4 Moze 5:1-31
5 Imane Yehowa khö Moze,
2 ”Waʼö ba ndraono Gizaraʼeli enaʼö laʼohe baero nose niha si no göna bou auri,+ niha sokiöni zi hulö nana+ hegöi niha si raʼiö börö niha si no mate.+
3 Mifatenge ira baero, he ira matua hegöi ira alawe. Mifofanö ira moroi ba nose waʼowulo faböi taʼunö+ nose nahia waʼatoröigu.”+
4 Ba lafalua daʼö iraono Gizaraʼeli. Lafofanö baero ndra niha daʼö moroi ba nose, simane niwaʼö Yehowa khö Moze.
5 Ba imane zui Yehowa khö Moze,
6 ”Fatunö ba ndraono Gizaraʼeli, ’Na so samösa ndra matua mazui ira alawe samalua horö ba faröi ia khö Yehowa, fasala niha daʼö.+
7 Moguna ifaduhuʼö+ horönia,* ba afönu wamuʼania fangali zala si no ifalua, inönö sambua niʼolima tö.+ Ibeʼe daʼö ba niha nilimonia.
8 Hizaʼi, na mate niha daʼö ba lö hadöi si fahatö khönia si tola manema fangali zala andrö, khö Yehowa mubeʼe daʼö ba tobali tana khö gere. Lö si fao ba daʼö mbiri-biri si matua si tobali fangatulö niʼogunaʼö ndra ere ba wangatulöʼö yaʼia.+
9 ”’Fefu dolo-tolo niʼamoniʼö+ nibeʼe ndraono Gizaraʼeli khö gere tobali tana khö gere.+
10 Gofu hadia ngawalö niʼamoniʼö si tobali okhöta zi samösa niha, lö tebulö wa tana khönia daʼö. Gofu hadia nibeʼe zi samösa niha khö gere ba tobali tana khö gere daʼö.’”
11 Ba imane Yehowa khö Moze,
12 ”Waʼö ba ndraono Gizaraʼeli, ’Na so woʼomo ira alawe si fakawa ba ndra matua böʼö ba faröi ia khö woʼomonia,
13 irege mohorö ira ndra matua daʼö,+ ba lö anehe woʼomonia ba samösa lö sangila, hewaʼae no raʼiö ndra alawe daʼö, lö hadöi samaduhuʼö ba lö niraʼu ia me ifalua daʼö.
14 Ba na olohu woʼomonia ira matua ba manahö-nahö dödönia wa no faröi woʼomonia, hewaʼae na raʼiö woʼomonia mazui löʼö,
15 möi ndra matua daʼö ba wamasao foʼomonia khö gere ba iʼohe göi zumange soguna khö woʼomonia, yaʼia daʼö 2,2 liter* hamo barli. Tebai ifaruka wanikha mazui ibeʼe gumöyö yawa ba dete, börö me sumange niʼa hamo daʼö soguna ba waʼolohu, yaʼia daʼö sumange niʼa ba wamasugi ba dödö olalöwa.
16 ”’Iʼandrö ere enaʼö ifahatö ia ira alawe daʼö ba mosindro ia föna Yehowa.+
17 Ihalö ere nidanö niʼamoniʼö ba zi sambua bowoa tanö, ba ihalö göi maʼifu gawu-gawu moroi ba zalo nose Lowalangi, awena ifaruka ba nidanö andrö.
18 Iʼandrö khönia ere enaʼö mosindro ia föna Yehowa ba idudu mbunia. Aefa daʼö, ibeʼe ba laluʼa danga ndra alawe daʼö zumange niʼa si tobali famasugi ba dödö, yaʼia daʼö sumange niʼa soguna ba waʼolohu,+ ba iʼohe nidanö safeto si möi börö wangelifi.+
19 ”’Me no awai daʼö, iʼandrö ere enaʼö möi ba hölu ndra alawe daʼö imane, ”Na sindruhu lö hadöi ira matua böʼö sorudu khöu me tefaböbö nasa ami woʼomou,+ ba na lö si fakawa ndraʼugö ba ndra matua böʼö ba raʼiö ndraʼugö, yalöʼifakao ndraʼugö idanö safeto si möi börö wangelifi andre.
20 Hizaʼi, na raʼiö ndraʼugö börö me no fakawa ndraʼugö ba ndra matua böʼö+ me tefaböbö nasa ami woʼomou, ba orudu ndraʼugö khö ndra matua böʼö,—”
21 Ba ibeʼe ba hölu ndra alawe daʼö wa göna ia fangelifi na sindruhu no ifalua, ba imane khönia ere, ”Yaʼiʼogunaʼö döimö Yehowa ba wangelifi hegöi feʼamöi ba hölu ba gotalua soimö. Aeru wahamö* ibeʼe Yehowa ba gambu dalumö.
22 Idanö si möi börö wangelifi andre möi ba mbetuʼamö, ba gambu dalumö ba aeru wahamö.”* Ba imane ira alawe daʼö, ”Yaduhu! Yaduhu!”*
23 ”’Aefa daʼö, isura ere wangelifi daʼö ba zi sambua buku ba iʼosi faoma idanö safeto andrö.
24 Ba iwaʼö khö ndra alawe daʼö wamadu idanö safeto si möi börö wangelifi andrö, ba ofeta bakha ba mbetuʼania tobali fökhö.
25 Moroi ba danga ndra alawe daʼö, ihalö ere zumange niʼa soguna ba waʼolohu,+ ifazaule-zaule föna Yehowa ba iʼohe ahatö ba naha wanunu sumange.
26 Ihalö ere zumange niʼa sandraʼu waʼoya ba itunu ba naha wanunu sumange si tobali salahi* zumange andrö maʼafefu.+ Aefa daʼö, iwaʼö khö ndra alawe daʼö ba wamadu idanö safeto andrö.
27 Na sindruhu raʼiö ndra alawe daʼö ba no faröi ia khö woʼomonia, me no aefa ibadu nidanö daʼö ba ofeta bakha ba mbetuʼania tobali fökhö. Gambu dalunia ba aeru wahania* ba laʼogunaʼö döinia ba wangelifi ba gotalua soinia.
28 Hizaʼi, na lö si raʼiö ndra alawe daʼö, aefa ia ba wangelifi andrö. Tola manabina ia ba moʼono.
29 ”’Daʼö goroisa sanandrösa ba waʼolohu,+ na so ndra alawe si fakawa ba ndra matua böʼö ba raʼiö ia hewaʼae tefaböbö nasa ia khö woʼomonia,
30 mazui olohu woʼomo ira matua ba manahö-nahö dödönia wa no faröi khönia woʼomonia. Moguna iʼohe woʼomonia föna Yehowa ba ifalua fefu goroisa andrö ere khö ndra alawe daʼö.
31 Lö fasala woʼomonia ira matua andrö ba iluʼi samösa horönia foʼomonia ira alawe.’”
Nisura ba gahe zura
^ Sin.: ”lafaduhuʼö horöra”.
^ Eluahania daʼa tebai mongaʼötö ia.
^ Eluahania daʼa tebai mongaʼötö ia.
^ Mazui ”Yasimanö zalua! Yasimanö zalua!”
^ Mazui ”si tobali famasugi ba dödö”.
^ Eluahania daʼa tebai mongaʼötö ia.
