4 Moze 4:1-49
4 Ba imane Yehowa khö Moze hegöi Aʼaroni,
2 ”Miʼerai hawaʼato fefu ndraono matua ngaʼötö Gahati+ moroi ba ngaʼötö Lewi moloʼö mado hegöi ösi nomo zatuara ira matua,
3 yaʼia daʼö si 30+ irugi 50 fakhe.+ Fao ira dania ba ngawawa zohalöwö ba nose waʼowulo.+
4 ”Daʼa halöwö nono matua ngaʼötö Gahati ba nose waʼowulo.+ Fondrege niʼamoniʼö daʼa:
5 Ba ginötö mofanö ndraono Gizaraʼeli, möi Gaʼaroni hegöi iraononia matua bakha ba nose. Laheta nukha mbaʼa-baʼa si tobali oto-oto+ ba labalugö dawöla+ Famaduhuʼö faoma nukha daʼö.
6 Labalugö detenia faoma lembe nifazökhi moroi ba guli nasu nasi, aefa daʼö labalugö faoma nukha sobalau, ba lafasa mbea-bea famazawa.+
7 ”Labalugö meza naha roti nibaliʼö sumange+ faoma nukha sobalau. Labeʼe ba detenia wiga faoma mako, teko hegöi tambala niʼogunaʼö ba zumange nibadu.+ Tebai laheta ba meza andrö roti nibaliʼö sumange.+
8 Labalugö faoma nukha soyo,* aefa daʼö labalugö faoma lembe nifazökhi moroi ba guli nasu nasi, ba lafasa mbea-bea famazawa.+
9 Lahalö nukha sobalau ba labalugö naha wandru,+ fefu wandru,+ folazi tali wandru, naha mbo galitö,+ ba fefu naha wanikha wandru andrö.
10 Labukusi fefu awö gama-gamania ba labalugö faoma lembe nifazökhi moroi ba guli nasu nasi, ba labeʼe ba mbea-bea famazawa.
11 Aefa daʼö, labalugö faoma nukha sobalau naha wanunu sumange nifazökhi moroi ba ganaʼa,+ ba me no labalugö faoma lembe nifazökhi moroi ba guli nasu nasi, awena labeʼe mbea-bea famazawania.+
12 Na no awai daʼö, lahalö fefu gama-gama+ si toʼölö laʼogunaʼö ba wangai halöwö ba nahia niʼamoniʼö. Labeʼe daʼö ba nukha sobalau ba labukusi faoma lembe nifazökhi moroi ba guli nasu nasi, awena labeʼe mbea-bea famazawa.
13 ”Latiboʼö nawu* si so ba naha wanunu sumange,+ ba labalugö naha wanunu sumange andrö faoma nukha si ungu laʼa-laʼa.*
14 Labeʼe yawa ba detenia fefu gama-gama niʼogunaʼö na mangai halöwö ba naha wanunu sumange, yaʼia daʼö garafu, tambila, mako, ba naha mbo galitö.+ Ba labalugö faoma lembe nifazökhi moroi ba guli nasu nasi, awena labeʼe mbea-bea famazawania.+
15 ”Ba ginötö mofanö soi daʼö, labalugö fefu gama-gama nahia niʼamoniʼö+ ira Aʼaroni hegöi iraononia matua. Ba tohare fefu nono matua ngaʼötö Gahati wamazawa daʼö.+ Hizaʼi, maʼifu tebai lababaya gama-gama nahia niʼamoniʼö andrö faböi mate ira.+ Daʼö halöwöra ba nose waʼowulo.
16 ”Eleazari+ ono Gere Aʼaroni nifataro ba wamaigi-maigi fanikha wandru,+ sumange somuhua,+ sumange niʼa* si lö tebulö mubeʼe, ba fanikha famataro.*+ Yaʼia zamaigi-maigi ose Lowalangi awö nösinia maʼafefu, fao ba daʼö nahia niʼamoniʼö hegöi gama-gamania.”
17 Imane Yehowa khö Moze hegöi Aʼaroni,
18 ”Böi tehegö tehori ngaʼötö Gahati+ ba gotalua niha Lewi.
19 Daʼa zinangea lafalua faböi mate ira börö me lafahatö ira ba gama-gama fondrege niʼamoniʼö.+ Möi Gaʼaroni bakha ba nose hegöi iraononia matua, ba latatugöi halöwö niha zamösana ba hadia zinangea laʼohe.
20 Tebai möi ira bakha ba wamaigi gama-gama niʼamoniʼö hewaʼae na ha sabata, enaʼö lö mate ira.”+
21 Imane Yehowa khö Moze,
22 ”Miʼerai hawaʼato fefu nono matua ngaʼötö Gereso+ moloʼö mado hegöi ösi nomo zatuara ira matua.
23 Fasuraʼö fefu döi niha si 30 irugi 50 fakhe. Fao ira dania ba ngawawa zohalöwö ba nose waʼowulo.
24 Daʼa halöwö sinangea lafalua ösi nomo ngaʼötö Gereso:+
25 Lafazawa nukha nose Lowalangi,+ nukha fombalugö ose waʼowulo, balu-balu nose hegöi lembe nifazökhi moroi ba guli nasu nasi nibeʼe yawa ba detenia+ awö nukha mbaʼa-baʼa ba mbawandruhö.+
26 Ba lafazawa göi nukha mbaʼa-baʼa si tobali oto-oto golayama,+ nukha mbaʼa-baʼa ba mbawa göli golayama+ si fasui ose Lowalangi hegöi naha wanunu sumange, sinali nose awö gama-gamania, ba fefu wakake niʼogunaʼö ba halöwö andrö. Daʼö halöwöra.
27 Aʼaroni hegöi iraononia matua zamaigi-maigi fefu halöwö awö gama-gama nifazawa ngaʼötö Gereso.+ Mifataro ira ba wamazawa gama-gama daʼö fefu.
28 Daʼö halöwö nösi nomo ngaʼötö Gereso ba nose waʼowulo.+ Itamari+ ono Gere Aʼaroni zamaigi-maigi fefu halöwö nifaluara.
29 ”Fasuraʼö göi döi nono matua ngaʼötö Merari+ moloʼö mado hegöi ösi nomo zatuara ira matua,
30 yaʼia daʼö niha si 30 irugi 50 fakhe. Fao ira dania ba ngawawa zohalöwö ba nose waʼowulo.
31 Daʼa halöwöra ba nose waʼowulo:+ Lafazawa fefu döla-döla+ nose Lowalangi, baʼa-baʼania,+ ehomonia,+ dane-danenia nifotögi;+
32 fefu gehomo+ si tobali oto-oto golayama, dane-danenia nifotögi,+ taru-taru+ hegöi sinali nose ba gama-gamania, awö zoʼamakhaita ba daʼö fefu. Yaʼami zotatugöi hadia gama-gama sinangea iʼohe si samösa niha.
33 Daʼö halöwö nösi nomo ngaʼötö Merari+ ba nose waʼowulo. Itamari ono Gere Aʼaroni+ zamaigi-maigi fefu halöwö nifaluara.”
34 Ba lafasuraʼö döi nono matua ngaʼötö Gahati+ ira Moze, Aʼaroni, awö zondröniaʼö+ iraono Gizaraʼeli, moloʼö mado hegöi ösi nomo zatuara ira matua,
35 yaʼia daʼö niha si 30 irugi 50 fakhe. Fao ira dania ba ngawawa zohalöwö ba nose waʼowulo.+
36 Fefu zi no tesura töi moloʼö ösi nomora 2.750 niha.+
37 Yaʼira zi no tesura töi moroi ba nösi nomo ngaʼötö Gahati, fefu zangai halöwö ba nose waʼowulo. Isura döira Moze hegöi Aʼaroni simane niwaʼö Yehowa khö Moze.+
38 Mufasuraʼö döi nono matua ngaʼötö Gereso+ moloʼö mado hegöi ösi nomo zatuara ira matua,
39 yaʼia daʼö niha si 30 irugi 50 fakhe. Fao ira dania ba ngawawa zohalöwö ba nose waʼowulo.
40 Fefu zi no tesura töi moloʼö mado hegöi ösi nomo zatuara ira matua 2.630 niha.+
41 Daʼö zi no tesura töi ba nösi nomo ngaʼötö Gereso, fefu zangai halöwö ba nose waʼowulo. Isura döira Moze hegöi Aʼaroni simane niwaʼö Yehowa.+
42 Fefu nono matua ngaʼötö Merari, lasura döira moloʼö mado hegöi ösi nomo zatuara ira matua,
43 yaʼia daʼö niha si 30 irugi 50 fakhe. Fao ira dania ba ngawawa zohalöwö ba nose waʼowulo.+
44 Fefu zi no tesura töi moloʼö ösi nomora 3.200 niha.+
45 Daʼö zi no tesura töi ba nösi nomo ngaʼötö Merari nifasuraʼö Moze hegöi Aʼaroni simane niwaʼö Yehowa khö Moze.+
46 Ba lafasuraʼö döi niha Lewi ira Moze, Aʼaroni, awö zondröniaʼö iraono Gizaraʼeli, moloʼö mado hegöi ösi nomo zatuara ira matua,
47 yaʼia daʼö niha si 30 irugi 50 fakhe. Fao ira dania ba ngawawa zohalöwö ba nose waʼowulo ba yaʼira zamazawa fefu gama-gama si so ba daʼö.+
48 Fefu zi no tesura töi 8.580 niha.+
49 Lasura döira simane niwaʼö Yehowa khö Moze. No latatugöi halöwö hegöi gama-gama sinangea lafazawa. Ba lafasuraʼö döira simane niwaʼö Yehowa khö Moze.
Nisura ba gahe zura
^ Mazui ”kirimisi”.
^ Mazui ”nawu sotawö”, yaʼia daʼö awu si no mufaruka ba dawö gurifö nibeʼe sumange.
^ Mazui ”sobowo doru”.
^ Mazui ”sumange bua nowi”.
^ Sin.: ”famayoini”.
