4 Moze 3:1-51
3 Daʼa ngaʼötö Gaʼaroni hegöi Moze me fahuhuo Yehowa khö Moze ba Hili Zinaʼi.+
2 Töi ndraono matua khö Gaʼaroni yaʼia daʼö Nadabi ziaʼa, Abihu,+ Eleazari,+ ba Itamari.+
3 Daʼö döi-töi ndraono Gaʼaroni, ere si no mubayoini ba mufataro* ba wangai halöwö tobali ere.+
4 Hizaʼi, mate Nadabi faoma Abihu föna Yehowa me labeʼe zumange* si lö tefaudu ba goroisa Yehowa+ ba Danö si Mate Zinaʼi, ba lö hadöi ngaʼötöra. Lö laböhöli wangai halöwö ira Eleazari+ faoma Itamari+ tobali ere, fao ira khö namara Aʼaroni.
5 Imane Yehowa khö Moze,
6 ”Waʼö ba mado Lewi+ enaʼö lafahatö ira wezizio föna Gere Aʼaroni ba mangai halöwö+ ira khönia.
7 Laʼonorogö tödö halöwöra khö Gaʼaroni hegöi ba ndraono Gizaraʼeli föna nose waʼowulo ba wohalöwö ba nose Lowalangi.
8 Yaʼira zondrorogö fefu gama-gama+ ba nose waʼowulo ba lafalua halöwöra soguna ba ndraono Gizaraʼeli ba wohalöwö ba nose Lowalangi.+
9 Fataro niha Lewi ba wanolo Aʼaroni hegöi iraononia matua börö me yaʼira nifili ba gotalua ndraono Gizaraʼeli.+
10 Fataro Gaʼaroni hegöi iraononia matua ba wohalöwö tobali ere.+ Niha si lö mutehegö* samahatö yaʼia ba naha niʼamoniʼö, hasambalö mubunu.”+
11 Ifuli zui fahuhuo Yehowa khö Moze,
12 ”Ufili niha Lewi ba gotalua ndraono Gizaraʼeli tobali fangali nono siaʼa* ba Gizaraʼeli.+ Tobali tana khögu niha Lewi.
13 Börö me okhötagu nono siaʼa.+ Me ubunu fefu nono siaʼa ba Miserai,+ uʼamoniʼö khögu fefu nono siaʼa ba Gizaraʼeli, he niha hegöi urifö.+ Tobali tana khögu ira. Yaʼo Yehowa.”
14 Ifuli zui imane Yehowa khö Moze ba Danö si Mate Zinaʼi,+
15 ”Fasuraʼö döi ndra matua ngaʼötö Lewi moloʼö ösi nomo zatuara ira matua hegöi madora. Sura fefu döi zi no töra sara waŵa.”+
16 Ba isura döira Moze simane niwaʼö Yehowa khönia.
17 Daʼa döi-töi nono matua khö Lewi: Gereso, Kahati, ba Merari.+
18 Töi nono matua khö Gereso yaʼia daʼö Libini ba Simeʼi.+ Töira andrö zi tobali töi ngaʼötö ba nösi nomora.
19 Töi nono matua khö Gahati yaʼia daʼö Ameramo, Yisihara, Heberona, ba Usieli.+ Töira andrö zi tobali töi ngaʼötö ba nösi nomora.
20 Töi nono matua khö Merari yaʼia daʼö Maheli+ ba Musi.+ Töira andrö zi tobali töi ngaʼötö ba nösi nomora.
Daʼa ngaʼötö mado Lewi moloʼö ösi nomo zatuara ira matua.
21 Ba ngaʼötö Gereso, so nösi nomo Libini+ ba ösi nomo Zimeʼi. Daʼö ngaʼötö nösi nomo Gereso.
22 Fefu nono matua si no tesura töi si töra sara waŵa 7.500 niha.+
23 Fefu ngaʼötö nösi nomo Gereso lafazökhi nosera furi nose Lowalangi+ tanö ba gaekhula.
24 Sondröniaʼö ba nösi nomo zatua ira matua ba ngaʼötö Gereso yaʼia daʼö Eliazafi ono Laʼeli.
25 Halöwö ngaʼötö Gereso+ ba nose waʼowulo yaʼia daʼö ba wondrorogö ose Lowalangi, nukha nose+ hegöi balu-balunia,+ nukha mbaʼa-baʼa+ ba mbawandruhö nose waʼowulo,
26 nukha mbaʼa-baʼa ba golayama,+ nukha mbaʼa-baʼa+ ba mbawa göli golayama ba zi fasui ose Lowalangi hegöi naha wanunu sumange, sinali nose, awö zoʼamakhaita ba daʼö fefu.
27 Ba ngaʼötö Gahati, so nösi nomo Gameramo, ösi nomo Yisihara, ösi nomo Heberona, ba ösi nomo Usieli. Daʼö nösi nomo ngaʼötö Gahati.+
28 Fefu nono matua si töra sara waŵa 8.600 niha. Yaʼira nifataro ba wondrorogö nahia niʼamoniʼö.+
29 Fefu ngaʼötö nösi nomo Gahati lafazökhi nosera tanö raya nose Lowalangi.+
30 Sondröniaʼö ba nösi nomo zatua ira matua ba ngaʼötö Gahati yaʼia daʼö Elisafa ono Usieli.+
31 Halöwöra yaʼia daʼö ba wondrorogö Tawöla,+ meza,+ naha wandru,+ naha wanunu sumange,+ gama-gama+ niʼogunaʼö ba nahia niʼamoniʼö, nukha mbaʼa-baʼa,+ awö zoʼamakhaita ba daʼö fefu.+
32 Sondröniaʼö niha Lewi yaʼia daʼö Eleazari+ ono Gere Aʼaroni. Yaʼia nifataro ba wamaigi-maigi fefu zohalöwö ba nahia niʼamoniʼö.
33 Ba ngaʼötö Merari, so nösi nomo Maheli ba ösi nomo Musi. Daʼö nösi nomo ngaʼötö Merari.+
34 Fefu nono matua si no tesura töi si töra sara waŵa 6.200 niha.+
35 Sondröniaʼö ba nösi nomo zatua ira matua ba ngaʼötö Merari yaʼia daʼö Surieli ono Gabihailo. Lafazökhi nosera tanö yöu nose Lowalangi.+
36 Halöwö ngaʼötö Merari yaʼia daʼö ba wondrorogö fefu döla-döla+ nose Lowalangi, baʼa-baʼania,+ ehomonia,+ dane-danenia nifotögi, gama-gamania,+ awö zoʼamakhaita ba daʼö fefu,+
37 simanö göi gehomo si tobali ola golayama hegöi dane-danenia nifotögi,+ taru-taru ba sinali nose.
38 Moze, Aʼaroni hegöi iraononia matua, lafazökhi nosera tanö ba gatumbukha luo föna nose Lowalangi, yaʼia daʼö föna nose waʼowulo. Yaʼira zondrorogö naha niʼamoniʼö. Daʼö halöwöra soguna ba ndraono Gizaraʼeli. Niha si lö mutehegö* samahatö yaʼia ba naha niʼamoniʼö, hasambalö mubunu.+
39 Fefu nono matua moroi ba mado Lewi si töra sara waŵa moloʼö ösi nomora zamösana, no ifasuraʼö döira Moze hegöi Aʼaroni simane niwaʼö Yehowa. Faʼatora fefu 22.000 niha.
40 Imane Yehowa khö Moze, ”Sura fefu döi nono matua siaʼa ba ndraono Gizaraʼeli si töra sara waŵa.+ Erai hawaʼato ira ba sura döira.
41 Öfasambua khögu niha Lewi tobali fangali nono siaʼa ba ndraono Gizaraʼeli fefu.+ Öfasambua göi gurifö niha Lewi tobali fogati ziaʼa nono gurifö ba ndraono Gizaraʼeli fefu. Yaʼo Yehowa.”+
42 Ba isura Moze fefu döi nono siaʼa ba ndraono Gizaraʼeli, simane niwaʼö Yehowa.
43 Fefu nono matua siaʼa si no tesura töi si töra sara waŵa 22.273 niha.
44 Ba fahuhuo zui Yehowa khö Moze,
45 ”Öfasambua khögu niha Lewi tobali fangali nono siaʼa ba ndraono Gizaraʼeli fefu. Öfasambua göi gurifö niha Lewi tobali fogati guriföra. Tobali tana khögu niha Lewi. Yaʼo Yehowa.
46 Abölö ato nono matua siaʼa ba Gizaraʼeli moroi ba waʼato niha Lewi, yaʼia daʼö 273 niha.+ Ba wangöhöli yaʼira,+
47 owuloi 57 gram* wirö ero samösa,+ moloʼö suʼa-suʼa waʼabua niʼogunaʼö ba nahia niʼamoniʼö.+
48 Beʼe gefe daʼö khö Gaʼaroni hegöi ba ndraononia matua. Daʼö zi tobali höli ba niha si töra faʼato no mege.”
49 Börö daʼö, möi Moze ba wangowuloi kefe ba wangöhöli niha si töra faʼato no mege moroi ba niha Lewi.
50 Itema daʼö moroi ba ndraono matua siaʼa ba Gizaraʼeli. Faʼebuania 15,5 kilogram* firö, moloʼö suʼa-suʼa waʼabua niʼogunaʼö ba nahia niʼamoniʼö.
51 Ba möi Moze wameʼe kefe fangöhöli andrö khö Gaʼaroni hegöi iraononia matua moloʼö fehede* Yehowa, simane niʼoroisi Yehowa khönia.
Nisura ba gahe zura
^ Sin.: ”mufönuiʼö tanga”.
^ Sin.: ”galitö”.
^ Sin.: ”Niha si fatewu”, yaʼia daʼö niha si tenga ösi nomo Gaʼaroni.
^ Sin.: ”fangali nono siaʼa samokai naha nono”.
^ Sin.: ”Niha si fatewu”, yaʼia daʼö si tenga niha Lewi.
^ Sin.: ”bawa”.
