4 Moze 8:1-26
8 Imane Yehowa khö Moze,
2 ”Waʼö khö Gaʼaroni, ’Na öfohola wandru si fitu ngawua, enaʼö ihagaini tanö föna naha wandru andrö.’”+
3 Ba ifalua daʼö Aʼaroni. Ifohola wandru daʼö enaʼö ihagaini tanö föna naha wandru,+ simane niwaʼö Yehowa khö Moze.
4 Simane daʼa wamazökhi naha wandru andrö: Mufazökhi ia moroi ba ganaʼa niböbözi,+ iʼotarai döla ofeta ba mbungania. Lafazökhi daʼö moloʼö angilata+ nibeʼe Yehowa khö Moze.
5 Imane zui Yehowa khö Moze,
6 ”Fasambua niha Lewi moroi ba ndraono Gizaraʼeli ba amoniʼö ira.+
7 Daʼa nifaluamö na öʼamoniʼö ira: Tefe ira idanö fanasai horöra. Latöwö fefu mbotora maʼasageu, lasasai mbarura ba mondri ira.+
8 Aefa daʼö, lahalö sageu zawi si matua sawuyu-wuyu+ lafaogö zumange niʼa,*+ yaʼia daʼö hamo darigu si sökhi nifaruka fanikha. Ba fuli halö sageu tö zawi si matua sawuyu-wuyu tobali sumange fameta horö.+
9 Ohe niha Lewi föna nose waʼowulo ba owuloi fefu ndraono Gizaraʼeli.+
10 Ba ginötö öʼohe niha Lewi föna Yehowa, enaʼö lafazawa dangara iraono Gizaraʼeli ba högö niha Lewi.+
11 Aefa daʼö, ibeʼe* niha Lewi andrö Aʼaroni tobali sumange khö Yehowa, sumange nifazaule+ moroi ba ndraono Gizaraʼeli. Yaʼira dania zangai halöwö khö Yehowa.+
12 ”Latufa tangara ira niha Lewi högö zawi si matua andrö.+ Aefa daʼö, labeʼe sageu zawi si matua tobali sumange fameta horö ba sageu tö tobali sumange nitunu khö Yehowa. Mufalua daʼö fefu ba wangatulöʼö yaʼira.+
13 Waʼö ba niha Lewi enaʼö mozizio ira föna Gaʼaroni hegöi iraononia matua, ba beʼe* ira tobali sumange nifazaule khö Yehowa.
14 Fasambua niha Lewi moroi ba ndraono Gizaraʼeli enaʼö tobali ira tana khögu.+
15 Aefa daʼö, möi dania niha Lewi wangai halöwö ba nose waʼowulo. Simane daʼö lala wangamoniʼöu yaʼira ba beʼe* ira tobali sumange nifazaule.
16 Yaʼira andrö nibeʼe tobali tana khögu moroi ba gotalua ndraono Gizaraʼeli. Ufasambua ira khögu tobali fangali nono siaʼa ba ndraono Gizaraʼeli.+
17 Tana khögu fefu nono siaʼa ba ndraono Gizaraʼeli, niha hegöi urifö.+ No uʼamoniʼö ira khögu me ubunu fefu nono siaʼa ba danö Miserai.+
18 Uhalö niha Lewi tobali fangali nono siaʼa ba ndraono Gizaraʼeli.
19 Ba gotalua ndraono Gizaraʼeli, niha Lewi dania nibeʼegu khö Gaʼaroni hegöi ba ndraononia matua. Mangai halöwö ira ba nose waʼowulo+ ba lafalua wangatulö ba ndraono Gizaraʼeli, enaʼö lö göna si lö sökhi ndraono Gizaraʼeli+ na lafahatö ira ba nahia niʼamoniʼö.”
20 Ba lafalua daʼö ira Moze, Aʼaroni hegöi iraono Gizaraʼeli maʼafefu ba niha Lewi, moloʼö niwaʼö Yehowa khö Moze.
21 Laʼehaogö mbotora ira niha Lewi ba lasasai nukhara.+ Aefa daʼö, ibeʼe* ira Aʼaroni tobali sumange nifazaule föna Yehowa.+ Ba iʼatulöʼö ira Aʼaroni ba wangamoniʼö yaʼira.+
22 Me no aefa daʼö, mohalöwö niha Lewi ba nose waʼowulo ba Aʼaroni hegöi iraononia matua zamaigi-maigi yaʼira. Daʼö nifalua khö ndra niha Lewi, simane niwaʼö Yehowa khö Moze.
23 Imane Yehowa khö Moze,
24 ”Daʼa gamakhoita soguna ba niha Lewi: Ira matua si töra 25 fakhe, enaʼö fao ia ba ngawawa zohalöwö ba nose waʼowulo.
25 Na no irugi 50 fakhe, molombase ia ba halöwö daʼö ba lö mangai halöwö ia saʼae.
26 Tola itolo ndra talifusönia sangai halöwö ba nose waʼowulo hizaʼi tebai mangai halöwö ia ba daʼö. Daʼö zinangea öfalua ba niha Lewi hegöi ba halöwöra.”+
Nisura ba gahe zura
^ Mazui ”zumange bua nowi”.
^ Sin.: ”ifazaule”. Eluahania ifarou ira enaʼö mozaule.
^ Sin.: ”fazaule”. Eluahania ifarou ira enaʼö mozaule.
^ Sin.: ”fazaule”. Eluahania ifarou ira enaʼö mozaule.
^ Sin.: ”ifazaule”. Eluahania ifarou ira enaʼö mozaule.
