5 Moze 11:1-32
11 ”Miʼomasiʼö Yehowa Lowalangimi+ ba mifalua hadia zi lö tola löʼö tobali foʼömömi khönia, simanö göi gamakhoitania, angetula hukunia awö goroisania.
2 Maʼökhö andre, aboto ba dödömi wa yaʼo zi fahuhuo khömi, tenga ba ndraonomi si lö manema ba si lö mangila fotu moroi khö Yehowa Lowalangimi,+ lakhöminia+ awö dangania sabölö+ hegöi taʼionia sebua kuaso.*
3 Lö niʼilara tandra sahöli-höli dödö ba fefu nifaluania ba danö Miserai maʼasagörö hegöi khö Waraʼo.+
4 Lö göi niʼilara zi no ifalua khö ndra saradadu niha Miserai hegöi kudo awö gureta wasuwöta khö Waraʼo si no ahöndrö ba Nasi Soyo me lagohi ami ira niha Miserai. Me luo daʼö, ihori ira Yehowa irege lö hadöi si toröi.+
5 Lö niʼilara zi no ifalua khömi ba danö si mate irege ofeta ami ba nahia daʼa,
6 mazui nifaluania khö Datano ba Abiramo, iraono Geliabi ono Rubeno, me itölö ira tanö ba zanehe ndraono Gizaraʼeli, fao nösi nomora awö nosera ba fefu zoloʼö yaʼira.+
7 No anehe ami fefu zahöli-höli dödö nifalua Yehowa.
8 ”Lö tola löʼö miʼoʼö fefu goroisa nifaʼemagu khömi maʼökhö, enaʼö itugu abölö ami ba tola mirugi danö andrö ba mirabu,
9 ba anau nosomi+ ba danö si fahöna susu ba wewani,+ tanö nifabuʼu Yehowa si no möi ia ba hölu wa ibeʼe khö ndra tuami hegöi ba ngaʼötöra.+
10 ”Tanö nirabumi andrö tenga simane tanö Miserai si no miröi. Si toʼölönia, mitanö danömö zinanö ba Miserai ba mikhao lala nidanö si fao faʼerege dödö,* hulö na mifoʼidanö kabu sayu khömi.
11 Hizaʼi, tanö si möi ami dania ba niʼokhögömi andrö yaʼia daʼö tanö soya hili-hili hegöi daso+ samadu idanö deu moroi yawa ba dalu mbanua.+
12 Yehowa Lowalangimi zondrorogö tanö daʼö. Lö iböhöli Yehowa Lowalangimi wamaigi-maigi tanö andrö iʼotarai wamobörö ofeta ahori ndröfi.
13 ”Na sindruhu-ndruhu miʼoʼö goroisa nifaʼemagu khömi maʼökhö, ba miʼomasiʼö Yehowa Lowalangimi, mifosumange ia soroi ba dödö hegöi nosomi* maʼasambua,+
14 iʼasogö* dania khömi deu ba danömi na inötönia, teu ba ginötö wangaruru ba teu ba ginötö woliwiö. Ba miʼowuloi göi mbua zinanö khömi, bua nagu si bohou ba fanikha.+
15 Ifatumbuʼö dania ndruʼu ba mbenua khömi balazo gurifö. Ba manga ami irege abuso.+
16 Miʼangelama faböi adöni dödömi ba miʼerogö ndraʼo ba wamosumange lowalangi tanö böʼö hegöi ba wangalulu khöra.+
17 Na mifalua zimane daʼö ba mofönu khömi Yehowa. Iduhö mbanua si yawa irege lö moteu+ ba lö mowua zinanö ba danö. Tehori ami ba zi lö arara moroi ba danö si sökhi nibeʼe Yehowa.+
18 ”Miʼiröʼö ba dödömi awö ba gera-erami wehedegu khömi maʼökhö. Miböbö ia ba dangami si tobali famasugi ba dödö ba enaʼö hulö mböbö högö ba gangangomi.*+
19 Mifahaʼö fefu daʼö ba ndraonomi ba mifatunö daʼö na so ami ba nomo, na mofanö ami ba lala, na mörö, ba na maoso ami.+
20 Misura daʼö fefu ba högö mbawandruhö nomomi hegöi ba mbawa göli khömi,
21 enaʼö anau nosomi+ hegöi iraonomi ba danö nifabuʼu Yehowa khömi si no möi ia ba hölu khö ndra tuami,+ sagötö feʼaso mbanua yawa danö.
22 ”Na miʼodödögö woloʼö ba mifalua fefu niwaʼögu khömi, ba miʼomasiʼö Yehowa Lowalangimi,+ mitörö fefu lalania ba lö faröi ami khönia,+
23 ifofanö fefu soi daʼa Yehowa fönami,+ ba mirabu dania mbanua niha sagabölö ba sato ono mbanua moroi khömi.+
24 Fefu nahia si no mihundragö, tobali tana khömi.+ Iʼotarai danö si mate ofeta ba Libano, iʼotarai Nungo Nidanö Oiferati ofeta ba nasi* tanö ba gaekhula, daʼö nola danömi dania.+
25 Lö hadöi si tola molawa yaʼami.+ Manizi fefu soi si möi ami ibeʼe Yehowa Lowalangimi ba ihawui ira faʼataʼu,+ simane si no ifabuʼu khömi.
26 Iadaʼa, so dombua ngawalö nibeʼegu khömi ba mifili, howu-howu mazui fangelifi.+
27 Mitema dania howu-howu na miʼoʼö goroisa Yehowa Lowalangimi nifaʼemagu khömi maʼökhö daʼa,+
28 ba göna ami fangelifi na lö miʼoʼö goroisa Yehowa Lowalangimi,+ na miröi lala sinangea mitörö nifaʼemagu khömi maʼökhö, ba na mifosumange lowalangi si lö irai miʼila.
29 ”Ba ginötö iʼohe ami Yehowa Lowalangimi ba danö nibeʼenia khömi, mifahowuʼö Hili Garisi ba miʼelifi Hili Gebala.+
30 Ba Nungo Nidanö Yoridano tanö ba gaekhula* so hili daʼö, ba mbanua niha Ganaʼana si toröi ba Garaba, föna Giligala, ahatö ba geu segebua ba More.+
31 Miʼötö dania Nungo Nidanö Yoridano ba weʼamöi morabu tanö nibeʼe Yehowa Lowalangimi khömi.+ Na no dania mirabu ba toröi ami ba daʼö,
32 böi zi lö miʼoʼö fefu gamakhoita ba angetula huku nifaʼemagu khömi maʼökhö.+
Nisura ba gahe zura
^ Sin.: ”taʼionia si no ifadölö”.
^ Mazui ”faoma ahemi”, yaʼia daʼö laʼogunaʼö waʼabölö gahera ba wamazökhi gaolo-gaolo nidanö awö mbandra.
^ Faigi Geluaha Ngawua Wehede.
^ Sin.: ”uʼasogö”, eluahania Lowalangi.
^ Sin.: ”ba gotalua hörömi”.
^ Eluahania Asi Sebolo mazui Asi Mediterania (Laut Tengah).
^ Mazui ”Ba zinga Nungo Nidanö Yoridano ba gamaudu na aekhu luo”.
