4 Moze 6:1-27
6 Ba imane Yehowa khö Moze,
2 ”Waʼö ba ndraono Gizaraʼeli, ’Na so ndra matua mazui ira alawe si fawuʼu li khö Yehowa enaʼö tobali ia niha Naziri,*+
3 tebai ibadu nagu hegöi ngawalö duo tanö böʼö. Tebai ibadu nagu saisö mazui ngawalö zaisö moroi ba duo tanö böʼö.+ Tebai ibadu nidanö nifazökhi moroi ba mbua nagu. Tebai göi iʼa mbua nagu, he sauri hegöi soköli.
4 Sagötö tobali ia niha Naziri, tebai iʼa gofu hadia gö nifazökhi moroi ba mbua nagu, simanö göi mbua nagu sataha awö gulinia.
5 ”’Sagötö faböbö ia nasa tobali niha Naziri, tebai itaba mbunia.+ Lö tebulö iʼamoniʼö ia ba ifotuwu mbunia irege awai ginötö wamasambua yaʼia khö Yehowa.
6 Sagötö mufasambua ia khö Yehowa, tebai ifahatö ia ba mboto niha si no mate.
7 Na mate namania, mazui inania, mazui talifusönia ira matua, mazui talifusönia ira alawe, tebai raʼiö ia ba daʼö.+ Bunia zi tobali tandra wa no tobali ia niha Naziri khö Lowalanginia.
8 ”’Sagötö tobali ia niha Naziri, teʼamoniʼö ia khö Yehowa.
9 Hizaʼi, na so zi mate ba zingania ba zi lö mudöna-döna+ irege raʼiö mbunia si tobali tandra wa no mufasambua ia khö Lowalangi, lö tola löʼö itaba mbunia+ ba ginötö muʼombakhaʼö wa lö raʼiö ia saʼae, yaʼia daʼö ba ngaluo si fitu.
10 Ba ngaluo si walu, iʼohe dombua marafadi mazui fune khö gere ba mbawandruhö nose waʼowulo.
11 Ere dania zameʼe fofo si sambua andrö tobali sumange fameta horö, ba sambua tö ibeʼe tobali sumange nitunu. Ere zamalua fangatulö khönia+ börö me no fatöfa khönia mboto niha si no mate. Aefa daʼö, iʼamoniʼö högönia ba zi maʼökhö daʼö.
12 Ifuli ifasambua ia khö Yehowa tobali niha Naziri, ba iʼohe sageu mbiri-biri si matua si döfi faʼebua mazui ambö tobali sumange fameta zala. Hizaʼi, lö laʼerai saʼae ginötö si no italuʼi börö me no raʼiö ia sagötö tobali ia niha Naziri.
13 ”’Daʼa goroisa sanandrösa ba niha Naziri: Na no awai ginötö wa tefaböbö ia tobali niha Naziri,+ laʼohe ia ba mbawandruhö nose waʼowulo.
14 Ba daʼö ibeʼe zumange khö Yehowa, yaʼia daʼö sageu mbiri-biri si matua tobali sumange nitunu+ ba sageu mbiri-biri si alawe tobali sumange fameta horö.+ Tenga urifö sofökhö gurifö si dua ngaʼeu andrö ba enaʼö si döfi faʼebua mazui ambö; ibeʼe göi sageu mbiri-biri si matua si lö fökhö tobali sumange fangatulö.+
15 Ibeʼe göi sambua raga-raga roti niʼogala danga si lö mufaruka ragi, nifazökhi moroi ba hamo darigu si sökhi nifaruka fanikha; simanö göi roti sanifi-nifi si lö mufaruka ragi si no mufagule fanikha; awö zumange niʼa*+ ba sumange nibadu.+
16 Iʼohe daʼö fefu ere föna Yehowa ba ibeʼe zumange fameta horö ba sumange nitunu.
17 Ibeʼe mbiri-biri si matua andrö ere tobali sumange fangatulö khö Yehowa, ifaogö zi sambua raga-raga roti si lö mufaruka ragi. Ibeʼe göi zumange niʼa+ awö zumange nibadu.
18 ”’Möi niha Naziri andrö föna nose waʼowulo ba wanaba bunia.+ Aefa daʼö, ihalö mbunia si no itaba ba ibeʼe ba galitö si so ba narö zumange fangatulö.
19 Ba ihalö ere daʼio mbiri-biri si matua andrö nirino,+ sambua roti niʼogala danga si lö mufaruka ragi, ba sambua roti sanifi-nifi si lö mufaruka ragi. Ibeʼe fefu daʼö ba danga niha Naziri andrö me no aefa itaba mbunia si tobali tandra wa yaʼia andrö niha Naziri.
20 Ifazaule-zaule daʼö ere föna Yehowa tobali sumange nifazaule.+ Teʼamoniʼö daʼö fefu ba tobali tana khö gere, farahu ba daʼö döla doto hegöi ahe, yaʼia daʼö tana niʼamoniʼö.+ Awena tola ibadu nagu niha Naziri andrö.
21 ”’Daʼa goroisa ba niha Naziri+ si no fawuʼu li: Na no fawuʼu li ia wa tola ibeʼe zumange khö Yehowa töra moroi ba zi no muhonogöi, ifalua mbuʼusa linia andrö moloʼö oroisa sanandrösa ba niha Naziri.’”
22 Ba imane Yehowa khö Moze,
23 ”Fatunö khö Gaʼaroni hegöi iraononia matua, ’Simane daʼa wamahowuʼömi+ iraono Gizaraʼeli:
24 ”Yaʼifahowuʼö ami Yehowa,+ yaʼirorogö ami.
25 Yaʼifohaga mbawania khömi Yehowa,+ ba yaʼomuso dödönia khömi.
26 Yaʼiforomaʼö waʼasökhi dödönia khömi* Yehowa ba yaʼibeʼe khömi waʼohahau dödö.”’+
27 Yalaʼogunaʼö döigu ba wamahowuʼö soi Gizaraʼeli+ enaʼö ufahowuʼö soi daʼö.”+
Nisura ba gahe zura
^ Ba li Heberaiʼo, na·zir′, eluahania ”Niha nilulu faʼauri; Niha nifasambua”.
^ Mazui ”zumange bua nowi”.
^ Sin.: ”Yaʼifazawa mbawania khöu”.
