4 Moze 9:1-23
9 Ba mbaŵa siföföna ba ndröfi si mendrua me no aheta ndraono Gizaraʼeli ba danö Miserai, fahuhuo Yehowa khö Moze+ ba Danö si Mate Zinaʼi,
2 ”Lö tola löʼö, lafaʼanö iraono Gizaraʼeli zumange Wasa+ ba ginötö si no muhonogöi.+
3 Ba ngaluo si 14 ba mbaŵa daʼa ba zi tanö owi,* mifaʼanö ia ba ginötö si no muhonogöi, moloʼö fanuturu lala hegöi si no mufakhoi.”+
4 Ba möi Moze wamatunö ba ndraono Gizaraʼeli enaʼö lafaʼanö zumange Wasa.
5 Ba ngaluo si 14 ba mbaŵa siföföna ba zi tanö owi,* lafaʼanö zumange Wasa ba Danö si Mate Zinaʼi. Lafalua daʼö iraono Gizaraʼeli simane niwaʼö Yehowa khö Moze.
6 Hizaʼi, so niha si raʼiö börö me no ibabaya niha si no mate+ irege tebai lafaʼanö zumange Wasa ba ngaluo daʼö. Ba möi ira lafalukhaisi Moze faoma Aʼaroni ba zi maʼökhö daʼö.+
7 Lamane, ”No raʼiö ndraʼaga börö me no mababaya niha si no mate. Hadia tebai mabeʼe zumange khö Yehowa ba ginötö si no muhonogöi simane iraono Gizaraʼeli tanö böʼö?”+
8 Ba imane khöra Moze, ”Mibaloi ba daʼa, daʼusofu khö Yehowa hadia zinangea ufalua khömi.”+
9 Imane Yehowa khö Moze,
10 ”Waʼö ba ndraono Gizaraʼeli, ’Hewaʼae so ba gotaluami mazui ba ngaʼötömi zofanö ba zaröu mazui si no raʼiö börö me no ibabaya niha si no mate,+ hasambalö ifaʼanö zumange Wasa khö Yehowa.
11 Lö tola löʼö lafaʼanö daʼö ba ngaluo si 14 ba mbaŵa si 2+ ba zi tanö owi.* Lafaogö wemanga yaʼia ba roti si lö mufaruka ragi faoma sayu safeto,+
12 ba tebai laröi ofeta mahemolu sihulö wongi.+ Tebai lafatö zara döla gurifö nibeʼe sumange andrö.+ Lafaʼanö fefu daʼö moloʼö si no mutatugöi sanandrösa ba Wasa.
13 Hizaʼi, na so niha si lö mamaʼanö sumange Wasa hewaʼae lö raʼiö ia ba lö sofanö ia ba zaröu, hasambalö mibunu ia*+ börö me lö ibeʼe zumange khö Yehowa ba ginötö si no muhonogöi. Yaʼia zoluʼi horönia.
14 ”’Niha si fatewu göi moguna lafaʼanö zumange Wasa khö Yehowa.+ Ifaʼanö moloʼö fanuturu lala hegöi si no muhonogöi sanandrösa ba Wasa.+ So sambua gamakhoita soguna khömi hegöi ba niha si fatewu.’”+
15 Me no awai lafasindro nose Lowalangi+ ba so lawuo sombalugö ose andrö, yaʼia daʼö ose si so Famaduhuʼö. Hizaʼi, hulö galitö lawuo daʼö ba dete nose Lowalangi na bongi ofeta moluo.+
16 Daʼa zi lö tebulö alua: So lawuo daʼö ba dete nose Lowalangi na ba zi maʼökhö, ba hulö galitö na ba zi bongi.+
17 Gofu hawaʼara muzawa lawuo daʼö ba nose Lowalangi, iʼanemaiʼö mofanö ndraono Gizaraʼeli.+ Hezo tebato lawuo andrö, ba daʼö göi lafazökhi nosera iraono Gizaraʼeli.+
18 Mofanö ndraono Gizaraʼeli moloʼö niwaʼö Yehowa, ba lafuli zui lafazökhi nosera moloʼö niwaʼö Yehowa.+ Sagötö so lawuo andrö ba dete nose Lowalangi, lö tebulö toröi ira ba daʼö.
19 Na lö tebulö lawuo daʼö mato hauga hari ba dete nose Lowalangi, hasambalö laʼoʼö niwaʼö Yehowa iraono Gizaraʼeli ba tebai mofanö ira.+
20 Itaria lö tebulö lawuo ba dete nose Lowalangi mato hauga hari. Lö tebulö toröi ira moloʼö niwaʼö Yehowa, ba mofanö ira moloʼö niwaʼö Yehowa.
21 Itaria, ha ba zi bongi so lawuo daʼö ofeta moluo, ba na muzawa ia ba zihulö wongi, laʼanemaiʼö mofanö. Gofu hawaʼara tefazawa lawuo daʼö, he na ba zi maʼökhö mazui ba zi bongi, hasambalö mofanö ira.+
22 He na dua hari, sara waŵa mazui töra, sagötö so lawuo daʼö ba dete nose Lowalangi, lö tebulö laʼiagö nosera iraono Gizaraʼeli ba lö mofanö ira. Hizaʼi, na muzawa lawuo daʼö, laʼanemaiʼö mofanö.
23 Lafazökhi nosera moloʼö niwaʼö Yehowa, ba mofanö ira moloʼö niwaʼö Yehowa. Lö laböhöli woloʼö niwaʼö Yehowa, simane niʼoroisi Yehowa khö Moze.
Nisura ba gahe zura
^ Te me no aekhu luo, fatua lö ogömi.
^ Te me no aekhu luo, fatua lö ogömi.
^ Te me no aekhu luo, fatua lö ogömi.
^ Sin.: ”miheta ia moroi ba soinia”.
