröniaʼö ba zanehe niha sato.+
20 Beʼe khönia ösa waʼabölö* si so khöu+ enaʼö lafondrondrongo niwaʼönia iraono Gizaraʼeli.+
21 Akha mosindro ia föna Gere Eleazari sangogunaʼö Urimi+ ba wangandrö fanuturu lala moroi khö Yehowa soguna khönia. Ba ginötö ibeʼe goroisa Yosua,* hasambalö laʼoʼö niwaʼönia andrö iraono Gizaraʼeli maʼafefu.”
22 Ifalua daʼö Moze simane niwaʼö Yehowa. Iʼohe Yosua ba ifezizio föna Gere Eleazari ba föna nono mbanua sato.
23 Itufa tangania högö Yosua ba wamataro yaʼia tobali sondröniaʼö,+ simane niwaʼö Yehowa khö Moze.+
Nisura ba gahe zura
^ Mazui ”lö ara tö teʼowuloi ndraʼugö khö ndra tuau”, daʼa amalalata wehede ba woʼamaedolagö faʼamate.
^ Mazui ”lakhömi”.
^ Mazui ”Ba ginötö ibeʼe goroisania Lowalangi,” te khö Yosua mazui Eleazari.
