4 Moze 31:1-54
31 Imane Yehowa khö Moze,
2 ”Sulöni+ zi no lafalua niha Midiano+ ba ndraono Gizaraʼeli. Aefa daʼö, ba mate ndraʼugö.”*+
3 Ba fahuhuo Moze ba ndraono Gizaraʼeli, ”Mifaʼanö khömi ndra matua si fasuwö ba wolawa niha Midiano ba mifalua wönu Yehowa ba niha Midiano.
4 Ero sambua mado ba ndraono Gizaraʼeli mifatenge 1.000 zaradadu si fasuwö.”
5 Moroi ba gotalua ndraono Gizaraʼeli+ si hauga ribu faʼato, lafatenge 1.000 niha ero sambua mado ba weʼamöi fasuwö. Faʼatora fefu 12.000 niha.
6 Lö ara, ifatenge ira Moze ba wasuwöta, 1.000 niha ero sambua mado fao Wineha+ ono Gere Eleazari solohe gama-gama niʼamoniʼö ba torofe ba wameʼe tandra.+
7 Möi ira fasuwö, lalawa niha Midiano simane niwaʼö Yehowa khö Moze. Ba labunu fefu ndra matua.
8 Baero ndra niha daʼö, labunu nasa dalima razo Midiano, yaʼia daʼö Ewi, Rekema, Suri, Huri, ba Reba. Labunu göi Mbileamo+ ono Mbeori faoma föda.
9 Hizaʼi, laʼoloiʼö ndra alawe awö ndraono niha Midiano. Larabu nasa zawi, nambi, biri-biri, ba fefu gurifö hegöi harato niha Midiano.
10 Latunu fefu mbanua niha Midiano awö nosera.*
11 Laʼohe fefu gama-gama si no larabu ba laʼoloiʼö, niha hegöi urifö.
12 Ba laʼohe daʼö khö Moze, Ere Eleazari, ba fefu ndraono Gizaraʼeli si so ba nose ba Danö si Mate Moabi,+ ba zinga Nungo Nidanö Yoridano sahatö ba Yerikho.
13 Aefa daʼö möi baero Moze, Ere Eleazari, ba fefu zondröniaʼö iraono Gizaraʼeli ba wamalukhaisi yaʼira baero nose.
14 Hizaʼi, mofönu Moze khö ndra matua si no lafili tobali sondröniaʼö ira saradadu ba wasuwöta, yaʼia daʼö kumandru zi saribu ba kumandru zi daotu sangawuli ba wasuwöta.
15 Imane khöra Moze, ”Hana wa mitehegö auri ndra alawe?
16 Yaʼira zondrönisi tödö ndraono Gizaraʼeli ba wehede Mbileamo. Yaʼira mbörö wa faröi ndraono Gizaraʼeli+ khö Yehowa ba Weoro+ irege göna famakao nono mbanua Yehowa.+
17 Iadaʼa, mibunu fefu nono matua awö nono alawe si no irai orudu ba ndra matua.
18 Hizaʼi, fefu nono alawe si lö irai orudu ba ndra matua, mitehegö auri ira.+
19 Miʼiagö baero nose sagötö zi fitu hari. Dozi si no mamunu niha ba si no mombambaya boto zi mate andrö,+ enaʼö iʼamoniʼö ia+ ba ngaluo si tölu faoma ba ngaluo si fitu, he yaʼami hegöi niha niʼoloiʼömi.
20 Miʼamoniʼö moroi ba horö fefu mbaru, gama-gama moroi ba guli gurifö, gama-gama moroi ba geu, ba fefu nifazökhi moroi ba mbu nambi.”
21 Aefa daʼö, imane Ere Eleazari khö ndra saradadu sangawuli moroi ba wasuwöta andrö, ”Daʼa goroisa Yehowa nifaʼemania khö Moze:
22 ’Anaʼa, firö, tembaga, siʼöli, simo safusi, simo saitö,
23 ba fefu zi fataha ba galitö, enaʼö latunu irege aheta waʼaraʼiönia. Hizaʼi, fefu daʼö miʼamoniʼö faoma idanö niʼogunaʼö ba wangamoniʼö.+ Fefu zi lö fataha ba galitö, misasai ba nidanö.
24 Misasai mbarumi ba ngaluo si fitu ba lö raʼiö ami saʼae. Awena tola möi ami bakha ba nose.’”+
25 Imane Yehowa khö Moze,
26 ”Sura fefu zi no mirabu ba miʼerai zi no miʼoloiʼö, niha hegöi urifö. Ohe awöu Gere Eleazari awö ndra sondröniaʼö ba nösi nomo zatua ira matua ba ndraono Gizaraʼeli.
27 Mibagi dua zi no mirabu andrö, soguna khö ndra saradadu si möi fasuwö ba soguna ba ndraono Gizaraʼeli tanö böʼö.+
28 Halö ösa dana* khö ndra saradadu si möi fasuwö, beʼe khö Yehowa yaʼia daʼö samösa moroi ba zi 500 niha, simanö göi zawi, kalide, biri-biri hegöi nambi.
29 Halö daʼö ba beʼe khö Gere Eleazari si tobali tolo-tolo khö Yehowa.+
30 Moroi ba dana khö ndraono Gizaraʼeli, halö samösa moroi ba zi 50 niha, simanö göi zawi, kalide, nambi, biri-biri, ba fefu gurifö. Beʼe daʼö khö ndra niha Lewi+ sohalöwö ba nose Yehowa.”+
31 Ba lafalua daʼö ira Moze faoma Ere Eleazari, simane niʼoroisi Yehowa khö Moze.
32 Si toröi nirabu awö niʼoloiʼö ndra saradadu si möi fasuwö yaʼia daʼö 675.000 ngaʼeu nambi ba biri-biri,
33 72.000 ngaʼeu zawi,
34 ba 61.000 ngaʼeu galide.
35 Faʼato ndraono alawe si lö irai orudu ba ndra matua+ 32.000 niha.
36 Tana khö ndra saradadu si möi fasuwö 337.500 ngaʼeu nambi ba biri-biri.
37 Nambi hegöi biri-biri si tobali tana khö Yehowa 675 ngaʼeu.
38 Faʼoya zawi 36.000 ngaʼeu, ba tana khö Yehowa 72 ngaʼeu.
39 Faʼoya galide 30.500 ngaʼeu, ba tana khö Yehowa 61 ngaʼeu.
40 Faʼato niha 16.000, ba tana khö Yehowa 32 niha.
41 Aefa daʼö, ihalö dana khö Yehowa andrö Moze ba ibeʼe ba danga Gere Eleazari,+ simane sibai niwaʼö Yehowa khö Moze.
42 Tana khö ndraono Gizaraʼeli nifasambua Moze moroi ba dana khö ndra saradadu si möi fasuwö,
43 faʼoyania 337.500 ngaʼeu nambi ba biri-biri,
44 36.000 ngaʼeu zawi,
45 30.500 ngaʼeu galide,
46 ba 16.000 niha.
47 Moroi ba dana khö ndraono Gizaraʼeli, ihalö Moze samösa moroi ba zi 50 niha simanö göi gurifö ba ibeʼe khö niha Lewi+ sohalöwö ba nose Yehowa,+ simane niwaʼö Yehowa khö Moze.
48 Ira matua nifili tobali kumandru ndra saradadu si hauga ribu faʼato,+ yaʼia daʼö kumandru zi saribu ba kumandru zi daotu, möi lafalukhaisi Moze
49 ba lamane, ”No laʼerai ira sawuyumö andre hawaʼato zaradadu nifatöröma ba samösa lö si taya.+
50 Börö daʼö, omasiga mabeʼe zumange khö Yehowa moroi ba zinöndrama, yaʼia daʼö gama-gama moroi ba ganaʼa, galagahe, galadanga, laeduru nifotandro, ati-ati, ba gama-gama tanö böʼö, ba wamalua fangatulö khöma föna Yehowa.”
51 Ba itema ganaʼa daʼö Moze hegöi Ere Eleazari moroi khöra awö gama-gama tanö böʼö.
52 Faʼoya ganaʼa niʼamualagöra khö Yehowa 190 kilogram,* moroi khö ndra kumandru zi saribu ba kumandru zi daotu.
53 No lahalö dana khöra zamösana ira saradadu.
54 Itema ganaʼa daʼö Moze hegöi Ere Eleazari moroi khö ndra kumandru zi saribu ba kumandru zi daotu. Laʼohe bakha ba nose waʼowulo enaʼö itörö tödö ndraono Gizaraʼeli zi no ifalua Yehowa khöra.
Nisura ba gahe zura
^ Mazui ”teʼowuloi ndraʼugö khö ndra tuau”, daʼa amalalata wehede ba woʼamaedolagö faʼamate.
^ Mazui ”nosera nifotowa”.
^ Mazui ”Owuloi pajak”.
