4 Moze 30:1-16
30 Fahuhuo Moze khö ndra sondröniaʼö+ mado ndraono Gizaraʼeli, ”Daʼa niwaʼö Yehowa:
2 Na so samösa ndra matua si fawuʼu li+ mazui möi ia ba hölu khö Yehowa+ wa ifalua wamoni, tebai isawö zi no ifabuʼu andrö.+ Fefu zi no ifabuʼu hasambalö ifalua.+
3 ”Na so ndra alawe sawuyu-wuyu si fawuʼu li mazui möi ia ba hölu khö Yehowa me lö saheta ia ba nomo namania nasa,
4 ba no irongo amania mbuʼusa li mazui hölunia andrö ba lö fatimba khö namania, hasambalö wa ifalua daʼö.
5 Hizaʼi, na irongo amania hölu mazui buʼusa linia andrö ba fatimba khö namania, lö moguna ifalua daʼö. Ebolo dödö Yehowa khönia börö me lö itehegö amania.+
6 ”Ba na so woʼomonia ira matua, hizaʼi lö iʼangeragö sakali mbuʼusa linia,
7 ba me irongo daʼö foʼomonia ira matua, ba lö fatimba khönia, ifalua mbuʼusa linia mazui hölu si no iwaʼö.
8 Ba na fatimba khö woʼomonia ira matua me irongo daʼö, tola iwuʼai mbuʼusa li si lö fakhamö iʼangeragö foʼomonia andrö+ ba ebolo dödö Yehowa khönia.
9 ”Na fawuʼu li zi samösa lakha mbanua mazui ira alawe si no fabali khö woʼomonia, hasambalö ifalua zi no ifabuʼu.
10 ”Na fawuʼu li zi samösa ira alawe mazui möi ia ba hölu me so ia ba nomo woʼomonia ira matua,
11 ba no irongo foʼomonia ira matua ba fao dödönia mazui lö fatimba khönia, hasambalö ifalua mbuʼusa linia andrö mazui hölunia.
12 Hizaʼi, na irongo daʼö foʼomonia ira matua ba sindruhu-ndruhu lö itehegö khönia wamalua daʼö, lö moguna ifalua mbuʼusa li mazui hölunia andrö.+ No iwuʼai foʼomonia ba ebolo dödö Yehowa khönia.
13 Ha foʼomonia zi tola mamawuʼai mazui manehegö buʼusa li hegöi hölunia ba wamoni ba fangide-ngideʼö.
14 Na lö fatimba khö woʼomonia ira matua ba zi hauga hari, eluahania fao dödönia ba mbuʼusa li daʼö mazui hölunia. Fao dödö woʼomonia ba daʼö börö me lö fatimba khönia me irongo hölu woʼomonia andrö.
15 Na awena iwuʼai daʼö foʼomonia ba ngaluo böʼö, yaʼia zoluʼi horö woʼomonia andrö.+
16 ”Daʼö gamakhoita niwaʼö Yehowa khö Moze sanandrösa khö woʼomo ira alawe hegöi foʼomo ira matua, ba simanö göi gamakhoita khö zi samösa ama ba ononia alawe sawuyu-wuyu si toröi ba nomonia.”
