5 Moze 12:1-32
12 ”Daʼa gamakhoita ba angetula huku si lö tola löʼö mifalua sandrohu faʼaurimi ba danö nibeʼe Yehowa khömi, Lowalangi ndra tuami.
2 Ba mbanua nirabumi moroi ba soi böʼö dania, mihori fefu nahia niʼogunaʼö ba wamosumange lowalangira,+ he si so ba hili salawa, ba hili-hili mazui barö geu satabö.
3 Midudugö naha wanunu sumange khöra, mirasa gehomo niʼamoniʼö,*+ mitunu döla-döla niʼamoniʼö,* mifufu nadu nifoe khöra famaedo lowalangira,+ ba mitayaigö döi lowalangira moroi ba nahia daʼö.+
4 ”Na mifosumange Yehowa Lowalangimi, böi mifalua simane soi böʼö.+
5 Hizaʼi, miʼaeʼe ba nahia si no itatugöi Yehowa Lowalangimi si tobali nahia waʼatoröinia awö nahia wamolakhömi töinia ba gotalua madomi maʼafefu. Ba daʼö mifosumange ia.+
6 Ba daʼö miʼohe zumange nitunu,+ sumange tanö böʼö,+ si sambua niʼofulu,+ tolo-tolo,+ sumange fawuʼusa li, sumange si no aoha gölö, ba siaʼa nono gurifömi.+
7 Ba daʼö manga ami hegöi ösi nomomi, föna Yehowa Lowalangimi,+ ba owua-wua dödömi ba zi no mifalua,+ börö me no ifahowuʼö ami Yehowa Lowalangimi.
8 ”Böi mifalua zimane nifaluada maʼökhö andre, yaʼia daʼö tafalua zatulö moloʼö somasi ita* zamösana,
9 börö me lö nirugimi nahia si toröi yaʼami*+ hegöi tanö ondröita nibeʼe Yehowa Lowalangimi khömi dania.
10 Na miʼötö Nungo Nidanö Yoridano+ ba toröi ami ba danö nibeʼe Yehowa Lowalangimi khömi, lö itehe na so nudu ba zi fasuimi sametaʼu yaʼami. Ohahau dödömi waʼatoröi ba daʼö.+
11 Miʼohe fefu zi no uwaʼö khömi ba nahia si no itatugöi Yehowa Lowalangimi ba döinia,+ yaʼia daʼö sumange nitunu, sumange tanö böʼö, si sambua niʼofulu,+ tolo-tolo, ba fefu zumange fawuʼusa li nibeʼemi khö Yehowa.
12 Miʼomusoiʼö dödömi föna Yehowa Lowalangimi,+ iraonomi ba fefu zawuyumi, simanö göi niha Lewi ba mbanuami,* börö me lö hadöi tana khöra mazui ondröita nitemara simane nitemami.+
13 Böi mibeʼe zumange nitunu ba nahia somasi ami.+
14 Ha ba nahia si no itatugöi Yehowa awai tola mibeʼe zumange nitunu, ba zi sambua mado moroi ba gotaluami. Ba daʼö mifalua fefu zi no uwaʼö khömi.+
15 ”Gofu hawaʼara omasi ami miʼa nagole, tola mitaba ömi gurifö+ moloʼö howu-howu si no ibeʼe khömi Yehowa Lowalangimi ba mbanua si toröi yaʼami.* Tola laʼa daʼö niha si raʼiö hegöi si lö raʼiö, simane na miʼa nagole nago mazui böhö.
16 Hizaʼi, tebai miʼa ndro.+ Miduwagö ndronia ba danö simane idanö.+
17 Ba mbanua si toröi yaʼami,* tebai miʼa zi sambua niʼofulu moroi ba mbua nowimi, agu si bohou mazui fanikha, simanö göi ziaʼa nono zawi, nambi hegöi biri-biri,+ sumange si no aoha gölö, tolo-tolo, mazui sumange fawuʼusa li.
18 Fefu daʼö tola miʼa föna Yehowa, ba nahia si no itatugöi Yehowa Lowalangimi,+ iraonomi awö zohalöwö khömi, simanö göi niha Lewi si toröi ba mbanuami.* Miʼomusoiʼö dödömi föna Yehowa Lowalangimi ba zi no mifalua.
19 Böi miʼositengagö niha Lewi+ sagötö faʼaurimi ba danömi.
20 ”Ba ginötö iʼeboloʼö danömi Yehowa Lowalangimi+ simane nifabuʼunia khömi,+ ba mimane ’omasido uʼa nagole,’ börö me omasi sibai ami miʼa, tola miʼa gofu hawaʼara ginötö somasi ami.+
21 Na fandröndröu nahia si no itatugöi Yehowa andrö ba wamolakhömi töinia,+ tola mitaba mato hauga ngaʼeu gurifö nibeʼe Yehowa khömi, simane si no uwaʼö khömi. Ha ba mbanuami* tola miʼa daʼö gofu hawaʼara ginötö somasi ami.
22 Tola miʼa simane na miʼa nagole nago mazui böhö.+ Tola laʼa daʼö niha si raʼiö hegöi si lö raʼiö.
23 Hizaʼi, mihalö gangetula wa tebai miʼa ndro,+ börö me bakha ba ndro so noso.+ Tebai miʼa nagole na so nosonia nasa.
24 Böi miʼa ndro. Miduwagö ndronia tou ba danö simane idanö.+
25 Tebai miʼa ndro, enaʼö ohahau dödömi hegöi iraonomi börö me mifalua zatulö föna Yehowa.
26 Ba ginötö möi ami ba nahia si no itatugöi Yehowa, ha sumange fawuʼusa li zi tola mihalö hegöi ngawalö niʼamoniʼö tana khömi.
27 Ba daʼö mibeʼe zumange nitunu, nagole awö ndronia+ ba naha wanunu sumange khö Yehowa Lowalangimi. Do gurifö nibeʼe sumange enaʼö mifaduwa ba naha wanunu sumange+ khö Yehowa Lowalangimi, ba tola miʼa nagolenia.
28 ”Mifaigi faböi zi lö miʼoʼö fefu goroisa nifaʼemagu khömi enaʼö ohahau dödömi hegöi ngaʼötömi börö me mifalua zatulö ba si sökhi föna Yehowa Lowalangimi.
29 ”Ba ginötö ihori soi nirabumi+ Yehowa Lowalangimi, ba toröi ami ba danöra,
30 böi teʼala ami me no tehori ira fönami. Böi mizofu-zofu lowalangira ba mimane, ’Hadia zi toʼölönia lafalua soi daʼa ba wamosumange lowalangira? Omasido göi ufalua zimane daʼö.’+
31 Böi mifosumange Yehowa Lowalangimi simane na lafosumange lowalangira, börö me si raʼiö ba si fatuwu Yehowa nifaluara andrö, mendrua manö me latunu nonora ba wamosumange lowalangira.+
32 Mitatugöi wa miʼoʼö fefu niwaʼögu khömi.+ Böi minönö mazui miʼalösi.+
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Sin.: ”moloʼö famaigida”.
^ Sin.: ”nahia wolombase”.
^ Sin.: ”si so bakha ba mbawa göli khömi”.
^ Sin.: ”bakha ba mbawa göli khömi”.
^ Sin.: ”Bakha ba mbawa göli khömi”.
^ Sin.: ”bakha ba mbawa göli khömi”.
^ Sin.: ”Ha bakha ba mbawa göli khömi”.
