4 Moze 32:1-42
-
Nahia waʼatoröi tanö ba gatumbukha Yoridano (1-42)
32 Oya sibai gurifö niʼokhögö ngaʼötö Rubeno+ hegöi ngaʼötö Gado.+ Ba laʼila wa sökhi na moʼurifö ira ba danö Yaʼezeri+ awö Gileadi.
2 Andrö wa möi ira wamalukhaisi Moze, Ere Eleazari hegöi ira sondröniaʼö ba lamane,
3 ”Ataroti, Dibona, Yaʼezeri, Nimera, Hesibona,+ Eleale, Sebama, Nebo,+ ba Beono+
4 daʼö mbanua nikalaisi Yehowa ba ndraono Gizaraʼeli.+ Oya sibai gurifö ndra sawuyumö andre ba sökhi na manguri urifö ba mbanua daʼö.+
5 Na fao dödömi, mitehegö khöma mbanua daʼö enaʼö tobali tana khöma, ba böi mifarou ndraʼaga wangötö Ungo Nidanö Yoridano.”
6 Imane Moze ba ngaʼötö Gado hegöi ba ngaʼötö Rubeno, ”Mofanö ndra talifusömi fasuwö, ba hana wa toröi ami ba daʼa?
7 Hana wa omasi ami na awuwu ndraono Gizaraʼeli weʼamöi ba danö nibeʼe Yehowa khöra dania?
8 Daʼö nifalua ndra tuami me ufatenge ira ba wamauze tanö andrö moroi ba Gadesi-mbarenea.+
9 Me ofeta ira ba Ndraso Esikoli+ ba lafaigi danö daʼö, awuwu ndraono Gizaraʼeli labeʼe irege lö omasi ira weʼamöi ba danö nibeʼe Yehowa khöra dania.+
10 Mofönu sibai Yehowa ba möi ia ba hölu,+
11 ’Fefu zaheta moroi ba danö Miserai si töra 20 fakhe, lö laʼila dania danö+ nifabuʼugu khö Gaberahamo, Izaʼaki, ba Yakobo,+ börö me lö laʼoʼö niwaʼögu soroi ba dödö.
12 Hizaʼi, lö farahu ba gotaluara Galebi+ ono Yefune niha Genisi ba Yosua+ ono Nuni, börö me laʼoʼö niwaʼö Yehowa soroi ba dödö.’+
13 Me luo daʼö, mofönu sibai Yehowa ba ndraono Gizaraʼeli, lua-luania lafasu-fasui manö danö si mate sagötö zi 40 fakhe,+ irege no ahori mate fefu niha samalua si lö sökhi andrö föna Yehowa.+
14 Hulö göi simane daʼö ami iadaʼa, miʼoʼö lala ndra tuami. Amaedola ngawawa niha samalua horö ami khö Yehowa irege mofönu sibai ia ba ndraono Gizaraʼeli.
15 Na lö saʼae miʼoʼö niwaʼönia, hasambalö ifuli iröi soi daʼa ba danö si mate. Yaʼami mbörö wa mate fefu soi daʼa.”
16 Aefa daʼö, möi ira lafalukhaisi Moze lamane, ”Na tola, akha mafazökhi khöma kandra gurifö moroi ba gara ba enaʼö mowanua ndraonoma ba daʼa.
17 Hizaʼi, hasambalö möiga fasuwö.+ Maʼiagö föna ndraono Gizaraʼeli irege no mafasao ira ba nahiara. Gasa-gasa daʼö, toröi ndraonoma ba mbanua nifoʼöli enaʼö lö lafakao ira ba mbanua daʼö.
18 Lö mangawuliga ba nahiama na lö nitema ndraono Gizaraʼeli danö ondröita khöra zamösana.+
19 Lö mafaogö ndraʼaga khöra wanema tanö ondröita ba zinga Nungo Nidanö Yoridano hegöi ba danö böʼö, börö me no matema dana khöma ba gatumbukha Nungo Nidanö Yoridano.”+
20 Imane khöra Moze, ”Na simane daʼö, daʼa zinangea mifalua: Mifaʼanö ami ba wasuwöta föna Yehowa,+
21 ba miʼötö Nungo Nidanö Yoridano. Na no ifofanö dania zi faʼudu khönia Yehowa,+
22 ba na no ikalaisi soi daʼö Yehowa,+ awena tola mangawuli ami+ ba aefa zalami khö Yehowa hegöi ba Gizaraʼeli. Tola saʼae miʼokhögö mbanua daʼa föna Yehowa.+
23 Na lö mifalua daʼö ba fasala ami föna Yehowa ba göna ami lua-luania.
24 Tola mitaruʼö mbanua ba ndraonomi hegöi kandra gurifö,+ hizaʼi mifalua zi no mifabuʼu.”
25 Ba lamane ira ngaʼötö Gado awö ngaʼötö Rubeno khö Moze, ”Hasambalö mafalua zi no öwaʼö.
26 Toröi ba Gileadi ndraonoma, foʼomoma, uriföma, ba fefu gurifö si no mafaliaro.+
27 Hizaʼi, laʼötö dania Nungo Nidanö Yoridano ira enonimö andre ba no lafaʼanö ira fasuwö föna Yehowa,+ simane niwaʼöu.”
28 Ba ibeʼe khöra goroisa Moze sanandrösa khö Gere Eleazari, Yosua ono Nuni, ba ira sondröniaʼö ba nösi nomo zatua ira matua ba mado Gizaraʼeli.
29 Imane Moze, ”Na fao khömi ngaʼötö Gado hegöi ngaʼötö Rubeno ba wangötö Ungo Nidanö Yoridano, ba fefu niha no lafaʼanö ira fasuwö föna Yehowa ba kala soi daʼö fönami, mibeʼe khöra mbanua Gileadi.+
30 Ba na lö fao ira khömi fasuwö hegöi ba wangötö Ungo Nidanö Yoridano, ba akha toröi ira khömi ba danö Ganaʼana.”
31 Ba lamane ira ngaʼötö Gado hegöi ngaʼötö Rubeno, ”Hadia niwaʼö Yehowa, daʼö nifalua ndra enonimö andre.
32 No mafaʼanö ndraʼaga fasuwö salahi Yehowa ba möiga ba danö Ganaʼana.+ Hizaʼi, ba zinga Nungo Nidanö Yoridano andre so khöma danö ondröita.”
33 Ba ngaʼötö Gado, ngaʼötö Rubeno,+ ba matonga mado Manase+ ono Yosefo, ibeʼe khöra Moze wamatörö Zihona,+ razo niha Gamori ba famatörö Ogi,+ razo Mbazana, yaʼia daʼö banua si so ba nöri daʼö, awö mbanua ba zi fasuinia.
34 Ba fefu ngaʼötö Gado lafasindro* mbanua Dibona,+ Ataroti,+ Aroeri,+
35 Ateroti-zofana, Yaʼezeri,+ Yogebeha,+
36 Beti-nimera,+ ba Beti-harama,+ yaʼia daʼö banua nifoʼöli. Lafazökhi göi kandra gurifö moroi ba gara.
37 Ba fefu ngaʼötö Rubeno lafazökhi Hesibona,+ Eleale,+ Kiriataʼi,+
38 Nebo,+ ba Baʼali-meono+ (no lafaböʼöni döi mbanua daʼö), simanö göi Zibema. Ibörögö lafaböʼöni döi mbanua nifazökhira mangawuli.
39 Mofanö ngaʼötö Makhiri+ ono Manase, numalö ia ba Gileadi, irabu mbanua andrö ba ifofanö niha Gamori si so ba mbanua daʼö.
40 Börö daʼö, ibeʼe Moze mbanua Gileadi khö Makhiri ono Manase, ba toröi ia ba daʼö.+
41 Möi fasuwö Yaʼiri ono Manase, oya irabu mbanua nose Gileadi, ba ifotöi Hawoti-yaʼiri.*+
42 Möi fasuwö göi Noba, irabu mbanua Genata awö mbanua ba zi fasuinia. Ifotöi mbanua daʼö Noba, simane töinia samösa.
