5 Moze 10:1-22
10 ”Me luo daʼö, imane khögu Yehowa, ’Fuli fazökhi dua ngaʼörö gara simane siföföna+ ba aeʼe miyawa ba hili wangondrasi yaʼo. Fazökhi göi sambua dawöla* moroi ba geu.
2 Ba gara si dua ngaʼörö andrö, usura dania ngawua wehede simane nisuragu ba wamobörö ba gara si dua ngaʼörö andrö si no örasa, ba öbeʼe daʼö bakha ba dawöla.’
3 Börö daʼö, ufazökhi dawöla moroi ba geu akasia ba dua ngaʼörö gara simane siföföna. Möido miyawa ba hili, uʼohe gara si dua ngaʼörö andrö.+
4 Ba ngaʼörö gara daʼö, isura ngawua wehedenia Yehowa si no irai isura ba zilalö,+ yaʼia daʼö si Fulu Oroisa,*+ nitötöinia khömi moroi bakha ba galitö,+ me owulo ami ba gahe hili.+ Aefa daʼö, ibeʼe khögu gara si no isura andrö Yehowa.
5 Möido mitou moroi ba hili+ ba ubeʼe ngaʼörö gara daʼö bakha ba dawöla ba lö lafawuʼa ia ba daʼö simane niwaʼö Yehowa khögu.
6 ”Me no awai daʼö, ba mofanö ndraono Gizaraʼeli moroi ba Mbeʼeroti Mbene-yaʼaka numalö ba Mosera. Ba daʼö mate Gaʼaroni ba lakoʼo ia.+ Ononia Eleazari zi tobali ere fangalinia.+
7 Laʼotarai ba daʼö, mofanö ira ba Gudigoda, ba moroi ba Gudigoda numalö ba Yotabata,+ banua soya ungo nidanö.
8 ”Me luo daʼö, ifasambua niha Lewi+ Yehowa ba wamazawa tawöla amabuʼula li Yehowa,+ ba wangai halöwö föna Yehowa, ba wamahowuʼö ono mbanua daʼa ba döinia+ simane nifaluara irugi maʼökhö.
9 Daʼö mbörö wa lö hadöi tana khö ndra niha Lewi mazui ondröita nitemara simane ira talifusöra. Yehowa zameʼe soguna khöra* simane niwaʼö Yehowa Lowalangimi khönia.+
10 Toröido ba hili 40 ngaluo ba 40 wongi+ simane nifaluagu ba zilalö. Me luo daʼö, ifuli zui ifondrondrongo wehedegu+ Yehowa ba lö aʼozu ihori ami Yehowa.
11 Imane khögu Yehowa, ’Döniaʼö soi daʼö ba mifaʼanö ami wofanö enaʼö tola möi ira ba larabu danö nibeʼegu khöra, simane si no möido ba hölu khö ndra tuara.’+
12 ”Yaʼami iraono Gizaraʼeli, ha daʼa niʼandrö Yehowa khömi iadaʼa:+ Miʼataʼufi Yehowa Lowalangimi,+ mitörö lalania,+ miʼomasiʼö ia, mifosumange Yehowa Lowalangimi soroi ba dödö ba nosomi* maʼasambua,+
13 ba miʼoʼö goroisa awö gamakhoita Yehowa nifaʼemagu khömi maʼökhö daʼa. Mifalua fefu daʼö börö me si sökhi khömi.+
14 Yehowa Lowalangimi zokhö banua si yawa, simanö göi mbanua fondrege zalawa hegöi ulidanö awö nösinia maʼafefu.+
15 ”Hizaʼi, ifahatö ia Yehowa khö ndra tuami ba iforomaʼö waʼomasinia khöra. No ifili göi ami awö ngaʼötömi+ moroi ba gotalua soi simane iadaʼa.
16 Börö daʼö, miʼehaogö* dödömi+ ba miböhöli waʼabeʼe högömi.*+
17 Yehowa Lowalangimi andrö Lowalangi yawa lowalangi böʼö+ ba Soʼaya yawa zoʼaya tanö böʼö, Lowalangi solakhömi, sabölö ba sahöli-höli dödö, si lö ebua dödö zambuana+ ba si lö manema sölö-sölö.
18 Ifalua waʼatulö ba ndraono si lö ama* ba lakha mbanua.+ Iʼomasiʼö niha si fatewu,+ ibeʼe göra awö nukhara.
19 Miʼomasiʼö göi niha si fatewu, börö me no irai tobali ami niha si fatewu mböröta ba danö Miserai.+
20 ”Ha Yehowa Lowalangimi zinangea miʼataʼufi, ha yaʼia mifosumange.+ Böi mifaröi khönia, ba na möi ami ba hölu, miʼae ba hölu ba döinia.
21 Ha yaʼia zinangea misuno.+ Ha yaʼia Lowalangimi si no mamalua ngawalö zahöli-höli dödö ba fondrege zabölö si no anehe ami.+
22 Me mböröta, ha 70 niha ndra tuami si numalö ba danö Miserai.+ Iadaʼa, monönö waʼatomi ibeʼe Yehowa Lowalangimi simane faʼoya ndröfi ba dalu mbanua.+
Nisura ba gahe zura
^ Mazui ”weti”.
^ Sin.: ”si Fulu Taromali”.
^ Sin.: ”Yehowa gondröitara”.
^ Faigi Geluaha Ngawua Wehede.
^ Sin.: ”misuna”.
^ Sin.: ”mbörö tuʼimi”.
^ Mazui ”si lö ama si lö ina”.
