4 Moze 36:1-13
-
Amakhoita na mangowalu ndra alawe sanema tanö ondröita (1-13)
36 Ira sondröniaʼö ba nösi nomo ngaʼötö Gileadi ono Makhiri+ ono Manase, moroi ba nösi nomo ngaʼötö Yosefo, lafalukhaisi Moze hegöi ira sondröniaʼö, yaʼia daʼö sondröniaʼö ba nösi nomo ndraono Gizaraʼeli.
2 Lamane, ”No iʼoroisi khöu Yehowa ba wombagi tanö ondröita andre ba ndraono Gizaraʼeli ba öfalua dahö-dahö.+ Yehowa göi zangumaʼö khöu enaʼö öbeʼe gondröita dalifusöma Zelofadi ba ndraononia alawe.+
3 Na mangowalu ira ba ndra matua mado tanö böʼö, aheta gondröitara moroi ba gondröita ndra tuama ba tobali ondröita ndra matua sangai yaʼira. Aheta saʼae khöma gondröita daʼö.
4 Na alua ndröfi Yobeli+ ba ndraono Gizaraʼeli, tobali ondröita mado sangai yaʼira gondröitara andrö. Börö daʼö, aheta gondröitara moroi ba gondröita ndra tuama.”
5 Aefa daʼö, imane Moze ba ndraono Gizaraʼeli simane niwaʼö Yehowa, ”Atulö niwaʼö ngaʼötö mado Yosefo andrö.
6 Daʼa goroisa Yehowa saekhu ba nono Zelofadi ono alawe: ’Tola mangowalu ira gofu haʼökhö zomasi ira, asala ba niha si otarai mado ndra amara.
7 Tebai tefawuʼa gondröita ndraono Gizaraʼeli misa ba mado tanö böʼö, börö me iraono Gizaraʼeli zi no mutatugöi ba wangokhögö harato ndra tuara.
8 Na so nono alawe sanema ondröita ba gotalua mado ndraono Gizaraʼeli, tebai möi ia nihalö na tenga ba ngaʼötö mado namania.+ Daʼö mbörö wa lö tebulö ba ndraono Gizaraʼeli wangokhögö harato ndra tuara.
9 Tebai tefawuʼa gondröita ndraono Gizaraʼeli misa ba mado tanö böʼö börö me ha mado ndraono Gizaraʼeli zangokhögö ondröitara zamösana.’”
10 Ba lafalua daʼö iraono Zelofadi simane niwaʼö Yehowa khö Moze.+
11 Börö daʼö, mangowalu nono Zelofadi+ sotöi Mala, Tirisa, Hogela, Milika, ba Noa ba ndraono moroi ba ngaʼötö nösi nomo namara.
12 Tobali ira foʼomo ndra matua moroi ba nösi nomo Manase ono Yosefo, enaʼö lö tebulö laʼokhögö gondröita ba mado namara.
13 Daʼö goroisa hegöi angetula huku nibeʼe Yehowa ba ndraono Gizaraʼeli nifaʼemania khö Moze ba Danö si Mate Moabi, ba zinga Nungo Nidanö Yoridano sahatö ba Yerikho.+
