4 Moze 35:1-34
35 Ifuli zui fahuhuo Yehowa khö Moze ba Danö si Mate Moabi ba zinga Nungo Nidanö Yoridano+ sahatö ba Yerikho,
2 ”Waʼö ba ndraono Gizaraʼeli enaʼö labeʼe ösa danö ondröitara ba niha Lewi si tobali nahia waʼatoröira.+ Enaʼö labeʼe göi mbenua soduʼu ba zi fasui mbanua andrö khö ndra niha Lewi.+
3 Ba daʼö toröi niha Lewi, ba labeʼe mbenua soduʼu andrö soguna ba guriföra, gama-gama niʼogunaʼö ba gurifö, ba fefu guriföra tanö böʼö.
4 Benua soduʼu nibeʼera khö ndra niha Lewi 445 meter* waʼebolo, laʼerai iʼotarai göli samasui banua.
5 Baero mbanua andrö, misuʼa 890 meter* numalö ba gatumbukha, 890 meter numalö miraya, 890 meter numalö ba gaekhula ba 890 meter numalö miyöu, enaʼö bakha ba dalu so mbanua daʼö. Daʼö zi tobali benua soduʼu ba mbanuara.
6 ”Banua si lö tola löʼö mubeʼe khö ndra niha Lewi yaʼia daʼö 6 ngawua mbanua folumöʼö,+ si tobali nahia niha soloi si no mamunu niha,+ ba 42 mbanua tanö böʼö.
7 Faʼoya mbanua nibeʼe khö ndra niha Lewi yaʼia daʼö 48, fao göi ba daʼö mbenua soduʼu.+
8 Banua nibeʼemi andrö mihalö moroi ba danö ndraono Gizaraʼeli.+ Ba ngawawa sabölö ebua, miʼebuaʼö wangai, ba ngawawa side-ide, miʼide-ideʼö wangai.+ Ero sambua ngawawa, ibeʼe ösa mbanuania ba niha Lewi moloʼö ondröita si no itema.”
9 Imane Yehowa khö Moze,
10 ”Fatunö ba ndraono Gizaraʼeli, ’Miʼötö dania Nungo Nidanö Yoridano numalö ba danö Ganaʼana.+
11 Mifili mbanua si tefaudu moloʼö yaʼami tobali banua folumöʼö. Na so zamunu niha si tenga niʼodödögö, tola moloi ia ba daʼö.+
12 Banua daʼö zi tobali folumöʼö ba niha solau balö+ enaʼö lö mate zamunu niha andrö fatua lö muʼetuʼö hukumania föna niha sato.+
13 Daʼö mbörö wa mufazökhi mbanua si önö ngawua andrö tobali banua folumöʼö.
14 Henaigö tölu mbanua folumöʼö ba zinga Nungo Nidanö Yoridano+ ba tölu göi ba danö Ganaʼana.+
15 Banua si önö ngawua andrö tobali folumöʼö ba ndraono Gizaraʼeli, niha si fatewu+ hegöi si toröi sabata ba gotaluara, enaʼö tola moloi ba daʼö zamunu niha si tenga niʼodödögö.+
16 ”’Hizaʼi, na ibözi niha faoma siʼöli irege mate, lafotöi niha daʼö samunu niha. Samunu niha andrö hasambalö labunu.+
17 Na itebu faoma kara ba mate niha andrö ibeʼe, lafotöi ia samunu niha. Samunu niha andrö hasambalö labunu.
18 Na ibözi faoma eu ba mate niha andrö ibeʼe, lafotöi ia samunu niha. Samunu niha andrö hasambalö labunu.
19 ”’Ha solau balö zi tola mamunu niha daʼö. Na falukha khönia zolau balö, ba labunu ia.
20 Na ituliʼö niha daʼö börö waʼafökhö dödö mazui itebu börö gera-erania si lö sökhi irege mate niha daʼö,+
21 mazui börö waʼafatuwunia irege ibözi faoma tangania ba mate niha andrö, hasambalö göi labunu ia. Samunu niha ia. Na falukha khönia zolau balö, ba labunu ia.
22 ”’Hizaʼi, na tenga iʼodödögö wanuliʼö niha daʼö ba tenga börö waʼafökhö dödönia, mazui itebu niha daʼö tenga börö gera-erania si lö sökhi,+
23 mazui na lö niʼilania niha daʼö me ifazaumba gara hewaʼae lö si faʼudu ira mazui edöna ifaʼala, ba mate niha daʼö,
24 lafatunö zalua andrö ira sanguhuku hegöi solau balö moloʼö amakhoita andre.+
25 Laʼefaʼö niha samunu andrö moroi ba danga zolau balö, ba lafangawuli ia ba mbanua folumöʼö, nahia woloinia. Ba daʼö manö toröi ia irege mate gere sebua nibayoini faoma fanikha niʼamoniʼö.+
26 ”’Ba na moloi zamunu niha andrö baero mbanua folumöʼö, nahia woloinia
27 ba falukha ia khö ndra solau balö ba labunu ia ba nola danö mbanua folumöʼö, lö moʼömö do niha solau balö andrö.
28 Toröi manö niha samunu andrö ba mbanua folumöʼö irege mate gere sebua. Hizaʼi, na no mate gere sebua, tola mangawuli ia ba khöra.+
29 Tobali amakhoita daʼö khömi fefu hegöi ba ngaʼötömi gofu hezo toröi ami.
30 ”’Haniha zamunu niha+ ba hasambalö göi labunu ia moloʼö fangombakha ndra samaduhuʼö.+ Hizaʼi, tebai labunu niha na ha samösa zamaduhuʼö.
31 Böi tema höli salahi noso zamunu niha sinangea mate, börö me sinangea labunu ia.+
32 Ba böi tema höli salahi niha soloi ba mbanua folumöʼö, yaʼia daʼö höli enaʼö tola mangawuli ia ba khöra fatua lö mate gere sebua.
33 ”’Böi mitaʼunöisi danö si toröi yaʼami me tola raʼiö danö börö ndro,+ ba lö hadöi fangatulö ba ndro niduwagö, baero ndro niha sanuwagö yaʼia.+
34 Böi mitaʼunöisi danö si toröi yaʼami, nahia waʼatoröigu. Yaʼo Yehowa zi toröi ba gotalua ndraono Gizaraʼeli.’”+
